Hakha Um Khuanu khuapa nih khua fakpi in ruat kan hau cang!

Hakha ah Ralkap nih Sianginn an hun: A kaimi cheukhat an um
==========
Chin ramkulh, khualipi Hakha ah Ralkap (SAC) nih a hun mi High School ah Saya/mah le siangngakchia cheukhat sianginn an kai nak zarhkhat tluk a si cang tiah theih a si.

Hi kong he pehtlai in, “Khuate lei le khuapi chung, CDM a tuah lomi saya/mah vialte kha No.1 B.E.H.S (Hakha) ah fonh dih in cacawnnak an tuahter hna. A kaimi siangngakchia pawl hi CDM a tuah lomi saya/mah te fale, palik fale pawl le, ralkap fale pawl deuh an si tiah” min langhter awk tha lomi khuami pakhat nih The Chinland Post ah a chim.

Atu bantukin Sianginn hunnak kong he pehtlai in, Salai Ngun San Aung nih “Hakha khuachung ah Pu Ngun San Aung le a ralhrang pawl nih sianginn an hun i ngakchia a kaimi an um pah len tiah ka theih. Nulepa hna sal ah a kan can ter dingtu cacawnnak ah nan fale rak kai ter hrimhrim hna hlah u mu.

Hriamtlai nan fale nih kan in nawl ko hna…” tiah a pumpak Facebook ah a tial. SAC nih High School kan hun cang tiah thawng a thanh hnu in atu bantukin a thli tein sianginn kaimi an um le cachimhnak a thli tein a um hi a si tiah theih a si. An mah ralhrang fale deuh an si lai tti zimh cia! Ram that tik ah a theipar a duh te lo ding an lo e! CDM tuah duh lo pawl hi cu.

Chin ramkulh, Falam in Hakha lei ah eidin chan dingin a kalmi ralhrang mawtaw thluan 20 le tank 2 cu CNDF, CDF le CNA hna fonh in February 28 ah Falam khua, Lungrang sang le Ṭaal khua karlak ah bom an puah hnawh hna i ralhrang 11 an thi. March 2 zongah mipi hriamtlai phufonh hna nih Falam peng, Taal le Tlangzaar khua karlak ah bom an puah hnawh ṭhan hna i ralhrang 30 hrawng an thi chap tiah CNO nih a thanh.

Cu lawng si loin, March 3 zong ah phufonh hna nih Ramthlo le Dokṭhek khua karlak ah bom an puah hnawh ṭhan hna i ralhrang 20 leng an thi tiah theih a si. Cu kahdohnak ahcun, CNDF hriamtlai lei in 1 a nunnak a liam i pakhat hliamhma a tuar. Cun, Chin miphun hriamtlai a simi CNA ralkap 3 nih ram caah an nunnak an pek chap tiah theih a si.

Dokthek le Chuncung kar ah CNA nih Council ralhraang pawl bomb in an phomh hna; ralhraang a thi mi an tam. Falam Peng le Hakha Peng ramri, Dokthek le Chuncung kar ah Hakha lei panh in a kalmi SAC ralhrang hna cu CNA le CDF i bawm in lampi cung ah bomb in an puah hna i a thi mi an tam tiah theih a si.

Hi bomb an puah hi 2022 March 3, zinglei sang ah a si i, “Dokthek le Ramthlo kar i kah hnu ah Dokthek ah zaan khat an riak. Tuzing hi Hakha lei ah lanh an i tim i Dokthek le Chuncung kar ah bomb in an phomh than hna hi a si,”.
Hi bomb an puahnak ah SAC ralhrang lei a tlawm bik 10 an thi lai tiah ruahdamh a si. Cun Dokthek lonh Welcome Center inn an saknak hmai ah ralhraang ruak an pon hna.

SAC ralhrang nih Dokthek khua inn 16 an khangh i ralhraang bomb nih a kheen mi inn 2 zong a rawk. 2022 March 2 ni Ramthlo le Dokthek kar i CNA ralkap le SAC ralhrang hna karlak kahdohnak a chuah hnu ah ralhrang nih Dokthek khua inn 16 an khangh i hriamnam ngan an kah mi ruang ah inn hnih a rawk tiah thawng kan theih.

Inn a kaang mi chung ah Khrihfabu Quater pakhat aa tel. A kaang mi inn 16 hi chungkhar 15, minung Pa 34 le Nu 42 zate fonh 76 khua an saknak a si tiah kan theih. Inn duahpiak a tong mi hna min cazin: 1. Khua Inn, 2. Pu Biak Cin, 3. Pu Tawk Ceu, 4. Pu Than Tlir, 5. Pu San Bawi, 6. Pu Ceih Bik, 7. Pu Mang Sum (Biakinn Quater), 8. Pi Tawk Men, 9. Pu Khua Er, 10. Pu Sual Ling, 11. Pu Rual Pum Thang, 12. Pu Hrang Lian Sam, 13. Pu Siang Tun, 14. Pu Ngun Dai, 15. Pu Lal Hup Thang, 16. Pu Hrang Pian.

Hriamnam ngan nih a kheen i a rawkmi inn; 1. Pu Lal Than Mawi, 2. Pu San Ceu, Falam peng chung kahdohnak ah CNA ralkap lei in Salai Za Hnin, Salai Van Bawi Bik le Salai Thang Bik Lian hna nih nunnak an pek. Cun, minung 2 hliamhma an pu tiah kan theih. Council ralhraang lei in a thi mi an tam nain zeizat set an thih hngalh a si rih lo.

Kanpetlet peng kahdohnak ah ralhrang 7 an thi. Kanpetlet peng le Magway ramṭhen aa tonnak Kyaukhtoo lei in hmun 3 in a rak ṭummi ralhrang le CDF-Kanpetlet karlah ah kahdohnak a chuak tiah theih a si. Cu kahdohnak ahcun ralhrang 7 an thi. CDF-Kanpetlet lei tutiang cu kan him rih. CDF-Kanpetlet nih kan doh liopi a si caah kahdohnak he pehtlai in CDF-Kanpetlet nih a chuahmi thawngpang lawng a dikmi a si lai tiah CDF-Kanpetlet nih a thanh.

Yinmarpin-Mattara karlak ah ralhrang 16 leng an thi. Sagaing ramṭhen, Yinmarpin peng, Shwetaungoo in a rak ṭummi ralhrang cu March 4 chun sml 11:11am hrawngah Cap.Htuntauk hruaimi TTPDF phu le a dang mipi hriamtlai phu hna nih meng 5 hauka ah bom an puah hnawh hna caah ralhrang 4 leng an thi tiah TTPDF nih a thanh.

Bom an puah dih hnu ah, ralhrang pawl hmunhma an laknak Banbwe khua ah ralhrang mawtaw 2 a rak phan chap tiah theih a si. Mandalay ramṭhen, Mattara peng Ingyinmyaing van khamnak ralkap 24 cu cycle 12 in Kyaukselay khua le Kinkye khua karlak ah March 4 zinglei sml 11:00am hrawngah mipi hriamtlai phu 2 hna nih bom an puah hnawh hna caah ralhrang 12 leng an thi tiah PDF-Mattara sin in theih a si.

Cu bom puah hnawhnak cu PDF-Mattara le PDF-Mandalay hna fonh in tuahmi a si i bom puah hnawhnak a dih in kahdohnak tlawmpal a chuak. Ralhrang lei nih Mizaw phorhnak mawtaw 2 le probox 2 in aa hliammi le a thimi cu an phorh hna tiah theih a si.