Matupi Hmunhma Ah A Rak Lut Mi AA Ralkap He Pehtlai In Thinphan Awk A Um Lo!
=========
Chin ramkulh, Matupi peng le ramri hna ah AA ralkap pawl umkalnak an tuah mi kong he pehtlai in khuami hna thinphan ding a si lo nak kong le kaphnih karlak theihthiamnak he umkalnak an tuah mi a si tiah CDF-Matupi biachimnak nawl a ngeitu nih Ayeyarwaddy Times ah a chim.
CDF-Matupi nih kahdohnak he pehtlai in lam a phih a si ahcun AA ralkap pawl zong nih kan zulhpiak ve uh tiah an chimh hna i AA lei nih atu bantuk in umkalnak an tuah mi hi adang zeibantuk ruahchannak hmanh a um lo tiah a chim. CDF-Matupi nih kahdohnak he pehtlai in anmah hriam te hmang in an dir, zei bantuk midang phu hmanh he hawikomhnak caah minthut mi a um lo tiah theih a si.
“Kahdohnak he pehtlai i bawm ding in a hlan ahcun biaruahnak a rak um ko. Sihmanhsehlaw atutiang ahcun zei bantuk phu hmanh he i bawmhnak a um rih lo. Hmailei ah zei kan lawh lai cu chim khawh a si lo nain adang phu he kan i bawmh ahcun kahdohnak dirhmun lawng siloin ramkhel lei zong zoh chih a herh caah atutiang cu kanmah tein kan dir rih ko” tiah CDF-Matupi biachimnak nawl a ngeitu nih cun a chim.
AA nih Paletwa peng leng in Matupi peng tiang umkalnak a tuah mi kong ah Chin ramkulh chung hriamtlai phu pawl cung ah hriam thazang in hip khawh nakhnga aa zuam sual lai hi biatak tein ralrin a herh tiah Chin ramkhel lei ngiathlaitu nih an chim.
“Dothlennak chung ah AA nih Chin hriamtlai phu cheukhat cawnnak a pek hna, hriam a bawmh hna. Ramkhel le kahdohnak hraplei in zoh ahcun fawi tein tuak sawhsawh ding a si lo. Paletwa lebang hi cu AA nih hmunhma a cul/zah dih cang.
Cubantuk in adang khua hna zong hmunhma a cul khawh nakhnga aa zuam mi a si tiah biahalnak tuah lo awk a ṭha lo” tiah Chin ramkhel lei ngiathlaitu nih Ayeyarwaddy Times ah a chim ve. Chin ramkulh chung ah Paletwa hi hriamtlai an tamnak hmunhma a si i CNA, CDF-Paletwa le adang hriamtlai phu, AA le SAC ralkap hna an cawlcanghnak hmunhma a si.
Myaing Peng Ah Bomrap A Thianh Mi SAC Ralkap An Doh Hna, 8 An Thi. Magway ramṭhen, Myaing peng ah bomrap a thianh lio mi SAC ralkap pawl an doh hna i SAC ralkap le pyusawthi 8 an thi tiah Myaing PDF nih thawng a thanh.
August 7 chun sml 12:00pm hrawng ah Pakokku-Kanma-Mindat lamcung hmunkhat ah SAC ralkap mawṭaw pawl an kal lai tiah thawngpang an theih caah Myaing PDF phufonh nih an bawh hna i bomrap thianh ding in a rak phan taktak mi SAC ralkap le pyusawthi pawl cu bomrap voi 4 an puah hnawh hna caah pyusawthi 5 le ralkap 3 an hmun ah an thi tiah theih a si. Cunbantuk in bomrap puahhnawhnak cu Myaing PDF B01 C05, Black Cobra phu hna bawm in an tuah tiah theih a si.
Pale Peng, Kyeningyi Khua Pawng Kahdohnak Ah SAC Ralkap 15 Nak Tlawm Lo An Thi. Sagaing ramṭhen, Pale peng, Kyeningyi khua pawng kahdohnak ah SAC ralkap 15 nak tlawm lo an thi tiah MRDA nih thawng a thanh.
August 7 zinglei sml 9:00am hrawng ah Pale peng, Zephyokone (Pyusawthi) khua in a rak chuak mi SAC Infantry 704, Ah-Sa-Yah 909 in ralkap 87 cu Kyeningyi khua, Kyaungthan khua le Sinshin khua 3 karlak ah timhcia tein a rak bawmh mi MDRA phu nih an kah hna caah SAC ralkap 15 hrawng a hmun ah an ril tiah theih a si.
SAC ralkap pawl cu MDRA phu nih 100M aa hlatnak in hriamngan le meithal hmang in sml 2 chung an doh hna. SAC ralkap lei an sungh caah chun sml 11:15am hrawng ah SAC Tadaoo (တံတားဦး) vanlei ralkap nih A-5 Bomber Jet Fighter in bom a rak thlak hna tiah theih a si.
Vanlei kahdohnak ruang ah hriam tampi la kho lo in kuanzen cheukhat le kahdohnak thilri cheukhat lawng an lak khawh tiah an thanh. SAC ralkap pawl cu kahdohnak a dih hnu ah Kyeningyi khuachung lut in hmunhma an khuar i hliam a tuar mi ralkap pawl an thlop hna i a thi ruak pawl an vui hna tiah MRDA cathanhnak in thawng kan theih. Credit: The Chinland Post