Hi ralhrang kan tei lo chung paoh cu kan thlanhripi pawt in kan ttuan i kan hlawhmi kan phaisa

Teinak cu zubui-mei can lawng ai duh cang!
=================
Atu lio cu Kawl ralhrang tam taktak Hakha an rak kai tikah mipi lei lawng si loin kan pasalttha ralkap pawl zong an lau pah cio lai Ka zumh. Cu launak nih thinlung itthul in ralhrang pawl doh duh ti lonak a chuahter sual lai ka phang bak (a chuah Lai cu Ka zum bak lo nain).

Hi ralhrang kan tei lo chung paoh cu kan thlanhripi pawt in kan ttuan i kan hlawhmi kan phaisa hmanh zalongte in kan hmang ngam lai lo ti a fiang ko, a dang zalonnak cu chim len hau ti lo. Kan lungtthulh kan itimh sual ah kan theih dingmi cu,

1. Kawlram Mipi nih hi ralhrang cozah hi an duh hna lo i Kawlram pumpi hmunkip ah dohtu (PDF, CDF tbk) a ngei cang. Cun an tei cuahmah cang hna. (Chin lawng nih kan doh lo caah ttih lo ding.)

2. UN nih ralhrang palai an cohlang lo i NUG cozah palai tu an cohlan cang. 3. EU nih ralhrang cozah an pompi lo i NUG cozah an pom cang. 4. Aseans nih ralhrang cozah palai kha summit ah ai kaiter ve ti lo. 5. US Congress nih Kawlram bill a ser lio i hmalaknak a tuah te lai zumh a um. 6. France le EU ram cheukhat nih NUG cozah an dirkamh cang.

Mah bantuk dirkamhtu tampi kan ngeih hi teinak tam taktak kan hmuh a langhnak a si philh hrim hlah uh. Lungtthulh nemmam cu, kan ttang chin hna lai. Teinak cu zubui mei can lawng ai duh cang.

Ka chungle Ka chawnh hna paoh I an lungretheihnak le ralzaam si ruang an harnak an chim caan paoh ah a cunglei Ka ttialmi konglam 6 khi Ka chimh hna, ihne ko uh, a theipar kan zun deng cang ko tiah. Nan chungle cio rak chim ve hna uh. Mah bantuk pawl an theih ahkhin an ihne kho deuh hrim lai.

Chin Ramkulh chung ah palek 1600 leng an um i cu chung ah 900 fai nih CDM an tuah cang. Ralkap nih uknak hramhram in an laak hlan 2021 January thla ah Chin Ramkulh pumpi palek thazaang cu 1670 hrawng an rak si i cu chung ah 900 leng nih CDM an tuah cang tiah kan theih.

Chin Ramkulh chung palek 900 leng nih CDM an tuah ca ah palek thazaang a tlawm cang i Chin ramkulh chung palek zung le sakhan pawl ah rian tuan ding in minung 500 an rak thial hna, cu chung ah palek officer 98 an i tel tiah CDM a tuah mi Palek Officer Tha Chin Sung sin in kan theih.

“An rak thial mi hna hi September thla tiang oder a chuak mi ah 500 an si. Nizan (October 20) i Kalay lei in a rak kai mi ralkap pawl sin zong ah khan palek 200 hrawng cu tel dawh an si. Falam, Hakha le Thantlang ah a tuan ding in an rak thlah mi hna an si. Falam ah zeimaw zat cu an thumh ta theo hna lai. Thlanglei Chinram i a tuan ding cu Mindat, Matupi lei in an kai ve lai,” tiah The Hakha Post ah a chim.

Chin Ramkulh tuk ding in Hakha khuachung ah a rak lut mi ralhraang hna sin ah palek zong tampi hmuh an si.
Chin Ramkulh chung ah Paletwah peng tel lo in Palek Sakhan a hme he a ngan he 40 leng a um i a cheu tluk cu CDM ruang ah siseh, an zaam taak ruang a siseh an hong kho ti lo tiah kan theih.

Chin Ramkulh Palek Zung in Palek Officer Tha Chin Sung le Hakha Pengkomh Palek Zung in Coporal Dar Vang nih CDM an tuah. Hakha khua, Chin Ramkulh Palek Zung ah palek bokhat (Police Second Lieutenant) a tuan mi Tha Chin Sung le Hakha Pengkomh Palek Zung ah Senhnih (Coporal) rank in a tuan lio mi Dar Vang, palek nu pahnih cu September 18 ah CDM an tuah i atu cu himnak hmun ah an phan cang tiah kan theih.

“Democracy kan duh ca ah uknak tha lo doh ding in CDM kan tuah mi a si. CDM tuah a duh tuk ko nain chungkhar ruang ah a rak chuak kho lo mi an um bantuk in, rian chuah taak sian lo ruang ah CDM a tuah lo mi tampi an um ve. Hi hnu zong ah CDM a tuah ding an um rih ko lai tiah ka ruah,” tiah palek officer Tha Chin Sung nih The Hakha Post ah a chim.

Chin Ramkulh ah palek 1600 leng an um i cu chung ah 900 leng nih CDM an tuah cang. Nu palek 40 leng an um i 30 leng nih CDM an tuah, a taang mi 10 fai an si tiah kan theih. Chin ramkulh ah Chin miphun palek nu officer pathum an um i tu tan ah pakhat nih CDM a rak tuah hi a si. October 21 tiang ah Chin Ramkulh chung in Chin miphun palek Officer nu pakhat le pa pahnih nih CDM an tuah cang tiah kan theih. TheHakhaPost