Hakha ah CDM a Tuahmi Uknak lei Zung Rianttuantu Pawl Quarters in an Thawl Hna

Hakha ah CDM a Tuahmi Uknak lei Zung Rianttuantu Pawl Quarters in an Thawl Hna
———
Hakha khua, Chin ramkulh uknak lei zung ah rian a ttuan i, CDM ah aa telmi pawl cu nihin ah an umnak quarters in an chuak, tiah thawng kan theih. CDM a tuahmi minung 55 cu April 1 ah rian phuahnak ca an pek hna i April 5 hlan ah quarters in chuah dih ding in an fial hna.

Ramkulh uknak zung in CDM a tuahmi hi ahmasa ah cun minung 100 hrawng an rak si i, an bawile nih an tlerh/an lem hna hnu ah CDM pehzul in a tuahmi minung 80 hrawng an taang. Atu minung 55 an phuahmi hna hi CDM ah ahmasa bik ah a rak i telmi pawl an si hna, tiah kan theih.

Tamu Meithat Zung Mipi nih Palik Kut in an Lak. Tamu palik le rakap pawl hmun an khuarnak meithat zung cu April 3 ah Tamu mipi nih an lak i, palik check point pahnih le hlei pakhat zong mei in an khangh.

Relchap, Kalay ah Lamzawhtu Tlaihmi le Ralkap Tlaihmi Minung Thlennak an Tuah. April 3 ah Kalaymyo lamzawhtu hna le Myanmar ralhrang ralkap karlak ah tlaihmi minung thlennak an tuah, tiah thawng kan theih. Mipi lei ttuanvo ngeitu pakhat nih, “Ralkap nih tlaihmi minung kan i thleng hna lai tiah a kan hal zungzal. Zinglei ah minung 2 an rak thlah. Cun, zaanlei ah minung 6 an thlah tthan hna. Nizan zong ah khan minung pakhat an thlah,” tiah a chim.

Ralkap lei nih an tlaihmi minung 9 an thlah hna caah mipi lei zong nih minung 6 nihin ah an thlahpiak ve hna.
Mipi nih an rak tlaihmi hna hi traffic police minung 5, palik 1 le Dalan 1 an si i, cu chung ah cun minung 6 nihin ah an thlah ve hna hi a si. Credit: The Chin Journal