Hakha Khuachung Lamthluan CCTV Vialte an Thlonghter Dih Hna, Micheu Palik Sakhaan ah an Kalpi Hna

Hakha Khuachung Lamthluan CCTV Vialte an Thlonghter Dih Hna, Micheu Palik Sakhaan ah an Kalpi Hna
———
Nihin ah ralkap le palik nih Hakha khuachung lamthluanpi kam ah a ummi chungkhar hna nih an inn ah an benhmi CCTV pawl cu ralkap le palik nih an thlonghter dih hna, tiah kan theih. CCTV thlonghpiak a tongmi minung pakhat nih, “Zei ruang ah dah lam lei hoih in CCTV nan bunh a kan ti. Nanmah lei hoih in bunh u an ti i a kan phonghpiak,” tiah The Chin Journal ah a chim.

Cun, micheukhat cu “Palik le ralkap nih kan CCTV an hrawk lo” timi catlap ah min an thutter hna. The Chin Journal nih kan theih tawk ah nihin ah Hakha lamthluanpi kam ah khuami nih an inn ah an benhmi CCTV a tlawm bik 5 an phonghphiak hna. CCTV bunh ruang ah COTR biakinn pawng ah a ummi Nu Par Hlei Iang le Hakha Market hmai ah a ummi Lian Cin Thuan cu palik sakhaan ah an kalpi hna i, zanlei sml. 5:00 tiang ah an thlah rih hna lo, tiah kan theih.

Hakha ah Ralkap Tuahmi Sianginn Saya/mate Training ah Minung 40 Hrawng an Kai. Hakha khua, Suhpawng zung ah ralkap (SAC) nawlpeknak in tuahmi sianginn cachimtu saya/mate training ah minung 40 hrawng an kai hna, tiah thawng kan theih. March 29 in April 1 tiang Myanmar ram huap in cacawn ning thar (New Curriculum) training nan kai dih lai tiah Ralkap (SAC) nih nawl an chuah caah saya/mate cheukhat training an kai hi a si.

Hakha ah cun Middle School cachimtu saya/mate minung 17 hrawng le High School cachimtu minung 20 hrawng an kai hna.
Asinain, CDM ah aa telmi saya/mate ahohmah an kai hna lo. Hakha BEHS No. 1 ah training tuah ding in an rak timhtuah nain minung an tlawm tuk caah Suhpawng zung tu ah training tuahnak hmunhma an tthial, tiah thawng kan theih.

Relchap, Hakha ah Nu Pakhat Palik nih an Kalpi. Hakha, Sanpiah Boarding School pawng i Nu Par Hlei Iang te innhmai ah an benhmi CCTV cu palik nih nihin an thlonghter hna i, Nu Par Hlei Iang zong palik sakhaan ah biahal ding in an kalpi, tiah kan theih.

Kalay ah Mipi nih Palik 4 an Tlaih Hna. Kalaymyo lamzawhtu pawl nih center ah an hmanmi hmunhma chung ah motor in a rak lutmi palik 4 cu nihin chun ah mipi nih an tlaih hna, tiah theih a si. “Hika lei hin an rak lut i kan lunghrinh hna caah kan tlaih hna. Beer din kan tim an ti.

Asinain, zumh an tlai lo caah kan tlaih hna i, an takpum ah an min le an rank pawl aa ttialmi catlap kan hmuh hna. Thirfung pawl zong an i ken,” tiah khua upa pakhat nih a chim. An tlaihmi hna palik 4 cu Ko Min (ဒုရဲအုပ်), Thein Naing Oo (တပ်ကြပ်ကြီး), Nanda Min (ဒုတပ်ကြပ်) le Phyo Thiha (ရဲတပ်သား) hna hi an si. The Chin Journal