Hakha Ah Dalaan Tiah Zumhmi Thahmi Kongah Cheukhat Mipi Hmuhning A Dang Cio!

Hakha Ah Dalaan Tiah Zumhmi Thahmi Kongah Cheukhat Mipi Hmuhning A Dang Cio!
=============
Hakha ah, Dalan tiah zumh mi, Cun Warning pek cang mi an thah caah, a vawivai ngai mi le Dalan cu that hna hlah uh tiah, Fim ngai in a chim mi an um. Dalan ti mi hi, a sullam cu Miphun Leirawi tu, Miphun zuar tu tiah chim khawh si. Mah caah cu bantuk mah Miphun Ralhrang sin ah a zuar langmang mi cu, an Nunnak zuah ding lam cu a um hrimhrim lo.

Zei caah tiahcun, Ral ram kan si cang i, Ralhrang a that cuahmah ding mi Miphun kan si. Kan Ram luatnak kan hmuh khawhnak ding ah Nunnak a thap mi kan si. Cun Mipi Ralkap hna nih hin, kan Mah Laimi chim lo, Kawl Mi hmenh Dalan tiah zumh in, Direct an that in an tlai lo. An ngiat an zoh a fiang cang tiah Upa lungfim nih bia an khiah hnu thah an si.

Dalan zuah ding ti Mi bia kha cu, Ralhrang kut ah um ko sih. Kan Ram hi an mah nih i lak hna seh Sal Miphun ah um ko sih ti mi ruahnak pek bantuk si. Ralhrang le Dalan hi an i khat bak, Lai Mi a si ko nain, Lai mi chung in Dalan a tuan mi Minung cu zuah naisai lo ding.

Nunnak thap in Ral an doh lio ah, heh tiah Miphun rak Leirawi i timh. An cikur hmenh in hmih dih hna lehlam ding. Kha bantuk Dalan le Ralhrang hrial ding le Kian ding tiah ca a Post mi pawl zong Dalan he nan i khat. Nan sen deuh rih lo i si. Ralrin ve nan hau. Ral cu Ral an si, kan thah lo cun kan mah an kan thah ko lai. Kan doh locun kan mah Sal kan taang ko lai.

Dothlennak (Revolution) tuah lioah cun Dalan hi ralhrang bawmtu an si bangin thah cio lengmang an si. CNA/CDF nih policy ah ai chiahmi a si bangin Dalan cu thah bak ding an si. Thih an duh lo ahcun Dalan an si lo awk a si. Va thi hna seh tiin rian a tuan mi dalan cu a nun peng ko ah cun za pi kan thi dih ko lai cu caah kan mah kan thih hlan ah a mah kha fim hma sa a hau ko. Credit; Jasper Lal Lian HC

UK nih Kawlram kong ah UN Security Council meeting a auh; Nihin an tuah lai. Kawlram kong ah UN Security Council ah tuanvo ngei tu UK nih November 5 in khan UN Security Council Meeting tuahding ah a auh i, nihin (8 November) tuah tuah ding in biachahnak an tuah.

Hi lakhruak meeting hi Security zungzal chungtel (Permanent Member) a si mi US ram le caankarlak UN Security chungtel Maxico nih zapi theih khawhnak ding in UN Security meeting tuah an duh nain Tuluk nih a leng mi ngaih lo in “Private Meeting” tu in tuah ding a ti caah anmah chung lawng in Kawlram kong ceihmaihnak an ngei lai.

Atu bantuk in Kawlram kong ah Security Council auhpiak ding ah tuanvo ngeitu UK cozah cu CHRO hruainak Chin zatlang bu nih October 26 ah siseh, Thantlang an kaangh in CHRO nih October 29 ah le CHRO le Progressive hruainak in Kawlram zatlang bu 500 renglo nih November 4 ah Chin ramkulh le Kawlram buainak kong ah lakhruak (emergency meeting) auh ding in thanhca an rak chuah.

Hi kong he pehtlai in CHRO in Salai Za Uk Ling nih, “UN Security Council tuah ding in UK nih lakhruak meeting a van auh caah kan i lawm. Hi auhnak ah aa zuam mi Chin zatlang bu, Kawlram zatlang bu cung zong ah lawmh a um. Zatlang bu nih kan tuah khawh mi cu Security Council auhpiak tiang lawng a si. A phichuak cu phundang a si ko hnga. Atu bantuk in lakhruak meeting an kan auhpiak hi an aw-aan an ngaih le kan kongkau biapi ah an chiahnak a langh caah zatlang bu kan auhnak kan hlawh a tling ko,” tiah The Chinland Post ah a chim.

Aluancia October 25 ah CHRO le British cozah biaruahnak an ngeih lio ah CHRO nih Security Emergency meeting auhpiak ding in an rak chimh kong, British cozah nih November thladongh i caan-hman meeting an ngei tik tu ah Kawlram kong agenda ceihte ding in an i timh kong Salai Za Uk Ling nih a peh chah.

“November thla dih ah UN Security caanhman ton pumnak a um tikah Kawlram kong kan ceih te lai tiah British cozah nih an kan ti. Lakhruak meeting auh cu a fawi lo. Cu lakhruak auh ding ah UK in MP pahnih nih an Parliament ah biahalnak zong an rak tuah. Cu tikah UK cozah nih a biapi taktak mi a um ahcun sml 48 – 72 a hlankan in auhnak nawl kan ngei.

Cu ban tuk thilcang a um ahcun sml a tlawmbik 48 – 72 caan pek in kan thanh te uh tiin British cozah nih an rak kan leh. Atu Thantlang thil kan vun ton i zatlang bu pawl fonh in halnak kan tuah i lakhruak meeting an auh colh tikah mipi le zatlang bu lei in kan tuanvo a tlamtling, kan hlawh a tling ko,” tiah Salai Za Uk Ling nih a chim.

Atu lio UN Security Council chungtel hna cu Permanent Member in US, UK, Frace, China, Russia le kumhnih dan tuanvo pek in Estonia, India, Ireland, Kenya, Mexico, Niger, Norway, Saint Vincent and the Grenadines, Tunisia le Viet Nam hna an si. Credit: The Chinland Post