Van Ral Khamnak Hriamnam Zun Hnih Kan Sin A Phan Cang Tiah KNDF Nih An Thanh
==============
SAC ralkap vanlawng kah khawhnak point 5 hriamngan zun hnih cu kan sin a phan cang, tiah KNDF Brigade 1 in ṭuanvo ngeitu pakhat nih a chim. “Hriamnam cawknak ah sui ngun chawva a pechantu nan dihlak kan in philh hna lo. Vanlawng kahnak hriam hi kan ramkulh luatnak, Myanmar ram luatnak le hramhram uknak tang in kan luat khawh nak ding ah kan hman lai,” tiah ṭuanvonngeitu nih cun a chim.
https://www.facebook.com/photo/?fbid=628748905942902&set=a.345631344254661&__cft__[0]=AZUnzNi63nNwJ1JtM3K4hnt_in5zBpSOA9zq6PcGcJNY2HlkWZSiSPVKxDVpg76F7UI4aZ-7eAa_7Wul8pkyPzNQjZvhduoZdf_5LG0C5tM9LjXHdj0xHNfLbtIGlaPLTF_w6r0FcvMgHIE92Un9qaMfzGz9lRh7bS7tQJsNH5jbKMSb06adv6cfyUkhf8K9yeM&__tn__=EH-R
Atu lio hi Karenni ramkulh, Pekhon le Pinlaung peng kar um Taungsalun khua ah kahdohnak a zual ngaingai, tiah KNDF ṭuanvo ngeitu nih cun a chim chap. Cu bantukin Pekhone khuapi nitlaklei Loihoi le Loilone lei ah rallam a sialmi, Hkawngi(ခေါင်းအိ) le Settaw lei rallam a sialmi le Latoe lei ah rallam a sialmi SAC ralkap pawl cu Karenni ralkap hna nih an kah cuahmah hna, tiah theih a si.
A luancia May thla chung ah SAC ralkap nih vanlawng in kahdohnak voi 100 tluk a tuah i, nawlngeihnak an laak hnu ah vanlawng in kahdohnak an tuah tam bik tan a si. SAC nih nawlngeihnak an laak hnu in Karenni ramkulh chungah vanlawng in kahdohnak voi 463 an tuah cang, tiah Progressive Karenni People Force(PKPF) nih an thanh. Shan ramkulh, Mabein peng ah kahdohnak a chuak i SAC ralhrang nih jet vanlawng in bomb a thlak, tiah tualchungmi hna nih an chim.
Tuzing, June 6 zing ah Mabein peng, Pyachaung khuapawng ah SAC ralhrang le Kachin ralkap KIA PDF ṭangṭi phufonh karlak ah kahdohnak a chuak i zinglei suimilam 11:00 tluk ah SAC ralhrang nih jet vanlawng in bomb a thlak, atu zong pehtlai in kahdohnak a chuak, tiah theih a si. ” Pyachaung khua pawng um Tuluk banhla cinnak dum No.1 le No.6 hna cu SAC ralhrang nih raltuknak vanlawng in bomb a thlak.
A luancia June 1 in mahka lei hmun ah hin SAC ralhrang nih rallam an rak sial cang i tuzing ah kahdohnak a chuah hi a si, a rawkmi le a thimi kong ah thawngfiang kan thei kho rih lo” tiah min langhter a duh lomi tualchungmi pakhat nih Khit Thit ah a chim. Sagaing ramṭhen, Kalaymyo peng, Shuhkintha (Phulmawi) khua um sianginn pakhat SAC ralhrang nih helicopter in a kah caah mipi 1 a nunnak liam i, 3 nih hliamhma an tuar, tiah CNO Upper Chindwin Refion- UCR in ṭuanvo ngeitu pakhat nih a chim.
Nihin June 5, zinglei suimilam 10:30 tluk ah Kalay peng, Letchaung-Yarzagyo lampi um Shuhkintha khua le sianginn cu SAC ralhrang nih helicopter pakhat in minute 5 tluk chung a kah caah mipi pakhat a nunnak liam i, 4 nih hliamhma an tuar hi a si. “Kalaymyo in a kaimi helicopter a si lai, minute 5 lawng a kah caan hi a rau i, cu hnu ah a kir colh. Kahdohnak zong a um lo, sianginn ah tonpumhnak an ngei ti a theih caah a rak kah hi a si, hriamngan zong in an kah hna, a rawkmi kong ah thawngfiang kan thei dih rih lo” tiah a cunglei upa nih a chim. Cu pinah chun suimilam 11:37 tluk ah Kalaymyo khuapi chung umhmun a khuarmi SAC ralhrang nih hriamngan voi khat an kah ṭhan caah mipi hna kan i ralrin a herh, tiah CNO Upper Chindwin Refion- UCR nih ralrin peknak an tuahchih.