Kahdohnak Thawngpang Fonh!
=========
Monywa-Yargyi-Kalewa lamcung, Yinmarbin pengkomh, Kani peng ah a um mi SAC ralkap sakhaan pakhat a si mi Yargyi Tower tung sakhaan cu PDF phufonh pawl nih an kahnak muicawl cu Yinnarbin pengkomh B01 nih an langhter. Yinmarbin pengkomh B01 hruainak in Yinmarbin pengkomh B18, B24, B27 hna nih April 17 zinglei sml 7:00am hrawng in kah hram an thawk tiah an langhter. Kahdohnak chung ah SAC ralkap 30 leng an thi i meithal zuun 15, 60MM 1, hriamngan bom 100 leng, kuan 9,000 leng telh in hriam tampi an lak khawh tiah an thanh.
Naypyitaw, Lewe palek sakhaan le MICC 2 gate cu bom an puah hnawh hna i palek bawi telh in 4 an thi tiah Siitaung Guerrilla phu nih an thanh. June 12 zaanlei sml 5:05pm hrawng ah Lewe palek sakhaan cu bom in an kah caah palek bawi 1, palek 1 an thi i 3 hliam an tuar tiah theih a si.Cubantuk in Zabuthiri peng ah a um mi SAC hruaitu Min Aung Hliang telh in ralkap pawl tonnak an tuah tawnnak hmun a si mi MICC 2 Hall an puah hnawh hna i 2 an thi 2 fak pi in an i hliam tiah theih a si.
Karenni (Kayah) peng, Hpasawng peng kahdohnak ah SAC ralkap a thi mi an tam i kahdohnak pehzulh in a chuak rih tiah Hpasawng PDF nih an langhter. Mese khua ah a um mi SAC ralkap sakhaan 3 le palek sakhaan pakhat an lak hnu June 15 ah SAC ralkap nih Hpasawng peng ah thazang an chap i cawlcanghnak an tuah caah kahdohnak aa thawk hi a si. SAC nih Bawlakhe khua lei thazang leng ah Demoso ni chuahlei ah a kuat mi ralkap pawl zong Hpasawng lei ah a chap tiah theih a si.
KNU hmunhma, Hpapun peng tu thla chung ah kahdohnak voi 71 a chuak i SAC lei 45 an thi tiah KNU Brigade 5 nih a thanh. SAC ralkap le KNLA Brigade 5 kuttang Battalion, Company pawl karlak ah nifatin in kahdohnak a chuak i June 1 in June 15 tiang ah kahdohnak voi 71 a chuak i SAC ralkap 45 an thi, 13 an i hliam leng ah SAC Stallion 5 le mawṭaw 1 an hrawh khawh tiah an langhter.
Kahdohnak chung ah KNLA Brigade 5 in KNLA ralkap 4 an nunnak a liam i 10 an i hliam tiah theihternak an tuah. June 14 Hpapun peng, zarh 2 chung ah kahdohnak voi 31 a chuak SAC ralkap 12 an thi tiah an langhter.
Taninthary ramṭhen, Dawei pengkomh, Wai peng ah a um mi SAC ralkap sakhaan pakhat le riahcaw a phor mi SAC ralkap pawl an kah hna i 8 an thi tiah Dawei pengkomh PDF nih an thanh. June 16 chun sml 3:00pm hrawng ah Dawei khua le Thai ramri, Myatta peng lei ah a kal mi thazang 150 hrawng nih an i cit mi SAC ralkap mawtaw 19 cu Tinkantun khuate an phak ah Captain Waka hruai mi Dawei PDF phufonh nih hriamngan bawm in an kah hna caah SAC ralkap 8 an thi, 12 hrawng hliam an tuar tiah an langhter. Zaanlei sml 4:00pm hrawng ah PDF phufonh pawl him tein an kir kho tiah theih a si.
Sagaing ramṭhen, Myaung peng, Kyaukyit palek sakhaan le Zinkalin khua mipi pawl harnak a petu SAC ralkap pawl mawngtu um lo mi vanlawng in bom an thlak hna tiah Myaung Special Drone Force sin in thawng theih a si. June 15 chun ah Kalay peng, Zinkalin khua ah ni 5 chung hmunhma a khuar mi SAC ralkap pawl cu PDF phufonh pawl nih mawngtu ngei lo mi vanlawng hme in bom lung 2 an thlak hna caah SAC ralkap 3 an i hliam hnu ah an thi. Vanlawng 1 zong a rawk tiah an thanh.
June 16 zinglei sml 8:00am ah Kyaukyit palek sakhaan chung ah chuahni lawmhnak puai a tuah mi SAC ralkap pawl cu mawngtu ngei lo vanlawng hme pawl in bom an thlak hna i hliam a tuar mi le a thi mi cazin a fiang in theih a si rih lo tiah an thanh. Kahdohnak chung ah Myaung Special Drone Force, Kalay PDF B04 le CHU PDF hna bawm in kahdohnak an tuah hi a si. Sagaing ramṭhen, Shwebo peng, Shwebo-Kyaukmyaung lam ah SAC ralkap le an mawṭaw 2 cu bomrap an puah hnawh hna i 1 a thi, Major telh in 8 an i hliam tiah Black Wolf – Army nih an thanh.
June 16 zinglei sml 6:30pm hrawng ah Kyaykmyaung khua ah a um mi SAC Infantry 12 in thazang 30 hrawng SAC ralkap pawl cu mawṭaw 1 an rak i cit i Shwebo-Kyaukmyaung lam ah an dir, cun ke in a kal mi SAC ralkap pawl cu PDF phufonh nih bomrap an puah hnawh hna i SAC ralkap 4 an hliam tiah theih a si. Cun zinglei sml 8:30am hrawng ah Kyaukmyaung Infantry 12 in Honda mawṭaw 1 he a rak chuak mi SAC ralkap pawl cu Shwebo-Kyaukmyaung lam ah bomrap an puah hnawh chap hna i SAC ralkap 1 a thi, Captain telh in 4 an i hliam tiah theih a si. Black-Wolf Army, Who Am, Army le adang PDF phu hna bawm in kahdohnak an tuah hi a si tiah theih a si.
Moebye PDF an dirhnak kum 2 a tling cang i cu caan chung ah SAC ralkap he kahdohnak voi 84 a chuak, SAC chungtel 540 leng an thi tiah Moebye PDF nih June 18 ah cathanh a chuah. Kahdohnak chung ah Moebye PDF chungtel 23 nih ram le miphun caah an nunnak an pek bantuk in sualnak ngei lo mipi 43 an nunnak a liam ve i minung 40 leng hliam an tuar tiah an langhter. Moebye PDF cu SAC ralkap nih hramhram in uknak an laknak thla 5 a rauh hnu 2021 June 17 ah an rak dirh mi hriamtlai phu a si i atu bantuk in hriamtlai phu an dirhnak kum 2 a tlin ni ah cathanh le kahdohnak kong an langhter hi a si. Hriamtlai phu an dirh kum 2 a tlin ni ah Battalion Commander, Deputy Battalion Commander, Captain pawl, Company Commander pawl thim ṭhannak le i thlennawnnak cu June 17 ah an tuah tiah theih a si.