Hakha-Thantlang Kar Niruk Chung Kahdohnak Ah SAC Ralhrang 20 Tluk An Thi; 42 Siizung An Phan
=========
Chin ram Hakha le Thantlang karlak ni ruk chung kahdohnak ah SAC ralhrang in 20 tluk an thi i hliamtuar mi 42 siizung an phan tiah CNA chimphuannak nawlngeitu Salai Htet Ni nih a chim. “July 3 in 8 kar kahdohnak ah kan mah Chin ralkap lei in minung 6 hliam an tuar, ralhrang lei in 20 tluk an thi i hliamtuar mi 42 hna cu siizung an phan tiin kan theih. Ralhrang hna cu kahdohnak a chuah nak hmun in hnulei ah an pil cang nain Hakha tiang an kir maw timi cu kan hngal rih loh” tiah Salai Htet Ni cun a chim.
Ralhrang lei a thi le hliamtuar an tam caah tanglei in hriamngan le cunglei in raltuknak vanlawng nih voi 3 tiang Bom a thlak hnawh hna. Hi kahdohnak chungah hriamnam phunli le kuan 1000 leng zong Chin ralkap nih an lak chih.
“Ralhrang pawl hi Thantlang ah thazaang chapding in rat an i timh hi a si. Thazaang an i chap khawh in duhsah tete in Thantlang peng hi humhak dingin an i zuam tiin kan ruah. A bik in Thantlang ralhrang bawmh le thazaang chap dingin an i zuam” tiah a cunglei upa nih a chimchap.
Taingen Khua Kahdohnak Ah SAC Ralhrang 15 An Thi; Mipi Ralkap Nih Hriamnam Cheukhat An Lak. Chin ramkulh Tedim peng Taingen khua ah Mipi ralkap tangti phu le SAC ralhrang kar kahdohnak ah ralhrang lei 15 an thi tiah mit in an hmuh hna nak kong CDF CDM-Siyin tuanvo ngeitu pakhat nih a chim.
“Ralhrang lei a thi mi 15 kan hmuh hna, an hriamnam kan lak i kan chuah lei ah cunglei in vanlawng nih a vun bawmh hna caah kan mah lei in minung 4 an nunnak a liam. Hriamnam zong an mah lei nih an lak than” tiah a cunglei upa nih a chim.
Vanlawng nih a vun bawmh hna ruangah mipi ralkap tangti phu in CDF CDM- Siyin ralkap pakhat, PDF-Zoland in pakhat, Kalay-PDF in pakhat le CDF- KKG B7 in minung pakhat tiin minung 4 an nunnak a liam.
“Kan mah lei nih an vun i chuah pi manh mi cu MA meithal zunkhat, 40mm Bom 30 le kuan 600 tluk an si. Ralhrang lei nih tanglei in bawmhnak an hal nain an tlamtlin lo caah cunglei in a vun bawmh hna caah a tubantuk in thil kan ton hi a si” tiah a cunglei upa nih a chim.
Taingen khua ah SAC ralhrang umhmun khuar mi hna hi palik he fonh ah 40 in 60 kar an um lai tiah ruah a si i a tulio zongah ralhrang pawl cu khur an i cawh mi chung ah an um rih. Hi kahdohnak lio ah cunglei in a bawmtu vanlawng nih voi 6 tiang Bom a thlak hnawh hna.
“Kan i tinh mi cu an sakhan lak hi a si, an sakhan chung tiang kan lut cang ko nain kan kuanfang a dih caah hnu kan pil than, kuan kan i deih lo caah harnak kan tong bik. Kan hawi le nunnak a liam mi ruak zong an sakhan chung ah a si tikah an ruak ka la kho hna lo, an ruak lak dingin khuami hna sin in bawmh kan hal hna, ralhrang lei nih an ruak a rawk hlan ah kan in pek ko hna lai tiin an leh hna” tiah CDF CDM-Siyin tuanvo ngeitu nih cun a chim.
Taingen Khua Kahdohnak Hriamngan In An Bawmh Mi Kalaymyo Khuachung Ah A Tlak Caah Kum 50 Tluk Upa Pakhat A Thi. Chin ramkulh Tedim peng Taingen khua ah kahdohnak a chuak mi cu Kalaymyo ralhrang sakhan in an bawmh nak hna hriamngan cu Taungphila le Kyu-tung-pin sang chungah a tlak caah sangchung mi upa pakhat a nunnak a liam tiah kan theih.
July 11 zinglei suimilam 7 tluk ah Taingen khua ralhrang le mipi ralkap kar kahdohnak a chuak mi cu Kalaymyo khua chung ralhrang sakhan khah-lah-yah 228 le hramngan tlaitu Battalion 365 hna nih pehzulh in hriamngan an kah mi chungin 2 cu Kalaymyo sangchung ah an tla.
“Ralhrang hriamngan kah mi cu Taungphila sang chungah a tlak caah kum 50 tluk nu upa pakhat a thi, a thi mi a tapa pakhat zong a taangah hliamhma a tuar ve caah aa thlop lio a si.” tiah sangchung mi pakhat nih a chim. Kyu-tung-pin sangchung ah a tla mi tu cu minung aa hliam mi an um lo nain sii khan pawngah a tlak caah thilri cheukhat, motor cycle le hriamngan nih inn a peh mi tu cu a um.
Taingen khua kahdoh nak cu Kalaymyo khua chung ralhrang nih zinglei suimilam 6 in zanlei 4 tiangah hriamngan voi 20 in an bawmh hna. Hi kahdohnak ruangah SAC ralhrang a thimi le hliam tuar an tam tiah kan theih. Credit: Lungmili Media