Hlan Kan Pi Pu hna nih Mi Thianglo an ti mi hna hi zei ruang ah dah asi?

Hlan Kan Pi Pu hna nih Mi Thianglo an ti mi hna hi zei ruang ah dah asi?
=======
Atuchan cu Khrihfa chan asi cang bantuk in Bible lei thiam sang kan fa nau le lakah tampi an um cang hna i khuavang ngeimi hnam angei mi le milukut kantimi hna kong hi cu ka ni fiang ngai cang ko hna lai tiah ka ruah.

Pathian nih minung hi a mah he alo in akan sermi kan si tihi amah kan Pathian abia hrim hrim asi ti kan hngalh asiahcun Pathian nih hin khuavang le hman angei ti mi hna hi ci le kor thi le sa hri le sor in arak kan ser lo ti cu afiang ngai ko.

Pathian nih hin minung hi an nih hrinsor hi hnam ngei mi sihnaseh an nih hi milukut,khuavang angei mi chung khar sihnaseh ti in ci le kor thi le sa in rak kan ser seh law cu Pathian cu biaktlak lo taktak mi pathian, duhdan angei mi pathian, adiklo mi pathian, pathian deu asi hnga. Kan biak mi kan Pathian sining (perfection of God) timi kan zoh tik ah kan biakmi kan Pathian cu atlamting tuk mi Pathian asi ti cu kan hngalh i kan zumh.

Kan Bible ca ttha te in kan zoh tthan asi ah cun khuavang ngei mi le hnam a ngei kan ti mi hna khi (Demons possession) timi Sehtan khuachia pawl nih minung pum chung i an va hrolh a valuh hnawh hna i amah sehtan khuachia pa duh ning poh in an va cawlcangh pi mi (control mi) hna khi asi. (Mtt 4:24,8:16,28,33,12:22,15:22 Mark 1:32,5:15,16,18 Luka 8:36,Johan 10:21)

Hlan kan pi pu hna nih hin minung hi Pathian nih amah he alo in akan ser mi kan si ti le Pathian zeibantuk dah asi ti an rak hngalh lo caah hin khuavang, hman le milukut hi minung ci le kor hrin le sor thi le sa in akal mi ah an rak ruah. Khuavang, hnam le milukut hi minung nih kan ngeih khawhmi asilo amah sehtan khuachia pa tunih khan aduhmi minung chung tuah ava tlunh ava luh hnawh ava hrolh mi tu khi asi deuh.

Mahti i ka ti tikah ziah kan khua kan sang kan inn pawng zawng ah an um ko tung nan ti khawh men asi an um ko lai asinain kachim duhmicu mah hna kha an hrinsor an cikor an thisa in an ngeih mi asilo Sehtan khuachia tu nih an chungkhar i aduh mi poh chung ah khan ava hrolhmi ava tlunhmi ava luhhnawhmi asi ka ti duhnak asi.

Kachim duhmi tak tak cu Pathian nih mi nung hi amah he alo in akan sermi kan si ko nain Amah he na pehtlaih Na Pianthar taktak tunglo ahcun nangmah chung zong ah Sehtan khuachia kha alut kho ahrolh kho i an tlunh ve kho mi asi i nang mah hrim hrim zong hi khuavang ngei hnam ngei milukut cu na si kho ve ko hrin le sor ci le kor, thi le sa in asilo sertu Pathian kan hngalh lo kan Pianthar lo ruang tu ah hin asi deuh.

Minung hi Khrih he apehtlaih (apianthar) asiah cun Khrih he pumkhat an si i achungah Khrih nih athlarau in a um pi zungzal mi kan si 1Kor 12:13,2Kor2:22,Eph4:30. Ca reltu nan dihlak cung ah Bawipa nih fian nak in pe ko hna seh. Credit: Bawi Lian Mang