Tuluk Ram In SAC Ralhrang Caah Hriamthil Phurtu Motor Aa Leh Caah SAC Ralhrang 2 An Thi
=========
Shan ramkulh chaklei Thein-ni khuapi pawng ah Tuluk ram in Myanmar ram ah a lutmi SAC ralhrang hriamthil pawl phurtu motor ke 12 ngei cu aa leh caah SAC ralhrang 2 an thi, tiah tualchung mipi hna sin in theih asi.
June 18, nihin ah aa leh hi asi i, motor a khaltu mipi bantuk in aa umtermi SAC ralhrang 2 hna cu motor lu nih a ceh hna caah an thi, tiah kan theih.”Theinni (သိန်းနီ) khuapi pawng ah motor 12 ngei aa let caah a khaltu bantuk in aa umtermi SAC ralhrang 2 motor lu nih a reh chih hna caah an thi. SAC ralhrang pawl caah hriamthil pawl a phurtu motor a si. Tuluk ram in a rak lutmi a si” tiah min langhter a duh lo mi mipi pakhat nih Khit Thit ah a chim.
Motor lehnak a chuah lio ah cu hlan bantuk in tualchung chiatṭhat zohkhenh tu phu an ko-au hna lo. Sii-inn motor le meithattu motor hna in an laak hna i, motor a khaltu pawl cu SAC ralhrang pawl an si, tiah tualchung mipi hna nih an chim.
“Cu hlan ahcun atu bantuk thil a cansual tik ah tualchung mipi bawmchantu (Chiatṭhat bawmchantu) phu kawh-auh in Line ah langhter an si tawn nain atu cu sii-inn motor le meithat motor pawl in an phurh hna” tiah tualchungmi pakhat nih a chim.
June 17 zong ah 12 ngei motor 15 in SAC ralhrang nih No.16 SAC ralhrang (ke ralkap) pawl umnak Battalion hmun chung ah an lut hna i, hriamthil pawl an phurh lai, tiah zumh asi. Motor pawl cu mipi hna motor an si, tiah tualchung mipi nih an chim chih. Crd; Lungmili Post