Hakha Township Public Healthcare Committee thawngthanhnak le nawlnak!

Hakha Township Public Healthcare Committee thawngthanhnak le nawlnak
==============================
1. Mipi Sin Nawlnak; July 29, 2021 thawk in Hakha Township Public Healthcare Committee le Hakha khuachung ummi mipi dihlak i bawm in Covid-19 zawtnak biatak tein doh hram kan i thawk i October dih ah cun kan tei lai tiah kan i ruah. Nain October thlacheu tiang Covid-19 zawtnak a zor hlei lo caah October 15-31 tiang hi Lockdown program in Covid-19 zawtnak fakpi in runvennak ngeih awk ah thawngthanhnak kan tuah.

2. Lunglawmhnak: Thawng kan thanh bantuk in nawlngai mi mi tampi nih dawr nan khar hna i Khrihfabu in mino tampi nih nifatin lam cungah siseh, Gate ah siseh caan pek in rian nan tuan. Khuaram le miphun dawtnak he dawr a khar i runvennak rian ah biatak te in thazaang a chuahmi Khrihfabu le pumpak nan cungah lunglawmhnak tampi kan ngei. Hinak tha deuh in a tangmi zarhkhat te hi kan vun i zuam rih cio theu lai tiah kan i ruahchan.

3. Nawlthannak; Thlathum leng pumpek in riantuantu Doctor, Medical Student, Sii Sayama le Volunteer pale le mino hna upat peknak caah siseh, Covid-19 zawtnak hmunkhat kan dohtinak caah siseh October 31 tiang te hi a tanglei bantuk hin vun i hne in zul ta rih ko usih tiah kan in nawl hna.

a) Myoma Market, Ral Dun Market le Dinti thiang peknak rian lawnglawng 12:00 tiang hun dah ti lo cu zeibantuk dawr paoh khar dih ding. b) Siidawr le Siikhan lawng hun kel (punghman) in hun ding. c) A herh tukmi a um lawng ah Mask huh bu in Outpass Card he caan tawi te chung lengah chuah ding.

d) Mizaw paohpaoh nih Covid-19 test Center ah i test ding. e) Mizaw zual deuh paoh nih Covid Center 2 ah lut in i thlop ding. f) Covid-19 zawtnak zulhphung tha tein zulh khawh i zuam cio ding.

Note: Hakha khuachung ah Dawr a hung mi tlawmte taktak kan si. Mah zong cu thawngpang theih palh ruangah a si caah hmunkhat te ah thazaang chuah in vun i hne ta rih ko hna usih tiah kan in nawl hna. Hakha Township Public Healthcare Committee

“Raltha tein um kan herh” Pu Htet Ni. Biahalnak le Bialehnak; Q1. Chin ram ah SAC ralhrang thazaang chapmi kongah zeidah chim na duh? Bialehnak: SAC thazaang chap an si nak cu CNA ralkap hloh duh le kan Vawlei uk duh le anmah SAC an riantuannak thawnter an duh caah a si lai dah tiah ka ruah. Cun Chin ram cu Kawlram huap in CDM a tuahmi tambik kan si caah SAC cawlcanghnak tha a der ngaingai. Cucaah anmah SAC zung riantuan pawl humhim duh ca zongah asi kho.

Q2. Atu nan dirhmun ah kap hnih nan kar ah dohnak tam deuh a chuak kho ti nak si maw?
Bialehnak: Raldohnak mit in zoh ah cun kaphnih kar ah dohnak tampi a chuak kho dirhmun ah kan um. Thazaang cu an chap thluahmah ko lai cuh.

Q.3 Mipi sin biacah – Mipi nih theih ding mi cu ral kan i doh tikah SAC nih zeibantuk thil dah an tuah i zeitin an um tawn ti cu theih dih cangmi a si ko caah tampi chim ding a um lo. Ralrinnak pek zong a hau ti lo. Kan umnak cio ah raltha tein thut dir cio ding si tih ding an si lo.

CDF-Matupi nih SAC Ralhrang Thawngpetu Dalan 3 an Thah Hna! SAC ralhrang he rian a ttuanmi Dalan 3 cu CDF-Matupi nih an tlaih hna i September 26 ah an thah hna, tiah tu zaan ah cathanh an chuah.

“Matupi peng chung ah SAC ralhrang he aa pehtlaihmi minung 6 cu September 16 ah kan tlaih hna. Biahalnak le hlathlainak kan tuah hna tik ah minung 3 hi SAC ralhrang thanwgpetu Dalan an simi a fian caah kan thah hna,” tiah cathanh ah an langhter. A dang minung 3 cu SAC ralhrang he pehtlaihnak an ngeih lo caah October 7 ah him tein an thlah tthan hna.

Hakha ah SAC Ralhrang nih Minung 10 leng an Tlaih hna i Ralkhamnak Phaw (လူသားဒိုင်း) ah an Hman Hna. Nihin chun sml. 2:20 hrawng ah Hakha khua, Ruavazung Workshop ah rian a ttuanmi minung 4 le Rual-U thlanhmun ah thlan a sermi pawl cu SAC ralhrang nih an tlaih hna i Timit lam lei ah ral i khamnak phaw (လူသားဒိုင်း) ah an hman hna, tiah tlaih a tongmi minung pakhat nih The Chin Journal ah a chim.

‘Rian kan ttuan lio ah an ra i a kan tlaih. Kan kut ah hri in a kan ttem. Kanmah pali le Rual-U thlan a sermi hna he kan si. Hmai ah a kan kalter i, kan hnulei in SAC ralhrang 50 hrawng nih a kan zulh,” tiah a chim. An tlaihmi hna cu kut hrittem buin Timit lam, Chin Dwin Star dawr tiang an kalpi hna. Lampi ah an bawhter hna i an tuk an velh len chap hna.

“Ruahsur lak ah lam cung zong ah a kan bawhter. A velh zong a kan velh. Meithal zong in fak ngaiin a kan tuk. Chin Dwin Star dawr tiang cuticun a kan kalter,” tiah a chim chap. Ralkhamnak phaw ca ah an tlaihmi hna cu nihin zaanlei sml. 5:30 hrawng ah khan an thlah dih tthan hna, tiah thawngpang kan theih.

Hakhathar Khualuhnak Bomb Hmuh Ruang ah Minung 19 an Tlaih Hna. Nizaan October 20 ah Hakhathar khualuhnak motor lamkam ah bomb an hmuh ruang ah SAC ralhrang nih Hakhathar minung 19 an tlaih hna, tiah Hakhathar pastor pakhat sin in thawng kan theih.

Hakhathar khualuhnak i inn a pakhatnak bik Pu Aung Lan-Pu Ral Lan dawrkhaan he aa naihnak hmun ah bomb hmanhmi SAC ralhrang nih an hmuh ruang ah kiangkap a ummi minung 19 cu lunghrinh in an tlaih dih hna hi a si. Hakhathar khuami pakhat nih, “Nizaan zaanlei sml. 5:00 hrawng ah khan palik an ra i micheu an rak tlaih hna. Cun, zaan ah an ra tthan i an rak tlaih chap hna,” tiah a chim.

Tlaihmi minung 19 chung ah minung 6 hi nu an si i, kumtlinglo minung 3 zong an i tel. Cun, Bureau of Special Investigation (စစစ) zung inn a sami Kawlmi pathum zong tlaihmi ah an i tel. Hakhathar pastor pakhat nih, “An tlaihmi hna lak ah kum 16 pahnih le kum 7 ngakchia pakhat an i tel. Kum 16 nute hi cu midamlo ngai a si. Kum 7 ngakchia hi cu tu zing ah an rak thlah tthan cang. Cun, COVID-19 in a zaw ngaimi kum 60 nu upa pakhat le a dang COVID-19 mizaw pa pathum zong an i tel,” tiah a chim.

Pu Aung Lan-Pu Ral Lan te innchung i tangka ting 40, sui tumbul, sui banhrolh le suitthi zong an tlau hna. Atu tiang ah cun kum 7 ngakchiate lawng hi inn ah an ttinter rih. Nutung 5 le midamlo kum 16 nute hi palik sakhaan ah an chiah hna i a dang pa vialte cu Rungtlang ralkap sakhaan ah an kaipi hna, tiah a cunglei pastor nih a chim. Credit: The Chin Journal