Good News; Nihin thawngpang kan theih mi vialte lak ah thawngpang tha bik!!

Nihin Thawngpang Kan Theih Mi Chungin Thawngpang Tha Fonh, Thinlung A Hmui Ko Hih!!
=============================
Palik sakhan-hmu nih zulhmi motor kah an tong, minung 3 an thih leng ah an hriamthil an lakkhawh, Mon ramkulh, Yee pawng Khawza(ခေါဇာ) palik sakhan-hmu nih zulhmi motor cu nihin September 30 zinglei ah kahdoh an tong, palik sakhan-hmu telhin minung 3 an thih pinah an hriamthil zong kan lak khawh tiah Yebilu hruaitu pakhat nih a chim.

September 30, zinglei suimilam 10:00 luan ah Khawza(ခေါဇာ) in Yee lei a kalmi palik motor cu kan kahdoh hna tiah a chim. ” Khawza(ခေါဇာ) in Yee lei a kalmi palik motor cu kan bawh i kan kah, meithal 3 kan lak khawh, cu chungah palik sakhan-hmu nih aa tlaihmi a tawimi pakhat aa tel,

cun kuan zeimawzat zong kan lak, motor chung cuangmi an pathum ningin kan fimhlawm hna” tiah Yebilu phu hruaitu nih a chim. Yebilu phu hna nih Yee pengchung um SAC ralkap kuttang rianṭuantu khuabawi hna le Non-CDM hna nih a rannak in rian ngol dingah ralrinnak an pek hna.

Timit Kahdohnak Ah SAC Ralkap Pahnih An Thi!, Nizaan September 29, Chin ralkap le SAC ralkap Timit kahdohnak ah SAC Ralkap lei in minung pahnih an thi tiah, theih a si. “Nizaan ah kahdohnak lian si lo in a kahdohnak a fa a chuak i Chin ralkap hna nih SAC ralkap minung pahnih an thah hna tiah,

” CNA/F chim phuannak nawlngeitu Salai Htet Ni nih The Chin Post ah a chim. Cu kahdohnak ah Chin ralkap lei in a hliammi le a thimi an um lo, Kan hnu thlakhat chung Timit kahdohnak ah Chin ralkap hna nih SAC ralkap minung 50 renglo an rak thah hna.

Nikhat chung ah AA le SAC ralkap kar kahdohnak voithum a chuak SAC ralkap 12 an thi! Nizaan September 29 nikhat chung ah, Rakhine ramkulh Punnakyun(ပုဏ္ဏားကျွန်း) peng le Yatetaung(ရသေ့တောင်) peng chung ah AA le SAC ralkap kar kahdohnak voithum a chuak i, cu kahdohnak ah cun SAC ralkap 12 an thi tiah AA nih an thanh.

Yangon-Sittwe motor lam, Punnakyun le Kyauktaw ramri Baukdaw(ဗုဒ္ဓေါ) khua pawngah, rawlchan dingin a kalmi SAC ralkap hna cu AA nih lam hruang in an kahdoh hna i, SAC ralkap 2 an thi 5 hliam an tuar tiah theih a si.

Cun, Myauk Oo (မြောက်ဦး) peng, Natan(နားတန်) le Maungshwe(မောင်းဆွဲ) khua kar ah SAC ralkap cu bomb kan puahhnawh hna i SAC ralkap 10 an thi i, SAC lei cu hnu an tolh than tiah AA in chimphuannak nawl ngeitu U Khine Thu Kha nih a chim.

Pale Khua Penguk Zung Cu PDF Ṭangṭi Phu Nih An Kah Caah Ralkap 2 An Thi, 4 Hliamhma An Pu, Sagaing ramṭhen, Yinmarbin pengkomh Pale khua um penguk zungah umhmun khuarmi SAC ralkap 60 hrawng cu, kan kah hna caah SAC ralkap 2 an thi, 4 hliamhma an pu, tiah Southern YSO PDF nih an thanh.

September 28 zaan sml 11:00 hrawngah hriamngan le hriamhme he pehtlai in kan kah hna, tiah Southern YSO PDF in ṭuanvo ngeitu Bawino Ayr Thaung(အေးသောင်း) nih a chim. “Penguk zung velchum in hriamngan, hriamhme le Auto meithal in sml pakhat le cheu chung hrawng kan kah hna. Auto meithal tlaitu PDF ralkap 3 nih hehchet tiin an kah hna hnuah hnu kan kir,” tiah a chim chap.

“Meithal in thlanglei he chaklei he kan kah hna lioah annih lei cu dai tein an um, an kan kap ngam lo. Thlanglei in hriamngan 80mm zun 8 in kan kah hna caah SAC ralkap 2 an thi, 4 hliamhma an pu. Penguk zung chungah ralkap pawl cu an um rih ko,” tiah Pale Battalion 4 No. 10 Peacock Black in Bawino Chit Nge nih a chim. Cu kahdohnak ah Southern YSO PDF le ṭangṭi phu Pale Battalion 4 No.10 Peacock Black phu hna i bawm in an kah hna, tiah theih a si.

Ngaung U Peng In Mandalay Ramṭhen USDP Party MP Hlun Kahthah A Tong, Mandalay ramṭhen, Nyaung U peng in Mandalay ramṭhen MP hmun ah aa zuammi Aung Min Hteik cu, nizaan September 29 ah kan kahthah, tiah Pakanpyi Bilu(ပုဂံပြည်ဘီလူး) PDF in ṭuanvo ngeitu nih a chim. USDP party MP hlun Aung Min Hteik cu nizaan September 29 zing sml 7:40 ah Bilu PDF le ṭangṭi phu hna nih meithal zun 4 in an kah caah a hmun ah a thi colh, tiah theih a si.

Aung Min Htiek cu a luancia kum 2020 rampi thimnak lioah Ngaung U peng mee hmun No.1 in Mandalay ramṭhen MP hmunhma ah aa zuammi a si i a rak sung. Aung Min Hteik cu SAC ralkap he rianṭuanṭi an si i, khuami hna cu hranhram in an tlaih hna. SAC ralkap caah tangka a kawlpiak hna i khuami hna cu a phunphun in harnak a pek hna caah kan thahnak a si, tiah Pakanpyi Bilu PDF in ṭuanvo ngeitu nih cun a chim.

PDF-Tamu battalion 1 nih a voi 6 nak raltuk cawnnak tlamtling tein an dih, Sagaing ramṭhen, Tamu peng ah a voi 6 nak raltuk cawnnak cu September 28 ah tamtling tein an dih tiah PDF-Tamu battalion 1 sin in thawng theih a si.
Cu cawnnak dihnak puai ah Hluttaw palai pawl, EROs pawl, PDF phu pawl le sawm a simi khual pawl an kai kho tiah theih a si.

Sniper kut in SAC ralkap 1 a thi tiah Cobra Column nih a thanh, KNU battalion 6 hmunhma Myawaddy-Wawlay lam Taungni khua ah hmunhma a khuarmi SAC ralkap cu September 29 ah an kah hna i SAC ralkap 1 a thi tiah Cobra Column nih a thanh.September 29 ah Taungni khua pawng ah a ummi LIB 104 cu KNLA battalion 27 le Brigade ṭhen 2 kuttang Sniper phu nih an kah hna hi a si.

Cu kahdohnak ah SAC ralkap 1 a thi i phufonh lei him tein an kir kho tiah theih a si. Cuka hmunhma kahdohnak pawl ah phufonh nih hriamngan, Drone, Sniper hna hmang in kahdohnak an tuah i September 20 tiang kahdohnak ah SAC ralkap 20 an thi tiah Cobra Column nih a thanh.

Mindat khua ah kahdohnak a chuak, SAC ralkap a thimi an um, Chin ramkulh, Mindat khua September 29 zinglei ah kahdohnak a chuak i SAC ralkap a thi mi an um tiah Mindat khuami sin in thawng theih a si.Mindat khuachung kahdohnak dirhmun a langhter lengmang mi pakhat nih September 29 zinglei ah CDF-Mindat le SAC ralkap karlak ah kahdohnak a chuak tiah amah Facebook cahmai ah a tar.

“Mindat khua Traditional Hospital pawng ah SAC ralkap pawl an um. September 29 zinglei ah CDF-Mindat le SAC ralkap karlak ah kahdohnak a chuak, SAC ralkap pakhat a thal, kahdohnak thawng cu a dai cang” tiah a ṭial. A luancia September 22 zong ah CDF-Mindat nih nikhat chungah Mindat khuachung hmun 5 ah kahdohnak an tuah i SAC ralkap a thi mi an rak um.

PDF- Kakay Battalion 12 nih ti in mei an lak khawh, Sagaing ramthen, Kalay peng PDF – Kalay battalion 12 in fimthiami pawl an i bawm i tiva in mei an lak khawh tiah theih a si. “Mipi pawl an kan bawmhnak hmaikhah an si lo caah tangka tlo deuh seh tiah kan i zuam mi a si.

Battalion Commander hruainak in kan tuah mi a si. Sing 4 hrawng kan dih” tiah PDF- Kalay battalion 12 biachimnak nawl a ngeitu nih Mizzima ah a chim. PDF-Kalay battalion 12 nih ti in mei laknak cu September 21 ah tuah hram an thok i September 27 ah an hman khawh tiah theih a si. Crd-The Chin Post