Good News; USA um Khuadang le state dang i a ummi zong referral in bawmh khawh ka si!

Getting to know me
=========
Cungkhat le hawile hna Bawipa dawtnak thawng in Realtor tuan ka thawk ve cang ti thawng thanh pah in ka konglam tete a thei lomi caah sau nawn in ka konglam ka von tial. Zei bantuk minung dah ka si i zei dah ka huammi (passion) a si timi nan ka theih hi thil biapi ah ka ruah caah ka van tialnak si.

Thau khua mi, Pu That Bik (Thleicia) le Pi Khin Sui hna i an fanu ka si. Thantlang ah ka chuak i Biakinn sang ah kum 8 tiang hrawng kan rak um. Ka nu le ka pa a thei mi tampi nih cun cawlehnak (business) tuah mi an si tiin nan theih hna la. Kei hi an mah bantuk in chawleh hi ka huam ngai ve. Thantlang kan um lio ah cun zaan i lamkam ah ei supsap zuar ka rak i thawk. Cu hnu cun Rangon lei ah kan chungkhar in kan i thial. Rangon ah tang 3 in ka rak i thawk.

Kei hi ca lei zong ah aa zuam tiah hmuh mi ka rak si. Ka phak ka ahcun Kawlholh ka rak theih lo tik ah harnak tampi ka rak tong (Laimi tampi cu hmundang ah a thial mi kan tampi caah kan rak harnak i a khat pah theo ko la). Tang 5 ka si i Kawlholh zong duh tawk ka van thiam pin ah hawikom zong tampi ka van neih hna i mah hnu cun sianginn ah thilzuar hi ka rak i thok than. Ka hawi le pawl sin ah mah lio i a laarmi samtemnak (hair clips) le a dangdang tete zuar in ka class chung ah chawlehnak ka rak tuah. Tihnak le ningzahnak ka rak ngei lo. Cun thalcaan (summer) a van phanh in kan inn hmai ah kunya le changreu tete zuar ka duh tiah ka nu le ka pa ka rak hauh hna i dawr fate an rak ka tuah piak. Summer chung paoh ah hin pocket money ka rak kawl lengmang tawn.

Ka cataang a von san deuh cun ca lei ah focus a hauh caah ka rak ngol. Tang 10 hi 2005 ah ka awng i cun 2008 ah Bachelor of Arts (BA) in English ka dih. Myanmar Institute of Theology (MIT) nih an tuah mi BARS program ah business kum 2nak ka kai lio, 2008 ah Malaysia ah ka rak kal ve. Nungak hnu cun ningzah ka von thei cang i ka rak tuah tawnmi thilzuar tibantuk cu ka rak tuah ti lo.

Malaysia ahcun ka u sin ah ka phan. Ka u nih tlawmpal ah US lei a ka kaltak tik ah keimah te in nun ka hau ti ka van i fian tikah pawngkam tete ah hmuh khawh mi rian tete ka rak i kawl i ka rak tuan. Lamhlatnak pi zong ah keimah lawng riantuan ah ka rak kal. Kum cheu hnu hrawng ah Biakinn pa 1 ah kan mah Kawlram mi hngakchia tete ca ka rak chim hna i cu ti cun US ka phanh tiang ka rak tuan.

2010 ah US ka phan i tlawmpal ah warehouse ah rian ka tuan colh. Mi tampi nih cun Lai lei ah rianhrang tuan bal lomi nih a tuan kho te hnga maw an ka ti na in over time hmanh hi a tu le tu ka tuan. My point is I am a very hard working woman. 2011 ah Chan Hnin Thui he chungkhar kan dirh hnu in kei cu rian tuan ka din. Ka pasal hi Pathian rian tuan pah i sianginn a rak kai caah chungkhar ah kei nih le rian tuan lo si tik ah harsatnak tete tampi kan rak tong.

Ka fapa upabik, Bikbik kum 2 hrawng a si in cungkhar khuasaknak caah pa khatkhat cu tuah a hau tiah ka ruah caah ka ningzahnak vialte kaltak in Facebook ah Kawlram lei thil he China lei thil he ka rak zuar (Mah lio hi ka thil a ka bawm tu tete tu tiang kan theih rih ko hna. Nan cung ah ka lawm tuk). Inn lawngte ah um cu a pam ka ti caah kan pa aa manh caan karlak te ah Richland College ah Business lei ka cawng pah.

Stay home mom ka si tik ah TV show tete hi ka zoh tawn i HGTV (inn lei kong) hi ka rak uar tuk. Inn lei kong kau in business tuah ka duhnak hi mah cun aa thawk. Home staging le renovation ti pawl zong hi tuah ka rak huam tuk. Cun Realtor License hi laa ning law ti ka rak duh nain full time mom si pin ah sianginn ka kai pah lio mi he aa laklawh caah ka rak thawk thai lo.

Inn cawk le inn hlan cuai ka thlai tikah inn cawk i hmailei caah a that hi ka theih tuk ko bu ah inn caw kho ding dirhmun kan silo tik ah kan pa hi kan ti khawhmi condo or townhouse tal caw ve usih tiah ka rak ti lengmang. Tlawmpal cu kan zoh pah nain 2015 ah California ah kan pa sianginn kai ah kan i thial caah ka tuah lio mi vialte cu a cheubang (half way) in ka ngol. California ah kum cheu hrawng kan um i cu chung ah income um lo in khuasak awk a that lo caah, “Bawipa zeitin dah kan nun la?” tiin fakpi in thla kan rak cam. Bawipa nih ka thlacamnak a ka leh i inn um pah in tuah khawhmi, US thil kha Kawlram lei ah zuarnak lam a rak ka on piak.

California in Texas lei ah Pathian rian tuan ding in kan rak kir than. Pathian rian le Khrihfabu ah caan tam deuh ka pe i kum 1 hnu ah sianginn maw ka peh la Realtor License dah ka lak la ti hi ka rak i ruat. Cu hnu ah har ngai in sianginn ka kai mi theipar hmuh lo in kaltak cu ka ruah khawh deuh lo caah ka fapa pahnihnak, Vel ka pawi pah in sianginn cu ka peh. Bawipa thawng in Vel thla 3 hrawng a si ah Associate of Art in Business Administration ka dih.

Kan pa hi inn cawk ding ah ka lem lengmang nain zei tin hme kan bill kan i pek la tiin a rak duh bak lo. A ban rawt pah khin inn cu ka rak zoh pi. Cuticun 2017 ah Garland ah inn cu kan rak caw. Inn cawk le hlan cuai thlai tik ah kan mah bantuk tuan chom ei mi ca ahcun inn kan cawk tik ah kan phaisa cu inn hlannak hlo loin kan mah sin ah tlawmpal tal a taang i investment a si caah chungkhat le hawikawm paoh cu inn cawk ka fial zungzal hna. Phaisa ngei deuh mi chungkhat hna cu inn 2nak zong nan cawk lo tiah ka forh hna. Cun single pawl zong hi nan mah nih nan umnak lo zongah inn caw kho ding dirhmun nan si ko ahcun inn caw u tiah ka ti lengmang hna.

Tuan deuh ka chim bang in home renovation hi ka huam tuk tik ah keimah inn tal cu keimah duhning in remh tuah ning ka ti i kan inn cu renovation tlawmpal ka rak tuah. Kei hi a duh ce (picky) ngaimi ka si pin ah phaisa tlawmte in a dawhmi tuah ka duh fawn i inn renovation a kan bawmtu pawl an lu lawng an rak i kheuh ko. (Cu lio i a kan bawm tu pawl Big thanks). 2017 ah Garland lei kan i thial hnu ah kan fanu fangkhat, Zoey hi kan ngeih colh tik ah ka fale caah caan tam deuh hman ka duh. Cu pah cun Rangoon ah dawrte ka tuah pah. 2019 khuasik lei kan von phanh cun tuah ka rak duh peng mi Realtor License laak i 2020 ahcun rian tuan thawk ka duh cang caah Realtor classes ka laak i tlamtling tein ka dih.

Ruah lo piin pandemic nih a kan den. Cu lio ahcun ka fa hniang, Acung hi Bawipa nih a kan pek than caah half way in kaa din than. Fale he buai tuk um lio ah rian tuan hi ka fale zaangfak an si pin ah professional tein rian tuan ka duh caah caan rem ka hngak than. Pandemic ruang le Kawlram ah ka pa zong dam lo ngai in um caah Kawlram lei ka business te zong ka ngol.

Acung a chuah tlawmpal ah extra income te kan herh caah Doordash le Instacart ka tuah pah. Mah ka tuahnak nih cun customer service lei kong ah tampi a ka bawmh. A bik in Instacart cu customer kha dawr kalpiak a si i direct in customer he pehtleihnak kan ngei. Mah ahcun phaisa ka hmuh mi aa khat ko nain a dih paoh ahcun a za ko ti lo in kaarhlei laam (extra mile) in tuah piak kaa zuam peng hna. Siaherhnak tein kan tuan mi an hmuh tik ah lunglawnhnak bia dawhdawh an ka chimh pin ah tip zong a hlei in an ka chap tawn. Mah nih cun customer he good relationship an ka ngeihter pin ah rian tuan thaa zong a nuam.

2022 hin cun kan fale pahnih sianginn an kai cang pin ah a pathumnak zong sianginn kai ding si cang. Ka fahniang te zong kum khat le cheu a si ve cang i tuah ka duh zungzalmi ka passion hi ka tuah hrimhrim ve cang la ka ti i a tu ban tuk in ka von thawknak hi a si. Bawipa nih zeizong vialte hi a mah le a caan tein lam a ka hruai zungzal caah hmailei ka rian tuannak zong Amah nih a ka umpi lai ti ruahchannak tampi ka ngei. Hi ca hi sau lakte din lo bak in ka von tial.

Kan pa nih tamtuk cu tial hau lo, an rel huam la lo a ti natein keimah ka sining nan ka theih i nan ka zumh ding mi hi ka duh caah mah zahzah hi ka von tialnak zong hi si. Kan Laimi le Kawlram mi ca lawng siloin America ah a ummi miphun kip sin zongah rian tuan hi ka saduhthah cu si. A fawinak in, Chin mi zong nih miphung dang sin ah i toe khawh ding khi si. Ka si khawh tawk in kaa zuam ve la. Zeizong vialte Bawipa kut chung ah ka ap.
Why should you hire me?

1. I am a hard working mom. Ka story ah ka langhter bantuk in Real Estate lei hi business tuahmi vialte lak ah ka duhmi, ka passion si caah tampi theih ka zuam ve i thil tampi zong ka hngal ve. Rian tuan aa zuammi ka si pin ah Real Estate lei hi cu ka huam mi si i tampi zong cawn a duh mi ka si.

2. I am honest. Nan caah a tha lo ding mi si cun keimah caah a that paoh cun a za ti silo in nan theihlomi kong ah lungsau tein fianternak tuah le chim ding hi ka rian nganbik zong ah ka chiah.

3. I care. A cunglei ah ka langhter cang bang khan, na caah a thatbiknak in rian kan tuan piak hna la. Inn cawk lai zong ah buyer guide tibantuk tete rel ta loin a caw tawpmi kan tam pi tawn. Inn hi thutdirnak ca sawhsawh si loin hmai lei kan cawva kan i khonnak zong a si caah a lamkip in kan theih hnu ah cawk ahcun i palhmi tete zong an tlawn deuh. Cu caah ka miphun hawi le hna sin ah tam deuh in inn lei kong educate tuah hi kaa tim. (Inn kan cawk, kan zuar tik ah kan theihawk tibantuk le investment lei ah kan tuah khawh mi tete zong ka page ah tial ka van i zuam te la).

Ka page, Ngunza C Thui – Realtor, hi like le share ka bawm ve u law. Hika ahhin theih tha tete tampi hmuhsak khawh zong ka von i zuam te la. https:dot.cardsngunza hi click law ka contact information ah save khawh ka si, a tu herh theng lo zongah hmailei nan ka herh tik ah.

Khuadang le state dang i a ummi zong referral in bawmh khawh ka si. Ka ca a cheu a si ah, rel lo in like pemi nan si ah, lungsaute in a ka rel piakmi nan cungah kaa lawm tuk. (Mi hmurka tam ka si hi ka ca tial in nan von ka theih pah ko la dah ). BikBik nu, April 1, 2022