Indonesia ram ah Thil mak a tlung

Indonesia ram ah Thil mak a tlung
====================
Indonesia ram hi Pathian thin hunnak le a dantatnak an ingtuar a si men hnga maw? Aruangcu, an rampi ah thil a cangmi hna hi, ningcanglo deuh a si kolo maw tihi ruahlo awk a ttha hrim loh. Khrihfa diktak, Pathian minung pahnih thonginn ah, cozah nih an rak thah bal hna. An sining konglam zoh tuah hna u sih. Nizan naite ah Indonesia ram i, vanlong a tlaknak ruangah minung 62 an rak thi, culakah hngakchia zong an i tel caah fak khunin vawileipi a hninh. An mitthli hmanh ahul thlu dih hlan ah, an ram nih tihnung tukmi ngeihchiatnak pam an ton tthan caah kum 2021 hi cu an kumvui a chiat kum a si ko rua tiah vawleipi nih a ti.

Indonesia thlang lei Sulawesi Tikulh (Island) ah, tihnug tukmi Li-hninhnak a chuah caah inn le lo tthatha tampi a hrawh hna i, mithi ruak 34 an hmuh cang hna i, mithi dangzong an um len rih ko lai tiah nawlngeitu nih nizan friday ah khan a chim. Hithil a can hi, nizan tihni friday ah Indonesia local time zing 2:18 hrawngin ai thawk i, lihninh a fah ning hi, magnitude 6.2 hrawng a si i, minung 600 hrawng nih hliamfaakngai an tuar tiah, U.S. Geological Survey nih a chim. Hi hmun lila ah, nizan tihni Thrusday ah khan, magnitude 5.9 hrawng a cakmi Li a rak i hnin cang i, inn le lo tam-ialte a hrawh hna nan a thi mi le a tlaumi cu an um hraw loh tiah Indonesia’s National Disaster Mitigation Agency lei nih an langhter chap.

An Thil tonmi cheuhat hna, Kum 2004 lioah Sumatra timi Li-hninhnak magnitude 9.1 hrawng a cakmi nih India thlang lei rili tiang a rak den hna ruangah minung 230,000 hrawng an rak thi hna i minung tam taktak sinah paam a rak tlung. Mahlio ah hin, a thi mi lakah Indonesia minung an tam cem. Kum 2018 lioah, magnitude 7.5 hrawng a cakmi Li-hninhnak nih Indonesia ram Palu Sulawesi hmun minung hna cu a rak den tthan hna i, minung 4000 fai a rak thah hoi hna. Kum 2004 lioah fligh 538, vanlong zong Indonesia khualipi Jakarta in a zuan cuahmah lioah a rak tla i, minung 25 an rak thi. Kum 2014 lioah, Indonesia ram ah a zuang liomi Air Asia vanlong minung 162, a phurmi zong, an dihlek tein an rak thi dih hna. Kum 2018, October 29 lioah, minung 189 phurmi Indonesia Lion Air Plane nih pam an rak ton caah an zatein an rak thi dih.

Pathian riantuanmi minung pahnih an rak thah ning cang. Austrialan minung pahnih Andrew Chan le Myuran Sukumaran hna cu, an mah pumpak chawlehnak ah rithai-si tthalo kg. 8 leng ( Heroin ) cu Indonesia ram luhpi dingin an ra i, airport ah an rak tlaih hna ( An hawi le cheukhat he). Hi thil a can hi, kum 2005 lioah khan a si i, Indonesia thonginn ah kum 20 chung thongtla dingin biaceih an rak si. Can a kal lengmang i, thonginn chungah an pahih tein hrintthannak an tingco. An hrintthan le cangka tein, thonginn chungah biatak tein Pathian rian tuan hram an i thok colh. Cutikah, thonginn chung hrimhrim ah thongthla vemi mitam pinih hrintthannak zong an tingco hna i, mitampi nih tipil ingnak zong an rak ngei hna caah Indonesia Khrihfa cheukhat hna he, thongin ah Jail Ministry tiin ministry min bunhin Pathian rian an tuan hna. Hi hna pahnih Andrew le Myran hi, Pathian nih mak taktak in thluaachuah hna caah Thonginn congtu rakkap bawi cheukhat hna zong nih Pathian min an rak thangtthat taktak bal.

Sihmanhsehlaw, can a kal lengmang i, kum 10 chung thong thlak an si hnu ah, Denpasar District Court biachahnak in, an pahnih tein execution by firing squad timi meithal kah i, thi dingin cunglei court nih biachahnak an rak tuah tthan. Cutikah Australia cozah lei sihni ( lawyer) hna he an chung le nih hehchet tiah thih biaceihnak chungin an luat khawhnak hnga khua an khang hna i, ram hruaitu veve tiang bia ruahnak zong an rak ngei hna. Indonesia ram khrihfa hruainak comunity vialte komhin, a cozah sinah an luat khawhnak hnga nawlnak zong an rak tuah len ve ko hna. Sihmanhsehlaw, an duh ningin thil a rak kal khawhlo caah cunglei biachah ningin meithal he kah (thah) an rak si.

Indonesia ram khrihfa tampi nih an rak tuar taktak ko, hi hna pahnih Andrew Chan le Myuran hna an ruak cu an rak lak i, Indonesia thlanmual ah hlunghlai taktakin vui an rak si. Andrew Chan le Myuran hna hi, meithal in kah i thah an site lainak, ni 2 duh ah thawng an rak thanh hna i, an pahnih tein Bawipa ahcun kan i lawm zungza lko lai tiah nih bu tein ralkap bawi pawl cu, bia an rak leh hna.

Thah dingin an rak hruai lio hna ah hin, Angki rang an i hruk veve i, Amazing grace timi hla khrihfa hlabu chungta kha, thangtuk lem loin an rak sak pah ziahmah i, meithal in kah an si lai ah, an mit cu puan rang he temchih ( tuam ) an rak duhlo, meithal he an kan kaptu mithmai hi zoh chih kan duh e tiah, an ti caah, an hmai cu tuam ( khuh) a rak si loh. Cu ticun, thihnak cu, raltthatnak he thihnak nih a tei khawh lomi zumhnak he, an nunnak cu a rak dih. Thihnak cu nun hramthoknak a si ti kha, an rak i fiang taktak ko rua. Note: An konglam hna hi a tawnfiannak in tial mi a si. Bichap; Indonesia ram cu 27 million hrawng minung ummi an si i, Islam biaknak atthawn taktaknak ram zong a si. Khrihfa biaknak hi 7.6 hrawng an si ve tiah Wikipedia nih a langhter. Credit: Isaac VanBawi Thang