Good News: Ralhrang kuttang hriamtlai phu minung tam ngai mipi ralkap sinah an i fonh cang!

Yeepyar Khua Pyusawhti 27 Mipi Ralkap Sinah An I Fonh!
=========
Magway ramṭhen Pauk peng Yeepyar khua in pyusawhti minung 27 cu SAC chuahtak in mipi ralkap sinah an i fonh tiah October ni 9 ah Myaing tualchung hriamtlaiphu nih cathanh an chuah. October ni 8 ah Yeepyar khua in pyudawhti minung pa 15, nu 12 cu SAC ralkap chuahtak in tualchung hriamtlaiphu sinah an i fonh tiah theih a si.

Mipi ralkap sin ai fonhmi pyusawhti pawl cu rahrial in a um mi hna nih eidin hrukeih an pek hna, an ngandamnak an zohkhenh hna pinah an simcard an lak i anmah sim in an chung le an chawnhter hna hnuah kal an duhnak hmunah an chiah hna tiah theih a si.

October ni 2 Yeepyar khua pyusawhti sakhan an rak kahlio i an tlaihmi pyusawhti 53 zong biakamnak minsen thut dih hnuah an thlah ṭhan hna tiah theih a si.

Watlet le Taze Ah Tualchung Hriamtlai Phu Chungtel 15 Nak Tlawmlo An Nunnak A Liam. Sagaing ramṭhen, Shwebo pengkomh Watlet peng le Taze peng ah SAC ralkap nih van leiin kahdohnak an tuah caah kaphnih kar kahdohnak a chuak. Cu kahdohnak ah cun SAC ralkap leiin 15 nak tlawmlo an nunnak a liam tiah theih a si.

October 8 ah, SAC ralkap nih Watlet nichuahlei Hpayarlaykone (ဘုရားလေးကုန်း) khua pawnghrawng ah van le in an rak kah hna caah tualchung hriamtlai phu minung 8 nunnak a liam tiah tualchung mi nih an chim.

“Tualchung hriamtlai phu chungtel minung 8 ruak hmuh a si, ral tuknak vanlawng 2 he bomb an thlak, cun MI 35 hmangin an kahchap, cu hnu ah helicopter 2 nih ralkap a ṭhumh hna, a thimi midang zong umkhawh rih a si” tiah tualchung mi pakhat nih a chim.

Chunhnu suimilam 12:30 hrawngah Shwebo pengkomh, Taze peng ah SAC ralkap le tualchung hriamtlai phu kar kahdohnak a chuak i, tualchung hriamtlai phu leiin minung 7 an nunnak a liam tiah MDF-Hydra Force nih cathanh an chuah. SAC ralkap nih hriamngan phunphun hmang in khuachung ah pehtlai in an kah hna caah khuami cu a himnak hmun ah ṭhial an si tiah MDF- Hydra Force nih an thanh.

Buthitaung Le Myinpia Kahdohnak Ah SAC Ralkap 35 An Thi, AA Lei In A Nunnak A liammi An Um Ve! Rakhine ramkulh Buthitaung(ဘူးသီးတောင်) le Myinpia(မင်းပြား) kahdohnak ah SAC ralkap 35 an thi, tiah AA nih cathanh an chuah. October 3 zaanlei sml 1:30 ah Buthitaung peng Kyauk Sa Taing(ကျောက်စာတိုင်) khua thlanglei ah SAC ralkap le AA cu sml 5 chung an i kap i SAC ralkap 17 an thi, 15 hliamhma an pu.

Meithal, zen-kuan le an thilri cheukhat zong AA nih an lakpiak hna, tiah theih a si. October 5 le 6 Buthitaung peng kahdohnak ah SAC ralkap 10 an thi i, 10 hrawng hliamhma an pu, tiah kahdohnak ah aa telmi AA ralkap nih an chim. Cun October 7 chun sml 12:22 ah Myinpia peng Kyat Sin(ကြပ်စင်) hlei pawng umhmun khuarmi SAC ralkap pawl cu AA nih an kah hna caah SAC ralkap 8 an thah hna.

SAC ralkap nih hriamngan voi 25 an kah caah tualchung mi 6 hliamhma an pu. October thla zarhkhatnak ah kahdohnak ngan(Major) voi 10 leng le kahdohnak hme(minor) voi 10 leng a chuak i, SAC ralkap 35 an thi, 25 nak tlawm lo hliamhma an pu. AA zong a thimi le hliamhma pumi an um, tiah theih a si.

Pauk Peng Ah Rallam A Sialmi SAC Ralkap Cu PDF Nih An Kah Hna Caah 7 An Thi. Magway ramṭhen, Pauk peng thlanglei ah rallam a sialmi SAC ralkap pawl cu nizaan October 7 zing sml 8:30 hrawngah kah an tong, tiah theih a si. Thit Ngi Naung(သစ်ညီနောင်) khua pawngah SAC ralkap 300 hrawng cu lam hruang in kan bawh hna i, kan kah hna, tiah People’s Defence Force – Yenangyaung in ṭuanvo ngeitu nih a chim.

PDF ralkap hna nih bomb in an puahhnawh hna lawng si loin hriamngan in an kah hna caah SAC ralkap 7 hrawng an thi lai, tiah bawino San Shia nih a chim. Cu kahdohnak ah People’s Defence Force − Yenangyaung, Pakokku pengkomh 12 Battalion, le YRF Battalion hna i bawm in an kah hna. PDF lei a thimi le aa hliammi an um lo, tiah theih a si.

Monywa-Yargyi Toll Gate Pawngah SAC Ralkap Bomb Puahhnawh An Ton Ruangah 10 Hrawng An Thi. Sagaing ramṭhen Yinmarbin peng Monywa-Yargyi(ယာကြီး) lam meng 5 toll gate pawngah SAC ralkap motor cu PDF nih, nizaan October 7 zinglei sml 5 in 8 kar ah bomb lung 3 in an puahhnawh hna caah SAC ralkap 10 hrawng an thi kho i 15 hrawng hliamhma an pu lai, tiah theih a si.

“Motor lam cu ṭha tein kan cawh hnuah thir zum tampi le bomb lung 5 ṭem chihmi kan phum hna. SAC ralkap motor cu bomb kan phumnak an phanh ah kan puahhnawh hna i, ralkap 10 in cunglei an thi lai. Bawmtu ralkap an auh hna i, an rak phanh hlan lo hriamngan in an kan kah,” tiah Chu Mai Mai thawngpang fiangternak phu nih an langhter.

SAC ralkap skat motor le i khamnak motor pakhat cu Aung Zeyar tlangpar in Banbuai khua lei an kal lioah PDF nih bomb in an puahhnawh hna hi a si. SAC nih nawlngeihnak an lak hnu in SAC ralkap pawl cu Banbuai khua ah umhmun an khuarnak kum khat tluk a si cang. Banbuai khuami ralhrial 1,000 leng cu eidin tirawl an har ngaingai, tiah theih a si.

Dawei Ah Rallam A Sialmi SAC Ralkap Kah An Ton Caah Pathum An Thi. Tannintharyi ramṭhen, Dawei peng Wakone(ဝကုန်း) khua pawng Dawei-Htikhi lam cungah rallam a sialmi SAC ralkap hna cu kan kah hna i ralkap 3 an thi, tiah Dawei PDF nih an langhter.

A luancia October 6 zaanlei sml 1:30 hrawngah Myatta(မေတ္တာ) lei kap in Dawei lei ah ke le motor in rallam a sialmi SAC ralkap pawl cu Kawthu Lay Army Companny 3 le PDF hna nih an kah hna i kaphnih kar kahdohnak hi mins 10 hrawng a rau tiah theih a si.

Rallam a sialmi SAC ralkap cu kah an ton caah hriamngan, hriamhme le seh meithal in PDF cu an kah kah ko nain PDF ṭangṭi phu lei in a thimi le aa hliammi um loin hnu kan kir kho, tiah PDF ṭuanvo ngeitu pakhat nih a chim. Credit: The Chin Post