Kalay-Taingen Lampi Hman Ṭhan Khawh A Si Cang__CDF-CDM Siyin
=========
Sagaing ramṭhen, Kalay khuapi le Chin ramkulh chaklei hmun pehtlaihnak ah a bik in hman a simi Kalay-Taingen lampi cu Julay 20 thok in hman ṭhan khawh a si cang, taih CDF-CDM Siyin nih cathanh an chuah.
Chin ramkulh, Tedim peng, Taingen khua um SAC ralhrang sakhan cu a luancia July 11 ah Chin ralkap ṭangṭi phufonh nih an kah hnu July 14 thok in mah lampi cu mipi nih hman rih lo dingin CDF-CDM Siyin nih cathanh an rak chuah.
“Kalay-Taingen lampi cu Kalay khuapi in Chin ramkulh, Tedim-Rihkhawdar le Falam lei kalnak ah an hman bikmi lampi a si. Atu cu mipi nih a hlan bantukin hman ṭhan khawh a si cang, mipi nih nan kan telpinak cungah kan i lawmtuk” tiah cathanh an chuahmi ah an langhter chih.
Kyindwe Khua Pawng Ni 3 Chung Kahdohnak Ah SAC Ralhrang 20 Tluk An Thi. Magway ramthen Saw peng in Chin ramkulh Kanpetlet peng Kyindwe khua lei ah a ra mi SAC ralhrang motor cu Chin ralkap tangti phu nih nithum chung an kah hna caah ralhrang 20 tluk an thih pin ah hliam tuar mi zong an tam tiah CDF-Kanpetlet tuanvo ngeitu pakhat nih a chim.
Saw in July 16 ni ah a rak chuak mi SAC ralhrang motor le rallam sial mi hna cu Saw peng Sew-lon-gin khua pawng kahdohnak ah ralhrang 6 an thi i hliam tuar zong an um. July 18 zinglei ah Kanpetlet peng Ma-sa-tui khua pawng ah kahdohnak fakngai a chuak than i ralhrang lei an hruaitu pakhat telh in 5 nak tlawm lo an thih pin ah hliam tuar mi an tam.
Mah ni lila suimilam 1 dan ah kahdohnak a chuak than i ralhrang 3 an thi than, hliamtuar zong an um. Chin ralkap tangti phu in minung pakhat hliam faklo a tuar. SAC ralhrang lei a thi mi le hliamtuar an tam caah raltuknak vanlawng 3 nih Bomb a thlak, caah Ma-sa-tui khua BCM biakinn le mipi inn 5 an rawk.
July 18 nikhat chung lawngah Ma-sa-tui khua le a pawngkam ah raltuknak vanlawng nih voi 11 nak tlawm lo Bomb a thlak tiah Kanpetlet peng mipi ukhruainak phu nih thanhca an chuah. July 19 zinglei zongah Ma-sa-tui khua thlanglei ah kahdohnak a chuak than i ralhrang 5 nak tlawm lo an thi.
“SAC ralhrang motor le rallam sial mi thazaang 300 tluk cu raltuknak Tank 2, JCV motor pakhat le ralhrang phur tu motor 20 leng cu Kanpetlet peng Kyindwe khua lei ah thazaang chap dingin an ra hna” tiah CDF tuanvo ngeitu pakhat nih a chim.
Hanlin Khuapi Ah Umhmun Khuarmi SAC An Kah Hna 5 An Thi 20 Hliam An Pu; An Tlaihkhihmi Hna Zong An Um. Sagaing ramṭhen, Shwebo peng, Hanlin khuapi hlun ah umhmun a khuarmi SAC ralhrang pawl luhhnawh in an kah hna caah ralhrang 5 an thi i pyusawhtu 20 hrawng hliam a pumi a si. Mipi ralkap nih an tlaihkhihmi hna zong an um, tiah Genertion Z Power (Mandalay) in ṭuanvo ngeitu pakhat nih July 19 ah a chim.
July 17 zing suimilam 5:00 tluk ah SAC ralhrang, palik le pyusawhtu fonh 60 leng nih umhmun an khuarnak Hanlin khuapi hlun an sakhan cu mipi ralkap ṭangṭi phufonh nih luhhnawh in an kah hna hi a si, tiah a chim chih.
“Ralhrang tlaihkhih a tongmi hi 20 deng an si, hliam a pumi pawl an dihlak nawn in kan tlaihkhih hna. An sakhan laak ding ah kuan nih a kan zat ti lo caah hnulei kan tolh ṭhan i SAC ralhrang nih Shwebo khuapi in ralbawm tu an rak thlah hna pinah Mi 35 helicopter in khuate hna cu a rak kah. An kah lio ahcun mipi ralkap hna hnulei an pil dih cang, SAC ralhrang lei 5 thimi hi mit hmuh ah a thimi an si. Cawleng 2 in hliam pumi ralhrang pawl cu bawmtu an rak thlahmi hna nih an laak hna i an thlop hna” tiah a chunglei upa nih Khit Thit ah a chim.
Kahdohnak cu Genertion Z Power (Mandalay), Mandalay pengkomh Pah-kah-phah, Maha Aungmye peng Pah-kah-phah, Patheingyi Pah-kah-phah, Mandalay pengkomh Battalion 3, 4, 5 hna le tualchung hriamtlai ṭangṭi phufonh hna kan si, tiah an langhter chih.