Hakha Khuachung Kahdohnak!
===============
Nihin May 6 zan suimilam 7:08pm ah Hakha khua chungah puahkehnak a chuak. Viewpoint pawng hrawng in meithal thawng a thang. Mi chawkvai maw an kah hna asilole tlerhnak ah meithal an thlahmi a si ti cu hngalh a si lo. View Point inn an saknak zawn in meithal kuan a ceu ko, tiah tualchung mi pakhat nih The Chin Post ah a chim.
SAC ralhrang sin thawngpang petu ah a minthang ngai mi nu Daw Nuai Nuai Soe cu a inn chung ah thah a tong tiah kan theih. Mandalay ramthen, Sot-chun-pauk khua ah a um mi Daw Nuai Nuai Soe cu May 4 zan ah mizei hriamtlai phu ti theih lo mi nih a mah inn chung ah an thah hi a si.
“A tak pum chungah meithal kuan hma he a inn chung ah a thi” tiah sangchung mi nih an chim. Mah pin ah SAC kuttang riantuan mi Mandalay ramthen, Ngan-mia-kyi khua bawi Aung Than Zaw cu May 5 ah lakphak ti dawr in, inn a tin lei ah cycle cung in meizei ti theih lo hriamtlai minung 2 nih an kah caah a thi ve.
“Aung Than Zaw hi SAC nih rianpek mi khuabawi a si i khuachung mi, zeidah an tuah, zei ti dat an cawlcangh timi hlat in ralhrang sin ah thawngpang a pek tawn hna, cu a thil tuah mi ruang ah thah hi a si lai” tiah min langhter duh lo khua mi pakhat nih a chim.
One Championship Middle Weigh ah aa thong mi Aung La NSang le Tuluk pa Fan Rong an i thonghnak ah a round hnihnak ah Aung La NSang nih teinak a hmuh. May 6 Myanmar zing suimilam 6:40 tluk ah America ram Colorado state ah aa thongh hi a si. Tutan aa thonghnak chungah teinak a hmuh ka in bia a chim mi chung ah “Myanmar ram caah thlacam nak in rak kan bawm uh” tiah mipi sin ah a chim hi a si.