JESUH MIN IN CANSER IN KA LUAT CANG
=========
June 27, 2023; Ka khak ah thi a pel te aa cawh caah Pinlon Sizung ah X-Ray kaa tuah. Dr nih a result cu a zoh i, a lung a tling lo caah VICTORIA Sizung ah CT Scan (Contrast) an ka tuah. A result cu CANSER (T3 NO MO) asi tiin a phi a chuak. Ka Cuap a bo hi 5.5cm asi i a ngan ngai cang. A rannak in operation tuah a hau lai ti asi caah CUAP Surgeon sinah an ka hluai.
June 29, 2023; CUAP Surgeon sinah kaa piah than i, Bronchoscopy a ka lak. Cun Operation tuahnak ding caah a herhmi Thi check nak le Lunglei checknak Echo an ka zeih. Caan karlak ah a dang(Cuap) lei Sibawi SAKURA sizung ah kan va tong hna i Canser asi ko, operation tuah a hau hrimhrim ko an ti.
Pinlon sizung ah operation tuah dingin room zong booking kan lak cang i. July 8 ah operation tuah dingin fehter asi. Kan u Thong Thluai le Solomon nu le pa (Khamh Bawi Nawl le Ngun Nei Iang) an rak ka zoh i, Bangkok ah Biosy lak dingin ruahnak an kan cheuh. Ka cuap bo mi hi.. Cuap a cunglei ka hnak ah aum mi asi caah, Kawlram nih cun Thim (Needle) in Biosy an laa kho lo). Kan U Thong Thluai nih Bangkok kalnak caah a herhmi Dollar zong a kan tuaktan piak colh. An cung ah kan i lawm tuk.
July 3, 2023; Bangkok ah ka fanu hniang (Mercy) he kan rak phan. July 4 ah SUMKUVIT HOSPITAL ah kan i piah. July 5 ah Ka keng an vih i Țhim in Biosy cu an ka lak piak i Sizung ah zankhat an kan riak ter. Minor operation phunkhat asi ve. Biosy result cu ni nga hngak uh an kan ti i kan pafa tein kan hngak.
July 11 ah Biosy result chuak ding asi caah, 1pm ah appointment an kan pek. Sizung motor nih hotel in an rak kan lak i sizung kan phan. Minung kan si ve caah Thin cu a nuam ruam lo. June 27 in July 11 tiang hi cu Khuaruahhar vansaang in kan um ko. Keimah zong nih canser ka si ko lai tiah 100% kaa zumh. Dr. Yada room ah kan lut i, kawlnu nih translation an kan tuak piak.
“CANSER NA SI LO, TB asi” tiah an kan chimh. HALLELUHAH AMEN kan ti ko. TB si an ka pek i, tuhnu zarh hnih ah BANGKOK ah Follow up i tuah than ding ti asi i appointment zong kan lak chih.
Biadonghnak.
Ka caah thla a ka cam piak tu nan dihlak cungah kaa lawm tuk. FB in thla a ka cam piak mi zong nan tam tuk. Bawipa nihcun Canser in TB ah a ka thleng piak mi asi ko tihi ka zumh. Hmailei ah Pathian rian fak deuh le biatak deuh in ka tuan nak hnga Bawipa Auhnak asi caah Pathian ka thangthat.
Cun keimah kongah thinlung kuai in thla a ka cam piak tu le thazaang a ka petu ka chungkhar (ka nupi le ka fale) nan dihlak cungah kaa lawm tuk. Nan thlacamnak Bawipa nih an theih piak hna. Amen. Pathian nih CANSER in TB ah a kan thleng piak mi asi tihi 100% ka zumh. Jesuh min in ka dam cang!