I Ralring Rih Ko U, Daithlang hlah U!

I RALRING RIH KO U, DAITLANG HLAH U
=======
Nikum 2020 le tukum 2021 cu Rai le Ral nih a kan den! Hi bantuk caan hi thlarau leiin, ‘Zaan mui,’ a si. Thlarau lei zaan mui caan ahcun, BAWIPA kilvennak le THIANG THLARAU umpi nak kha a zawr i, thlarau țhalo, khuachia hna tu kha cawlcangh onh an si caan a si.

Cucaah, Rai, Ral le Mangtaam a tlun caan, ‘thlarau leiin zaan mui caan,’ ahcun, a lamkipin i ralrin a herh caan a si. Voi dang, kum dang le ni dang i kan rak cawlcangh bantukin cawl cangh a ngah lo caan a si.

Thlarau lei zaan mui caan ahcun, a ka kipin khuachia nih hrawh awk le thah awkah a kan bawh lio a si caah, i chuah sualnak le khawndennak (Accident) a tam khun tawn! Cucaah, zei vial ka tuah, ka țuan, ka umkal ahhin dah ka him lai, BAWIPA nih a ka ven lai, ti ruat bu tein cawlcangh a herh tuk lio a si.

Atu bantuk caan ahcun, tiva kal te hna, picnic kal te hna, zan mui hnu i chawh te hna, a herh tuk lo i khual tlawn le vah te hna, motor/motor cycle mongh te hna, chiatnak-țhatnak inn i chuah luhte hna tiangin, ralring tein, kan chiațha hngalnak ah, PATHIAN THLARAU nih a kan onh maw onh lo ti hngalh i zuam buin țhutdir a herh caan a si.

Phundang i chim ahcun, vawlei fimnak hna le lianngannak hna le rumnak hna hi zeihmanh a rak si taktak lo zia le BAWIPA lawnglawng hi biapi bik a si zia le bochan tlak a si zia, BAWIPA nih a takin a kan cawnpiak lio caan a si. BAWIPA kha a tam khawh chungin kan lung dihlakin kawl caan, ruah caan a si.

Thlarau lei zaan mui ahhin, a tak le a tak lo țhen a si tawn. Aaron thiangțhunh a par i a thei a tlai kha zan ah a si. PATHIAN kuang an chiahnak Dagon pathian cu zan ah a ban a rak tlong! A zan hnihnak ahcun a bawk ta khup in a tlu i a lu le a ban an tlong dih!

Harsatnak zaan mui kan kal lio ahhin, BAWIPA hmai i a kun mi hna cu; kan chungah, keimah i tinak Dagon pathian a ban a rak tlong, zan a sau deuh paohah kan i porhlawtnak Dagon lu le ban a rak tlong! Zaan mui a dih tikah, BAWIPA an sinah aa lang i BAWIPA cu an hmuh! Cu Thluachuah cu zeihmanh nih a tluk kho lo. Cun, taksa thluachuah lethnih, let tampi in pek an si, Job kha philh hlah.

BAWIPA PATHIAN nih, rai le, ral le, misual mi hna le, mițha lo hna le, zumlo tu hna le, țhatlonak vialte le mițhalopa/satan lakah in huppheng ko hna seh. Amen. BAWIPA Zaangfahnak le Vel cu na cungah um ko seh. Amen. KHRIH sal, Tluang Lian (Martar)