Hakha sii-inn Ralkap le Palek nih an luhhnawh, an dirhmun a tha lo

Hakha sii-inn Ralkap le Palek nih an luhhnawh, an dirhmun a tha lo
==============
Kan dirhmun a tha lo, khuapi le mino nih nan kan chuahhnawh a hau tiah Hakha Siibawi pakhat nih atu nai chunhnu 12:15 ah The Hakha Times ah a chim. Atu hi an kan ton i kan i ceih cuahmah lio a si. Asinain siibawite cu kan chuak dih lai kan ti. A dang Staff pawl vialte cu anmah duhnak kan hal ta hmasa hna lai, kan dirhmun a tha lo tiah a chim than.

Sii-inn chung ah a um mi Nurse pakhat nih zanlei suimilaam pathum tiang kan in hngah hna lai i cu chung ah CDM a tuah mi poh chuak dih u, an kn ti tiah a chim. Atu a ra mi ah hin ralkap lei in Biohahmu le Chin State Administration Council in Pu Kyaw Ngein le upa dang an ra tiah kan theih.

Relchap, CNF/A hi nan kan uhtanh ko, nan mawh lo, amah belte hriamtlai dang he tahchunh awk kan tha deuh lo: Pu Htet Ni. Atulio kan ram buainak kong ah mizapi nih CNF/A hi nan kan uhtanh i nan mawh lo, amah belte Tlangcung hriamtlai dang he tahchunh awk kan tha lo, tiah CNF/A Chimphuannak Nawlngeitu Pu Htet Ni nih a chim.

“Nationwide Ceasefire Agreement (NCA) ah minthu ciocio Tlangcung hriamtlai hi kan i khat hna lo. Kannih CNF/A cu Bilateral Agreement ah umnak hmunhma (control area) kan ngei. Phundang cun umnak hmunhma a leng ah meithal, uniform he cawlcangh thiam a si lo tinak a si. KNU khi NCA ah minthu mi an si ve nain rikhiah mi hmunhma (control area) an ngeilo. Mah belte an thazaang a thawn ca ah anmah tein control area an i ser khawh. Thazaang an ngei ca ah an hmunhma chung ah an cawl kho ngai. Thil a um rih mi cu an control area ah hin Kawl ralkap zong hmunhma an laak ve tik ah i kah peng cu a si ve hoi.

Atu CDM kong ah an cawlcangnak khi anmah control area chung ah a si. Kan dirhmun aa khat lo i hihi mizapi nih a ruah zia an thiam deuh rua lo. Chungtuan an si ve lo tik ah an mawh ve bak lo. Kanmah CNF zong kan hmunhma ah Kawl ralkap hi hmun khuar ve hna sehlaw kan buai ve kho ko,” tiah Pu Htet Ni nih The Hakha Times ah a chim.

Zeipoh a si ah hriamtlai dang hna cu thazaang an ngei. CNF cu hriam thazaang kan tlacham tuk. Thazaang ngeih i mizapi nih dirkamh tham ahcun kan cawlcang kho tuk ve ko lai, ti zong Pu Htet Ni nih a chim fawn. Credit; The Hakha Times