Breaking News:
SAC Ralhrang Ralbawi Tel In Mipi Sinah An Lut
=============
Karenni ramkulh, Meseh Sakhaan ah SAC Ralhrang 100 hrawng an umnak Kha-ma-ya 430 battalion nih hriamnam an chiat in mipi ralkap sinah an lut, hruaitu bik Zaw Nang Aung Le Major Kyaw Thu Soe hna zong an i tel ve tiah dohthlenhnak a tuah lio mi mipi ralkap nih thawngzamnak an tuah.
SAC ralhrang pawl hi an mah pum lawng si loin hriamnam tling he mipi ralkap sinah an luh. Ram chung dohthlenhnak thawngzamtuk bu pakhat asi mi nih an langhter hi asi. Hi Mipi ralkap ah a lut mi SAC ralhrang hna i security le ei ding hna zong tha tein zohkhenhnak an tuah piak ko hna tiah theih asi. Crd: Khit Thit Media
Sagaing Peng Ah PDF Sakhan Cu SAC Ralkap Nih An Luhhnawh I PDF 12 Nunnak Liam; Sagaing ramṭhen, Sagaing peng, Kintaw khua pawng PDF sakhan pakhat cu SAC ralkap nih nihin June 25, zinglei ah luhhnawh in an kah i, PDF 12 nunnak a liam tiah tualchung mi nih Khit Thit Media ah an chim.
Nihin, zinglei suimilam 4:50 ah Kintaw khua telh in khua 7 ah SAC ralkap nih hriamngan an kah hnu ah an luhhnawh hna. Kintaw khua pawng ummi PDF sakhan pakhat cu SAC ralkap nih an luhhnawh i PDF zeimawzat cu an tlaih hna hnu ah an thah hna, tiah Khit Thit Media nih a ṭial.
“Kaphnih kar kahdohnak a um lo nain, SAC ralkap nih hriamngan an thlah hnu ah khuachung cu an luhhnawh. PDF an tlaih mi hna cu an lu ah meithal hmuahchih in an kah hna, hriamnam zong zeimawzat an laak. PDF umnak sakhan hi fiang tein an theih caah a thli tein an luhhnawh,” tiah tualchung mi pakhat nih a chim. PDF sakhan luhhnawh an tonnak kong he pehtkai in dohthlennak tuahtu phu cheukhat zong nih bia dik a si ko an ti nain, PDF phu min hi media nih an fehter kho rih lo. Crd:The Chin Post