Kahdohnak Ruangah Hliamtuarmi Hna Cu Dawtnak He Zohkhenh An Si Lai, Tiah Cathanh An Chuah!

LCMC(Siizung) Lawngtlai Nih Kahdohnak Ruangah Hliamtuarmi Hna Cu Dawtnak He Zohkhenh An Si Lai, Tiah Cathanh An Chuah
========
Myanmar ramchung buainak ruangah Mizoram, LADC (Lawngtlai District) chung ah nunhimnak kawl in aa dor hna nih damlo zawtfahnak an ton le dohthlennak ah hliamhma tuarmi hna an um i Lairam Christian Medical Center & Hospital, Lawngtlai an phanh tikah harsatnak nan ngeih ahcun kan in tuaktan piak hna lai, tiah Medical Superintendent nih cathanh an chuah.

“Kan theih cio bantukin Myanmar ram buainak ruangah Mizoram hmunkip ah ralzaam in an hawng phan hna i, Lawngtlai District chung zongah tampi an um. Cu lio ahcun ralzaam hna lakah zawtfahnak ngeimi sii-inn i zohter hau mi hna le sii-inn chung um (Admit hau) mi hna, tangka lei harnak ngeimi tampi an um ti theih a si hi poi kan ti ngai.

Ralzaam hi lei i harnak ngeimi siizung ah i zohter man le siizung umnak man (Medical bill) pek ding ngeilo mi hna le siizung an um chung i harnak ngeimi (sii cawknak ngeilo mi tbk.) kan um ahcun a tang i min tialtu hna sinah hin i theihter(report) ding a si lai. Anmah le an dirhmun cio zoh in bawmhnak (Poor Fund) pek pinah siizung um man tiang zong dawt khawh an si lai.

“Hi pin ahhin kahdohnak ruang i hliamhma pumi, siizung a rak lutmi hna an um ahcun dawtnak in zohkhenh ding an si lai.” tiah Medical Superintendent Dr. B. Zonunsanga nih September 5 ah khan cathanh a chuah.

Hi kong he pehtlai in LCMC rianṭuantu pakhat nih cun LCMC, Lawngtlai Siizing hi Lawngtlai peng chung mizaw hna nih an fuhpanh bikmi siizung a si i, atu lio ah cun ralzam tam lio a si caah ralzam mizaw zong nih an fuhpanh tawn, tiah a chim. LCMC ahhin Doctor 5 an um i, nurse 34, lengah rianṭuantu dangdang he an dihlak in rianṭuantu 97 an um, tiah The Chin Post ah a chim.

“Ka nu, Pathian nih lam a ka hruai lai i ram thumnak hna ka phan ahcun kan caah a tha deuh lai! “Ka nu, Pathian nih lam a ka hruai lai i ram thumnak hna ka phan ahcun kan caah a tha deuh lai” tiah a nu sin a rak chimmi cu a takin a hung tling taktak cang. Caan sau khi a rau hrim lo; kum hnih chungah US cu a phan taktak. A pi siseh, a nu zong a si ah an i lawmhnak cu zei he hmanh tahchun awk a tha lo.

Kan harsatnak vialte chungin kan luat cang lai, Malaysia te i a um hmanhah mah tlukin a kan zohkhen khawh, zeizong te hi Bawipa, nangmah thawngin a si ko tiah Pathian an thangthat. Thangthat phu, lawmh phu te a si hrim ko, harsa tukin khua a sami Laimi caah cun US ram phan cu Hell chungin luat tluk pei a si lai cu.

An fanu te zong mi dingfel cia hrat cu, a nu le a pi zohkhen le cawmken ding kha fakpi in aa ruat ve. Lai lei a um lio i an sifah retheining vialte le a nu nih chungkhar pawcawmnak caah zeitluk in rian a tuan le zan ah hrum lengmang in a um kha a philh te a philh kho lo. A dingfel hrim ko, a nu le a pi cu a dawt takrak ko hna.

A nu le a pi zong ningcang deuh tein khua an vun sak cang. Asinain aa lungsi hlei lo. Ka pi zong a tar tuk cang, ka nu a riantuan a fak tuk, Hakha ah vun um hna sehlaw a tha lai tiah an pa kha bia a ruah cang. An pa zong lungfim khuahngal ngai a si, “A tha tuk, Hakha lei vun kai ko hna seh” a ti colh ve. Phone an chawn colh hna. “Ka fale, nan chimmi hi kan al hna cu a si lo, asinain Hakha kan kai ahcun zeihmanh ka tuah thiam lai lo i kan fale pei nan re kan theih tuk hna lai cu. Atu khua ah kan um cu ka tuah khawhmi tlawmpal te ka tiah ve i kan tlam a tling deuh dahkaw.”

“Ka nu na rian duh hi cu, a ti te lai ka ti cia te, mah ti rian na tuan tukmi kha dawh ka duh lo cu. Ka pi le nangmah hna cu kan cawm kho tuk hna lai. Kan pa zong nih lungtho tein a ka cohlang ko, nan kai hrim a hau” a vun ti ve. Fanu fangkhat te bia cu al siang ve bak hlah. “A si ko, nute, Hakha ah kan um ahcun nan awka zong kan theih deuh lai i ka hnangam deuh lai cu, kan ngai tuk tawn i, nan awka theih lengmang dawh ka duh cu, mah ti nan ti thlalem paoh ahcun ka rak kaipi ko lai na pi cu, sizung hram te um zong cu kan duh tuk ko” a ti ve.

Hakha lei cu an vun kai. Hakha phakka kan ti cu duh herhmi a tam ngai, zeizong te a thar in i thawk a si. An ruah lengpi nawn khin phaisa a dih. Nain a vun ruah thiam ko. Cuticun Hakha ah kum ngaruk khua an vu sa ve. A nu tu cu zei tuah thiammi zong um lo, an fanu te kut to rumro cu a si.

A fanu zong pum lawngin a um lio bantuk a si ti lo, fa pahnih pathum a vun ngeih ve cang. Cun US ah kum sarih riat a um ve tikah Lai lei sifahnak kha a vun philh deuh ve cang. Cu lawng hlah, US ah Laimi dang tlonlen ning khi a vun dawi ve cang. Zarhpi ni i hawi dang thil hruk-aihmi, chungkhar in nuamnak an kalmi, le a dangdang kha a vun tuah pah ve cang. Thla khat ah voikhat hmanh phone a chawn hna lo caan khi a um pah cang. A nu cu a khuaruah a har pah, nain a fanu hmanh hei si sehlaw a ka a pau ngam tuk ti lo.

A pi nih le si-ai a heu bak fawn cang caah kuli rian tuan awk um paoh cun aa thawh ve cang. A kum nih le tlawm ti hlah kaw kuli riantuan zong cu a thazang nih a tlinh te a tlinh ti lo. Zeite va banh awk um lo tuk caah Khua an um lio riantuan aa hnek bantuk te khin aa hnek bia khi si ko.

Cu chinchap ah pulrai nih vawlei pi a vun den tikah US lei zong an ruahning in riantuan kho ti hlah, Lailei zong cu thiamthiam. Cu lawng hlah, ralhrang nih Kawlram pi a vun den chih fawn tikah a nu le a pi cu caah cun a har deuh khun cang. Chiti man zong a kai tuk, facang man le thil dangdang man zong van a su cang. Asinain Phone voikhat hnih an i chawn hmanhah hin “US lei zong kan har tuk ve, bill pek ding nih le a tam tuk” tiin an bia kha a chawhkanh cang hna.

A nu cu khuaza a ruat, zei a tuah thiam le tuah kho zong um hlei hlah. Kuli tuan awk hmanh cu um ti lo. “Ka fanu hi, Malaysia um lio hmanh ah khan a kan zohkhen kho deuh i kan i nuam deuh tuk ko mu” tiah vansang chimpit tuk bia ah khuaza ruat in. “Na nu le na pa cu lawmhter hna, nangmah an hringtu cu lawm tein um seh. ” (Phungthlukbia 23:25). Credit: Saya Biak Mawng