Hakha MCH pawng ah mino nih mifir pakhat an tlaih nain a zaam than

Hakha MCH pawng ah mino nih mifir pakhat an tlaih nain a zaam than
=====
Chin Ramkulh Hakha khuachung Cherry lampial MCH pawng 2021 March 7 suimilaam 7:00PM tluk ah mino hna nih mifir pakhat an tlaih nain a zaam than tiah kan theih. Atu an tlaih mi pa hi a min ah Mizoram mi Puia ti a si i a nupi hi Laimi a si.

An tlaihnak kong he pehtlai in an tlaih lio ah aa telmi mino pakhat nih, “Kan tlaih hi suimilaam 7:00PM tluk ah a si. Kan tlaih ka in bia kan ruah hmasa, suimilaam 8:00PM tiang hrawng. Bia kan ruah dih hnu in motorcycle he ka kalpi. Kan kalpi lio ah motorcycle cung in a zuang i a zaam beh. Kan dawi nain kan tlai kho ti lo. Anih hi motorcycle fir hmang a si. Nan sang ah nan hmuh a si cun rak tlai cio uh,” tiah a chim. Nizaan 2021 March 6 zaan hnu zong ahkhan Hakha khuapi chung Pyidawthar sang ah mifir pakhat Mizopa an tlaih cang tiah kan theih.

Relchap, Hakha University hmun chung ah ralkap nih umhmun an khuar; Chin Ramkulh, Hakha khuapi, Hakha University hmun chung ah 2021 March 7 zaanlei suimilaam 2:00 hnu in ralkap nih umhmun an khuar cang tiah theih a si. Hakha University ah ralkap nih umhmun an khuar mi kong he pehtlai in University chung riantuan pakhat nih, “Kei cu zeihmanh ka thei lo. Sianginn uk pa he an i chawnbia i a si lai. Cun, atu an rat i umhmun an khuar zong hi atu cu mei kangh ti bantuk pawl a um lengmang tik ah security ca ah an rat mi a si lai,” tiah a chim.

Ralkap nih umhmun an khuar ca ah University chung a um mi siang cachim le riantuantu hna zong a dang ah an i thial dih tiah kan theih. Cun, Chin State Administration Council Chairman Pu Ngun San Aung nih, “Kei cu zeihmanh ka thei lo. Keimah lei chawnhbiaknak a um lo. Atu an kal mi hi cu security ca ah a si lai ti ka ruah ko,” tiah a chim.

Atu bantuk in Sagaing Ramthen Monywa University, Kayah Ramkulh Luai-kaw University chung ah ralkap nih umhmun an khuar nain mizapi lei nih an duh lo ca ah an i thial than tiah theih a si. Cun, Hakha University sianginn uk Dr. Lian Za Khup nih, “Pakhat ka thei ve lo. Ramkulh council lei nih an tawlrel mi a si lai,” tiah a chim ve. Credit; The Hakha Post