Good News: CDF-KKG Hawikom Pawl Nih Ralhrang le Physawthi An Phomh Than hna!

HmanDaw Khua Pawngah SAC Ralhrang Le Buesawtyi Rual Cu Mipi Vengtu Nih An Kah!
========
Kalaymyo thlanglei sang Gian Ta khua le Gangaw peng chung Hanta Wady khua ah umnak sakhan tuahtu SAC ralhrang ralkap le anmah kuttang ah a ummi Buesawtyi hna cu minung (70) hrawngin phuhnih ah i then in Hman Daw khua leiah kahdohnak an rak tuah i, CDF-KKG, CDF-Thantlang, PDF-Kalay, PKDF le ပကဖ fonhmi phu nih Febuary 23 zinglei sml 10:30 hrawng thawkin kahdohnak cu an rak thok.

SAC ralhrang ralkap hna nih a hlanah an kal tawnnak motor lampi in kalti loin ramtang bakin Hman Daw khua hnulei in Hman Daw khua chungah an rak lut hna i, mipi vengtu phu fonhmi he sml 2:00 chung fak taktakin an i kah hnuah CDF-KKG phu nih vawlei tangah an phummi bomb nih a puah hnawh hna pinah hriamngan he hriamhme he kah an ton ruangah SAC ralhrang ralkap rual cu hnulei ah an kir than.

Cu kahdohnak ahcun SAC ralhrang ralkap leikap ah a thimi le hliammi zat an chim rih lo nain a tlawmbik (6) nih fak taktakin hliam an tuar lai tiah thawng theih a si i, mipi vengtu leikap ah hliam tuarmi umloin an i kahdohnak hmun pawngkam ah hmunhma thenhnak le zohfelnak an tuah.

Febuary 22 zongah Gangaw le Pia khua karlak ah umnak sakhan tuahtu SAC ralhrang ralkap seh thilri an chiahnak hmun cu CDF-KKG Battalion (5) nih hriamngan hmangin an kah hna hnuah CDF-KKG leikap ah hliam tuartu umloin an i zukphiak kho.

Kalay peng YanGyiAung ah umnak sakhan tuahtu SAC ralhrang ralkap nih Febuary 23 ni ah Tanphu khua chungah lut hratin minung umnak inn, facang rialnak seh, motorcycle tibantuk cu mei an khanghpiak hna tiah theih a si. CDF-KKG Battalion (3) le mipi i fonhin heh le hnik tiah mei an hmih ruangah facang rialnak seh cu an hmih khawh nain minung umnak inn (2) le cycle hna cu vutcam ah an cang.

Ralhrang Thi mi An Tam Taktak Ko! Shan ram le Kayinni Ramri Ni 8 Chung Kahdohnak Ah Ralhrang Thi Mi An Tam. Shan ramkulh Kayinni ramri Mobe kahdohnak cu fah lei a pah caah kaphnih in thi le hliam an tam, ralhrang hna zong leikuang ah a tomtom in an thi.

Kahdohnak ah Kayinni ralkap fonh, PDF lei in minung 40 hrawng an nunnak a liam i ralhrang lei 100 hrawng an thi tiah theih a si. Ralhrang nih kahdohnak ah pawngkam hrawng cu hriamngan in an kah caah khuami thi le hliam, inn kaang i a rawk mi zong a um tiah theih a si.

Monywa UG Ralkap Hruaitu Kahdohnak Ah A Nunnak Liam! Monywa Nightking hruaitu Blacki Ko Tun Tun Wine tiah auh mi Ko Nge Lay cu nizaan 22.2.2022 kahdohnak ah ralhrang kut in a nunnak a liam tiah theih a si.

Matupi Palik Pakhat Meithal he CDF sin ah a Lut. Nihin February 23 ah Matupi palik zung in SAC palik pakhat meithal tlamtling he CDF-Matupi (Battalion-1) sin ah a lut, tiah thawng kan theih. CDF-Matupi nih thawng an rak thanh bantuk in tangka ting 60 an phalh hnu ah himnak hmun ah an kuat.

SAC Ralhrang Ralkap Sakhan Hmun Hnih Cu Phekhung-PDF Nih Kah, Ralhrang (5) Nak Tam Thi! Shan ramkulh thlanglei Phekhung khuapi Lue Par Tha Phaya Taung le Kung Sung Phaya Taung ah umnak sakhan tuahtu SAC ralhrang ralkap sakhan hmun (2) cu Phekhung PDF nih luhhnawh in an kah caah ralhrang (5) nak tam an thih pinah meithal zuun (3) kan laak khawh tiah Phekhung PDF nih cathanh an chuah.

Febuary 22 zinglei sml 6:00 hrawngah Phekhung-PDF, Mipi Vengtu Ralkap, Fimthiamnak Hmangin A Cawlcanghtu Phu le an hawile phu dangdang i fonh in kahdohnak an tuah tiah theih a si. Kahdohnak caan hi sml 1:00 chung hrawng a rau i, SAC ralhrang ralkap (5) nak tam an thih pinah hliam tuartu an tam ngaingai i BA-100 zuun khat, MA 2 zuun khat, MA 3 zuun khat telh in kuanfang zeimawzat le ralthuam thilri cheukhat kan laak khawh tiah an chim. Cu kahdohnak ahcun Phekhung-PDF (3) nih hliam an tuar hna i, pakhat hi a hliam tuarmi a zual ngai tiah theih a si.

Mube Khuapi Pawng Ni (6) Chung Kahdohnak Ah SAC Ralhrang Ralkap (61) An Thi, Tank (2) Telh In Motor (3) An Rawk!
Shan-Karenni ramri Mube khuapi pawngah Febuary 16 thawkin kahdohnak a tuahtu SAC ralhrang ralkap le Karenni fonhmi phu karlak, ni (6) chung kahdohnak ah SAC ralhrang leikap ah (61) an thih pinah tank (2) telh in motor (3) an rawk dih tiah KNDF nih nihin ah cathanh an chuah.

Febuary 16 thawkin SAC ralhrang ralkap nih Mube khuapi chungah umnak sakhan tuah hratin Mube khuapi le pawngkam Lue Yin Min Kala le Haih Kui Se ralkap phu, Mube khuapi ralkap phu, Loikaw Phaya Phyu ralkap phu tiin hmun (3) bakin kahdohnak an tuah i, cu kahdohnak ahcun SAC ralhrang nih tank telh in vanlawng le lamhlat kahnak hna an hmang i, vanlawng in vawi (21) bak an kan kah tiah KNDF nih an langhter.

Mytel Tower Tung Conghtu SAC Ralhrang Ralkap Rual Cu KNU Le KRF Fonh In Kah! Mon ramkulh Kyaikhtu peng Ing Ka Bu khua ah a ummi Mytel Tower conghtu SAC ralhrang ralkap hna cu KNU/KNLA le KRF fonhmi nih kan kah tiah KRF nih cathanh an chuah.

Febuary 20 zaan ah SAC ralhrang ralkap rual cu kan kah tikah ralhrang 2 nak tam nih hliam an tuar hna i, fonhmi phu leikap ahcun hliam tuarmi umloin kan i zukphiak kho tiah an langhter. KRF cu SAC ralhrang ralkap an dih dongh hlan tiang pehzulh in ral kan doh lai i, mipi nunnak, ngeihchiah chawhva le inn lo hna cu a si khawh chungin kan ven lai tiah cathanh an chuahmi ahcun an langhter. SAC ralhrang ralkap kuttang ah a ummi hna le dalan hna telh in ralhrang bawmtu a simi paoh cu pehzulh in kan kahdoh hna lai tiah an langhter.

ICJ Ah Kawlram-Cambia Case Chimnak Le Ngaihnak Hi Tihnung Tuk A Si Tiah SAC-M Nih Cathnah Chuah! ICJ ah Kawlram-Cambia case kong he pehtlai in chimphuannak le ngaihnak hna hi Kawlram caah tihnung dirhmun a chuahter kho chinchin i, pakhat le pakhat covo i khahnak caah a herh loin caan lehlam a rauhter kho tiah (SAC-M) nih cathanh chuah.

SAC ralhrang ralkap cu ICJ ah kai khawhnak nawlpek hi lungdonh awk le tuanvo laak duhlonak a si i, nuhrin covo i tlukruannak ah a herh loin caan lehlam a rauhter kho tiah vawlei cung mi fim/mi thiam taktak telh in an dirhmi phu (SAC-M) nih Febuary 21 ah cathanh an chuahmi ahcun an langhter.

Nawlngeihnak latu SAC ralhrang ralkap cu Kawlram cozah a si lo i, SAC ralhrang hi Kawlram aiawhtu zong a si lo. Atu bantukin aiawhtu ah nan cohlanmi hi ICJ caah tihnung a si tiah SAC-M chungtel Chris Sidoti nih a chim. SAC ralhrang ralkap bawi hna nih atu case caah a biapi taktakmi Ruhingja miphun cihmih thahnawnnak cu hramhram in an tuah/pah chih i, atu ah Kawlram chung buainak hrampi pakhat zong a si tiah (SAC-M) nih a chim.

Cupinah National United Government (NUG) lawng hi Kawlram cozah a si i, Kawlram aiawhnak nawl a ngei. NUG cozah nih cun a hlan chan NLD cozah lioah Cambia ram nih tazacuaimi cu an rak pheh thuhmi zong an laak than dih cang hnuah zung ah ca an pek cang tiah SAC-M chungtel Yaanghee Lee nih a chim.

ICJ nih ni kum ah khan UNO tonbiariahnak ah nawlngeihnak latu SAC ralhrang ralkap cu hlawt in Kawlram aiawhtu ah an chiahlonak aruang zong nan ruah awk a si tiah SAC-M nih an langhter. UNO tonbiaruahnak nih cun mipi dihlak nih thimmi cozah riankhinhmi U Kyaw Moe Htun cu pehzulh in tuanvo an pek. Ambassador U Kyaw Moe Htun cu NUG nih ICJ ah Kawlram aiawhtu palai in tuanvo pek a si.