Hakha Thil Sining Cu, Mino Nih An Inn Ah An It Ngam Ti Lo!

Operation Hakha (Sept.-Nov.,2021)
========
Atulio kawlram ah ningcang loin nawlngeihnak chuh asi lio le kahdohnak tampi a um lio ah khuaza um chinmi vialte nih kan zoh bikmi cu kan khualipi Hakha khuami hna nih zeitindah an tthutdir lai tihi asi. Hakha khuachung ah zantin ti awk in kahdohnak, bomb puah le meithal thawng a than lio ah Hakha khua hi an zamtaak lai maw zam loindah an kilven an intuar lai ticu cuanh ciomi asi.

September le October thla chung cu furpi asi bantukin nikhua a chia umkal a har leng ah zantin bomb le meithal thawng nih a kan tlerh dih. Kan nun himnak ding ah inntang le inn thadeuh mi inn kip ah kan i thup. Hakha Cawbuk check point, Lamruk tonnak checkpoint, bank, Cozah zungpi le hmun dangdang ah kahdohnak a um i inn kanghnak zong a um.

Lam ah siseh inn ah siseh mi an tlaih hna caah thonginn tlum loin thongtla an tam. Tar le ngakchia ko an thin a phang. Mino nih an inn ah an it ngam ti lo. CDM vialte nih zeitikdah an kan taih lai ti phan ah siarem in inn ah an um ngam lo. mitkuh vuai lonak caan nih a sau. Chungkhar rawldum tti zong kaa a thaw ti lo. Khoika ah kan zaam hnalai tiah khua kan tuak cio.

Kan inn le kan ngeihchiah cu a poi lo kan nunnak him a herh tiah khua kan tuak cang. Kum 20/30 kan pal tilomi kan khuate va fuhpanh thanding kan lung ah a chuak. Thantlang peng Hakha peng ah an chuahkenhnak khua a panhmi an tam ngai cang. An mawh lo kan soisel hna lai lo. Hi lio caan ah nule pa nih dawt cikcek mi fale tampi hna nih ram tang ah miphun caah an nunnak a liam. inn ummi nule pa khuami vialte kan thinlung a kuai.

Cu hlei ah inn le lo tangte ah khua a sa komi zong Covid zawtnak nih zaangfahnak ngei loin thlichia bang a kan cil fawn. Sept-Oct thla hnih chung ah Covid zawtnak in kan Pastorte, kan nule kan pa tamtuk nih an kan thihtak tik ah kan ngaihchiat kan celh lo, ruak tehmanh kan i thlah ngam lo. Inn cio ah asi khawh chung in kan i erhkhumh ko bu ah inntung kaan loin kan zaw, chimpit vansang in khua kan sa, Hakhakhua a semnak in atutiang ah a fakbik lungretheihnak a ton caan asi ko hnga lo maw.

Sihmanhsehlaw maw Hakha..hmailei thiltha na hei cuanh i na hacang naa rial chih, phunzai lo tein naa inn chih, na innlo, na vawlei midang chuhlai na siang lo, na dirhnawh, na mitsir in na venpeng, Hakha kan zamtaak lai lo tiah bia na kam, na lung a tthawng, na thin a sau.

Khuasik thla November kan hun phan..thla tanttim kan phan cang nain kumdang tluk in khua a sik lo.. nikhua a tha..Covid zawtnak zong a zor ciahmah..a rauh hlan ah Pathian thawng in kan dam dih lai. A rauhhlan ah Dawr vialte zong ningcang tein ondih an si lai, Biakinn zong kan panh kho cang lai.

Kahdohnak zong a van zordeuh tik ah kan mitkuh sia a rem, kan thinphan a zordeuh, kan mihhmai aa panhdeuh, kan hna a ngamdeuh cang, Hakha innlak tlonlen a hung nuam ngai cang, Khuate lei ah aa dor chungmi zong nan innlo panh than khawh asi cang lai.

Zawtnak thalo a damnak ding ahcun operation tuah a herh. Pathian kan sin ah a um ko.. thinlung zawtnak, thlarau zawtnak, taksa zawtnak in Halkha a dam cang lai. Pathian sinah thlacam in zangfahnak kan in nawl piak hna le, cu ceo cu kan tuah khawhmi a si ko e! Minung nakin Pathian nih hnahnawh sualsannak sersiam zia a thiam deuh ko, ti zum bu tein kan lung ṭhawng ko seh law!