Kahdohnak ruangah zeibantuk teinak hmanh an hmuhlozia

Russia Ralkap Pawl Nan Hriamnam Chiah U’ Tiah Ukraine President Nih A Forh Hna!
===========
Ukraine ramchung ah kahdohnak tuahtu Russia ralkap hna nih nan hriamnam chiah dih u tiah Ukraine President nih March (15) ah a forh hna. Russia ralkap hna nih Ukraine ramchung ah kahdohnak nan tuahnak ah hin a thimi le hliammi nan tam tuk, nan sungh tuk tiah Ukraine President nih March 15 zaan ah a chim hi a si.

Kahdohnak ruangah zeibantuk teinak hmanh an hmuhlozia cu Russia ralkap nih fiang tein an hngalh tiah Ukraine President nih a chim. Russia ralkap hna nih nun man a ngeihzia le a herh loin thisen chuah le thih a herh lo ning an i fiang tuk cang caah hriamnam a chiahtu Russia ralkap paoh cu upatnak he kan in cohlang lai tiah a chim chih.

Ukraine kahdohnak kongah duhlonak signboard tlaih hratin Russia ram nih a ngeihmi thawngzamhnak nih direct in thawngzamhnak a tuah lio zongah duhlonak langhtertu Marina Ovsyannikova zong upatnak kan pek i, cu bantukin raltha taktakin a dikmi cu dirhkamh dingin i dinh loin aa zuam cuahmahtu Russia rammi hna cungah kan lunglawmhnak kan langhter tiah a chim chih.

Russia le Ukraine karlak itheihthiamlonak a daih khawh nakhnga tonbiaruahnak cu pehzulh in tuah ding a si i, cu bantukin tonbiaruahnak kan ngeihmi zong thatnak lei a panh thluahmah cang tiah Ukraine President nih a chim chih.

UNO-Humhimnak Council Phung Ning Aa Thlenh Khawh Nakhnga Japan Nih Biatak Tein Hma A Laak Cang Lai! UNO-humhimnak council ah Japan ram hi pehzulh in chungtel a si zungzal khawh nakhnga siseh UNO-humhimnak phung ning hna hi aa thlen khawh nakhnga Japan ram nih biatak tein kan i zuam cang lai tiah Japan ramdang vuanci nih March 15 ah thawngpang fianternak ah a chim.

Ukraine cu Russia nih kahdohnak a tuahmi kongah mawhpuhnak/sual phawtnak siseh Russia ralkap hna nih anmah umnak ram ah an kir dih nakhnga tiin chuahpimi agenda cu Febuary thla dih lai hrawngah tuahmi UNO-humhimnak council tonbiaruahnak ah Russia nih a nawlngeihnak Veto Power hmangin dohkalhnak a tuahmi cherhchanh in Japan ramdang vuanci nih a chim hi a si.

Humhimnak council ah chungtel a si zungzaltu Russia nih vawlei cung hmunkip ah remdaihnak le humhimnak ah tuanvo a ngei tiah Japan ramdang vuanci nih a chim. Humhimnak chungtel ramchung ah a buai ngaimi le a hnoksak ngaimi sipuazi ruangah humhimnak council phung ning thlenh ding hi a har ngaingai lai nain UNO-humhimnak phung hi rem that le sersiam a duhtu ramdang hna he tuanti hratin a si khawh chungin sersiam dih dingin kan i zuam lai tiah a chim.

UNO-humhimnak council phung ning hi biatak tein thlenh ka duh ko tiah March 14 ah Japan hluattaw tonbiaruahnak ah Japan Prime Minister zong nih a rak chim i, UNO-humhimnak chungtel a si zungzaltu Russia tuahsernak hi vawlei cung ram huap in zulhphung le policy thar hi a herh hringhran timi a langhter, tiah a chim ve.

Buainak a chuah deuh paoh ah UNO-humhimnak tonbiaruahnak ah Veto Power hman ngah lo dingin phihkhamnak tuah dingin France nih agenda a rak chuah bal cang. Japan Prime Minister nih France bantukin phung ning thlenh a duhtu ram hna he i fonhin UNO-humhimnak council phung hi thlenh dingin biatak tein thazaang kan chuah cang lai tiah a chim.

North Koria Nih A Hnubik Dung Gyi (Rocket) A Hneksakmi Cu Hlawh Tling Lo! North Koria nih zeibantuk dung gyi (rocket) asi timi theih lomi dung gyi cu hneksaknak a tuah nain a hlawh tling lo tiah South Koria nih March 16 ah an chim. Cu Dung Gyi cu North Koria ram Piu Yang khuapi hnulei in an hneksakmi a si i, a hlan zongah a rak hneksak tiah American nih sual a phawt tawnmi dung gyi phunphun hneksaknak a tuahnak hmun a si.

Naihrawng ahcun North Koria nih a hriamnam hneksaknak cu biatak tein a langhter lioah atu bantukin dung gyi zong hneksaknak a tuahnak a si. North Koria ah March 16 zinglei sml 9:30 hrawng ah Suu Nan leikap in a min theih lomi dung gyi pakhat cu hneksaknak an tuah i, an hneksak tlawmpal ah an hmuitimh ningin a kal kho lo/an hlawh tling lo tiah South Koria leikap nih cathanh an chuah.

Tukum chungah Northa Koria nih hriamnam hneksaknak vawi (9) bak a tuah cang i, dung gyi hneksaknak a tuah hlanah dung gyi he pehtlai in technology thar cu hneksaknak an tuah tiah American nih fiang tein an chim. Credit: The Federal Times