Timit Kahdohnal A Hnu Bik Thawngpang!
===========================
June 16, Hakha in khua a dei hlan in, tuhi khuhsilobo in Timit/lungkhar leiah ralhrang nih miakpi an kah tamtuk cang e tiah kan theih. June 13 zanttim ah Timit lei kahdohnak ah ralhrang hliamtuar Hakha siizung ah 11 an rak chiah hna i,mah tan kahdohnak ah ralhrang thi hi 16 hrawng an si tiah kan theih.
June 16 sml 4AM in tutiang hi Timit leiah ralhrang le Chin ralkap an i kah cuahmah lio si i, HK ralhrang nih miakpi in heh tiah an vun bawmh hna hna tiah kan theih. Kan ralkap hna caah thlacam cio hna usih. crd-Salai William Hlawnceu
Kahdoh a fahnak hmunhma pawl ah SAC ralkap nih mipi inn a khangh chin thluahmah tiah Data for Myanmar nih June 14 ah a thanh. Data for Myanmar cazin ning ah, hramhram in uknak lak a si hnu ah mipi inn 70,324 an khangh cang i cu chung ah inn 9,865 cu March in May tiang thla 3 chunng ah an khangh mi a si. Sagaing ramṭhen ah inn 53,816, Magway ramṭhen ah inn 10,451 le Chin ramkulh ah inn 1,637 SAC ralkap nih an khangh.
Magway ramṭhen, Minbu pengkomh, Salin peng, Monywa-Pathein lam, Khinpa khuate pawng ah SAC ralkap pawl nih an rak i cit mi mawṭaw an kah i 4 an thi, 7 fak pi in hliam an tuar tiah PDF-Salin sin in thawng theih a si. June 12 chun sml 3:00pm hrawng ah Salin peng, Monywa-Pathein lam in Palinlu khua lei panh in SAC ralkap 15 nih an rak i cit mi Light Truck mawṭaw 1 le cycle 1 cu PDF-Salin nih a thi tein an rak kah hna i SAC ralkap 4 an thi, 7 hliam an tuar tiah theih a si.
Kahdohnak chung ah Minbu pengkomh B01, Company 3 le Daungnyinaung phu hna an i bawm tiah theih a si. Sagaing ramṭhen, Sagaing peng, Sataung khua pawng ah a cang mi ni 3 chung kahdohnak ah SAC lei ralbawi telh in 30 leng an thi tiah Zero Guerrilla phu nih an thanh.
Sataung khua ni tlaklei, Paukmataung khua le Thazin khua pawng ah June 13-15 tiang ni 3 chung kahdohnak a chuak. Thazang 200 deng SAC ralkap pawl cu PDF lei Special Commando phu pawl nih a thli tein an kah hna hi a si. Kahdohnak chung ah PDF chungtel 6 hliam an tuar tiah theih a si.
Zero Guerrilla phu, Naga Ni phu le LPDF hna fonh in kahdohnak an tuah hi a si. Tamu in meng 6 aa hlatnak Panthan khua ah a um mi SAC ralkap sakhaan cu June 15 zinglei ah PDF Tamu nih an kah hna i sakhaan an lak khawh leng ah SAC ralkap cheukhat zong a nung in an tlaih hna tiah theih a si.
Pantha khua ah a un mi SAC ralkap sakhaan cu PDF Tamu nih June 15 zinglei sml 5:00am hrawng in kah hram an thawk tiah theih a si. Sakhaan an lak khawh hnu ah an kir ṭhan i zinglei sml 9:00am hrawng ah SAC nih Jet Fighter 2 in bom a rak thlak tiah theih a si. Kahdohnak chung ah PDF chungtel pawl an him tiah theih a si.
Cun June 15 zinglei sakhaan lak kahdohnak an tuah lio ah India ramri Tamu khua, Nanphalung bazaar kalnak hlei ah a um mi pyusawhtee gate PDF phu pawl nih bom an rak puah tiah theih a si. Cu bom puah hnawhnak ah Tamu ah a minthang ngai mi pyusawhtee hruaitu Chan Myae telh in 8 nak tlawm lo hliam an tuar i 4 an thi tiah theih a si.