Hakha Peng ah kahdohnak chuak, SAC lei thi an tam
================
Gangaw lei in a rak kai mi Tatmah 77 hna a dongtu Hakha hrambunh 266 ralkap le Chin ralkap CNA, CDFs hna karlak ah nihin May 13 ah kahdohnak a chuak i SAC ralkap a thi mi an tam tiah theih a si. Ralhmai suang pakhat nih, “Chun ahkhan sau ngai kan i kap. Kanmah lei cu kan him. Hliamtuar zong kan um lo,” tiah The Chin Post ah a chim.
Tatmah 77 ralkap pawl hi a dongtu 266 ralkap hna he Sakta le Zokhua kar tlangbo ah an i tong kho cang tiah khuami sin in kan theih. Khuami pakhat nih, “A langtlang in kan cuanh hna i anmah cu kan hmu lo nain an i kah caan a sau. Meithal le bomb puah thawng a dai lo,” tiah a chim ve.
Karen National Union (KNU) humhaknak hmunram chung April thlakhat chung ah uknak a latu SAC ralhrang nih rallam an sial i cunglei kahdohnak, hriamngan kahnak, meithal kahnak, tualchungmi tlaih in an thahnak hna le bomb lamhsualnak ruang ah mipi 14 an nunnak a liam pin ah 59 nih hliamhma an tuar, tiah KNU nih May 13 ah thawngthanhnak a tuah.
SAC ralhrang nih tualchungmi hna umnak khuate hna le an rianṭuannak hmun ah cunglei in voi 44 naak tlawm lo a kah caah inn 303 a rawk. Cu chung ah Building 3, sii peknak inn 2, sianginn 3, phungki sianginn 1, Khrihfa Biakinn 2 hna zong an i tel i tualchungmi 15 nih hliamhma an tuar pin ah pakhat a nunnak a liam, tiah theih a si.
Cu pin ah tualchungmi hna an rianṭuannak hmun hriamngan in voi 243 naak tlawm lo a kah ruang ah inn 150, Building 5, phungki sianginn 2 an rawk pin ah tualchungmi 38 nih hliamhma an tuar i 7 leng an nunnak a liam, tiah theih a si, SAC ralhrang nih a ruang umlo in meithal he an kahmi ruang ah tualchungmi 4 an nunnak a liam i pakhat nih hliamhma a tuar. SAC bomb tarhmi lamhsualnak ruang ah tualchungmi 5 nih hliamhma an tuar, tiah theih a si.
SAC ralhrang nih tualchungmi 16 an tlaih hna hnu ah 2 an thah hna i fakngai in 2 an hrem hna, tiah theih a si.
SAC ralhrang nih rallam an sial ruang ah khuate 7 chungin inn 74, Building 5 le phungki sianginn 1 hna cu hrawh in mei an khangh hna pin ah tualchungmi hna thilmansung hna zong hramhram in an lakpiak hna i an kalpi hna, tiah theih a si.