Hakha Ralhrang nih Nabual pawng lei ah Bomb Pehzul in an Kah
Hakha SAC Ralhrang nih Nabual pawng lei ah Bomb Pehzul in an Kah
———-
Hakha SAC ralhrang nih nihin zinglei sml. 7:00 hrawng thawk in atu tiang bomb pehzul in an kah i Nabual he meng khat le cheu hrawng a hlatnak hmun ah bomb pehzul in an tla, tiah Nabual khua upa pakhat nih a chim.
“Nihin zinglei khan an kah cang. Atu zong a puak lengmang ko. Kan khua Nabual le Khuabe karlak, Nabual he meng khat le cheu hrawng a hlatnak hmun ah bomb an tla. Ram zong a kaang an ti i, atu ah cun kan phelh ngam rih lo,” tiah a cunglei Nabual khua upa nih The Chin Journal ah a chim.
Hakha khuasa pakhat nih, “Zinglei khan Rungtlang in an kah i atu zong hi a puak lengmang ko. Innchung ah kan um hna i khoika lei an kah timi fiang in kan theih lo,” tiah a chim. Nihin zinglei sml. 6:00 le 7:00 karlak ah Hakhathar lamton (၆လမ်းဆုံ) ah kahdohnak a chuah hnu ah SAC ralhrang nih chunnitlak bomb an kah hi a si.
Hakhathar khuami pakhat nih, “Nihin zinglei sml. 6:00-7:00 karlak ah khan lamton (၆လမ်းဆုံ) ah an i kap. Atutan an i kah cu innlo an khenmi a um lo,” tiah a chim. Falam lei in a rak rami SAC ralhrang pawl zong zaanlei sml. 5:00 hrawng ah Chuncung khua ah an phan ve, tiah thawng kan theih.
Khua chuah taak in a zaam mi Tlangzaar ralzaam cheukhat eidin lei harnak an tong. Raal ruang ah khua chung ah um ngam lo in hmun kip ah a zaam mi Falam Peng, Tlangzar khuami cheukhat cu eidin, hnipuan fenhaih lei ah harnak an tong tiah theih a si.
An zaamnak kong he pehtlai in khuami ralzaam min langhter duh lo pakhat nih, “SAC ralhraang hna Falam an vun lonh in khan khuami kan zaam dih cang. Kannih hi lampi kam kan si lawng si lo in CNA humhak mi hmun ah a um mi kan si i kan ca ah tih a nung kan ti ca ah kan zaam mi a si. Kan khua hi atu in a voi hnihnak kan zaam a si cang.
A voi khatnak ahkhan kan inn le lo zei mawzat cu an hrawh dih. Atu tan bel hi khuachung kan luh ngam rih lo ca ah zei kan thei kho rih lo. Kan zaamnak hmun zong hi khuate deuh a si tik ah atu lio ahcun mi zeipoh har dih cio kan si. Kan har bikmi hi cu eidin lei a si bik ko,” tiah The Hakha Post ah a chim.
Tlangzar khuami an zaam hi 2022 February 26 le 25 ah an si i a tam deuh cu Thantlang Peng, Khualhring tlang Tlangkhua ah an zaam tiah kan theih. Atu tan Kalay in Hakha lei panh in a ra mi SAC ralhraang hna hi motor 24 le raltuknak tank 2 in an si. Cun ke in a kal mi zong tampi an um.
Hi hna hi CNA, CNDF, CDF i bawm in an kah hna i a tlawm bik minung 30 leeng cu an thi lai tiah ruahdamh a si.