Good News; Ukraine ram caah thawngpang tha kho taktak!!

Ukraine Ram Caah Advanced Air Defense System Bomhnak Kan Peek Lai Tiah, NATO le A Tangti Phu Hna Nih Fehternak An Tuah!!
===================
Ukraine ram cu Russia nih Dungci hna he fak piin kahdohnak a tuah hnu ah, Ukraine ram cu cung lei ral vennak hriammnam thatha (Advanced air defense system) pawl cu bomhnak kan peek lai, tiah NATO le atangti phu hoikom ram hna nih fethernak an tuah tiah, theih a si.

Britain, Canada, France le Netherland ram hna nih Ukraine cu bomhnak kan i peek lai, tiah biakamnak an ngeih mi hriamnam hna chungh Dungci pawl le Radar system pawl an i tel. American ram zong nih tuan deuh ah khancubantuk thiamthiam in Ukraine ram cu biakamnak a serh ve.

Germany i Advanced Air Defense System pakhat cu Ukraine ram ah a um cang, tiah theih a si. Ram fonh ram 40 in Ukraine a hoikom (tangti) ram 40 hna cu Brussels ah aum mi NATO headquarters ah tonbiaruah ceihmaitinak an ngeih hnu ah Ukarine ram cu bomhnak peek dingin biachahnak an ngei hna i, a tuabantuk in thawngthanh an tuah hi a si.

Ukraine nih cun cu tonbiaruah ceihmainak ah Historical a si, tiah a chim. Tonbiaruahnak an ngeih dih hna hnu, suimilam tlawmpal a rauh hnu , October ni 13 tuan deuh ah Ukraine ram, Mykolaiv khuapi cu Russia nih dungci in a kah, tiah theih a si.

Fa 7 Ngei Hringtu Pa Pakhat Amah Le Mah Hri Awh In A Nunnak Ai La, Mandalay ramṭhen, Meiktila(မိတ္ထီလာ) peng khua pakhat ah October 13, zinglei ah pa pakhat cu amah le mah hri awh in a nunnak ai la tiah Pyitaya(ပြည်သာယာ) mino mi bawmtu phu nih an chim.

Meiktila(မိတ္ထီလာ) peng Htamunekan(ထမုန်ကန်) khuakomh, Ngyuangpinta(ညောင်ပင်သာ) khua ummi kum 50 tluk pa pakhat cu a mah le mah hri awh in a nunnak ai lak caah a thi tiah Pyitaya(ပြည်သာယာ) mino mi bawmtu phu in ṭuanvo ngeitu pakhat nih an chim.

“An inn hmai thingkung ah hri in ai awk, kum 50 hrawng a si lai tiah zumh a si, fa 7 a ngeimi hringtu pa pakhat a si. A fa upabik hi kum 15 hrawnglawng a si rih, a nupi zong a nung dammi a si ko, amah cu midang Caw inn hngaktu a si tiin kan theih” tiah a chim.

Tedim Peng Taingen Khua Mi Nu Pakhat SAC Ralkap Kahmi Kuan Nih A Hliamh, Chin ramkulh, Tedim peng Kalay-Tedim motor lampi ah ummi Taingen khua ah nihin, October 13 zinglei ah SAC ralkap check gate ah ummi ralkap hna cu CDF-Siyin nih bomb puahhnawh in an doh hna caah kaphnih kar kahdohnak a chuak. Kaphnih i kahdohnak ah SAC ralkap kahmi kuan nih kum 16 nu ngakchia pakhat a khen i a hliamh tiah tualchung mi nih an chim.

Kuan hliamhma a tuartu cu Taingen khuami a si i, SAC check gate pawng inn ah a umlio ah a keh lei ban ah kuan nih a hliamh hi a si tiah tualchung mi nih an chim Nihin Tedim peng i kahdohnak ah SAC ralkap lei in minung 5 an thi tiah CDF-Siyin nih an chim na in RFA nih cun fehternak kan tuah kho rihlo tiah an langhter.

Kalay-Tedim lampi ah ummi Taingen khua ah SAC ralkap nih a luancia thla 9 hrawng in check gate an rak tuah i, khualtlawng umkal mi poh checknak an tuah hna tiah tualchung mi nih an chim.

Paletwa Peng Education Board Hruainak In Siangakchia Ca An Cawng Kho Cang, Paletwa peng Education Board hruainak in Paletwa peng siangakchia hna cu, sianginn an kai kho cang nain cacawnnak caah a herhmi thilri tu cu chambaunak tampi a um rih, tiah theih a si.

“Harnak tampi lak ah sianginn cachimtu saya/mah nan cungah Paletwa Education Board nih lunglawmhnak nganpi kan ngei. Siangakchia hna nih ca cawnnak thilri an herh baumi lawng siloin sianginn cachimtu saya/mah te zong an chanbau rih, cucaah bawmhnak tampi kan herh ko, tiah Paletwa Education Board nih an mah social media ah an langhter.

Tedim, Lah-Wah-Kah Zung Le Penguk (GAD) Zung A Kangh Hnuin, SAC Nih Hriamngan le Hriamhme An Kah Caah Monica Niang Lian Vung A Nunnak A Liam! Chin ramkulh, Tedim khua Lah-Wah-Kah zung le Penguk (GAD) zung a kangh hnu, October 11 zaan ah, SAC nih an duhnak hmun paoh ah hriamngan le hriamhme an kah caah, fa pali a ngeimi Monica Niang Lian Vung (31) a nunnak a liam tiah theih a si.

Mintheih lomi hriamtlaiphu nih zung an khangh hnuin, Tedim hrambunh SAC sakhaan le no.1 Siangsangrun ah a ummi SAC ralkap hna nih hriamngan he hriamhme he an duhnak hmun paoh an kah mi chungin pakhat cu Tedim-Lailu khua kar inn ah a tlak caah, fa 4 ngeimi, Monica Niang Lian Vung(31) a nunnak a liam hi a si.

A ho ti theih lomi hriamtlaiphu nih Lah-Wah-Kah zung a hngak tu pahnih cu tawh an hal hna hnu ah inn cu an khangh.
Cu hriamtlaiphu hna cu kawl holh tha tein a thiammi an si i, Tedim peng chung hriamtlaiphu cu an si kho hrim lo tiah khuami cheukhat nih cun an zumh.

Cu inn kanghnak kong he pehtlaiin, Tedim peng chung hriam a tlaimi PDF-Zoland nih anmah an si lo nak kong fianternak an tuah pinah, mipi hna thinphang in a tuahtu hriamtlaiphu hna cu, hlathlainak kan tuah cuahmah lio hna a si tiah PDF-Zoland nih an langhter chih.

India-Myanmar Ramri Rihkhuaar Khua Leng Ah Pa Pakhat A Ruak In An Hmuh!! Chin ramkulh, India-Myanmar ramri Rihkhuadar khualeng ah October 11 ni ah pa pakhat ruak an hmuh i an hlawm tiah theih a si. A thimi cu, Aung Htay Min(27) a si tiah theih a si i, Rihkhuadar no. 2 sang, Tio tiva in Haimual khua lei kalnak lam, thlacamnak tlang ah a ruak cu kan hmuh tiah khuami hna nih an chim.

Cu miruak ah cun, hliamhma zong a um pah caah, mi pakhat khat nih an thahmi zong a si kho men tiah khuami pakhat nih a chim. A thimi Aung Htay Min hi, Rihkhuadar no.2 sang Tio tiva ah khua a sami a si i a nupi he fanu pakhat an ngei tiah theih a si. Crd-The Chin Post