Magway PDF Battalion-5 Sinah NUG Nih Meithal A Pek Hna
==========
NUG runvennak zung nih Magway PDF Battalion-5 sinah June 23 ah meithal a pek hna, tiah theih a si. NUG runvennak zung, Magway ramṭhen uknak zung nih raltuk cawnnak le meithal pekchanhnak an ngeih i Magway PDF Battalion-5 zong NUG nih hin meithal 5 an pek ve hna.
Meithal pekchanhnak an tuahmi ah Magway ramṭhen uktu zung in ṭuanvo ngeitu hna, Battalion Commander hna, Deputy Battalion Commander hna an kai kho, tiah Magway PDF in ṭuanvo ngeitu nih a chim.
NUG runvennak zung kuttang Magway PDF nih kum khat chung raltuknak kong an suaisam i, a tak in an ṭuanchuah. Cucaah hriamnam pekchanhnak le bawmhnak zong pehtlai in tuah kan i zuam lai, tiah NUG runvennak zung nih an langhter.
South Dagon Peng Ah Inn 130 Leng Cu Thla Khat Chung Ah I Ṭhial Ding In SAC Nih An Ti Hna! Yangon ramṭhen, Dagon peng, Dagon khuathar thlanglei 56 le 70 sang um inn 130 leng cu SAC ralkap nih thla khat chung ah i ṭhial dih ding in June 23 ah ca an pek hna, tiah tualchung mi nih Khit Thit Media ah an chim.
Cuka sang a ummi hna cu sipin committee hmun a si caah i ṭhial ding in an ti hna. Cuka sang a ummi hna cu NLD chan lio ah Smart Card aa tlaihmi an si i inn an saknak hmun hna zong hi sipin committe hmun si loin lei rian ṭuantu hna hmun lawngte an si, tiah theih a si.
“Fur caan lio i an kan ṭhialtermi hi thi ko hna seh an kan ti bantuk a si. Inn 130 leng chung ah milu in 700 leng kan um. I Ṭhial ding in an kan chimhtu hi SAC ralkap, palik, sipin le sangbawi chungtel an si hna. Thla khat chung ah i ṭhial dih ding in an kan ti i a nithla a tlin hlan ah ṭhial dih ding in an kan ti.
Kan i ṭhial ahcun khoika dah kan va um lai, ṭuanchom eichom in a ummi kan si caah umnak ding zong kan ngei lo. Hika sang kan umnak hi kum 10 tluk a si cang,” tiah sangmi pakhat nih a chim. Crd; The Chin Post