Good News; CDF kan pasaltha hna nih thawngpang tha taktak thanhnak an vun tuah!

Mindat pengchung ah mipi thilri a firtu mifir pakhat CDF-Mindat nih an tlaih!!
=========================
Chin ramkulh, Mindat pengchung ah mipi thilri a firtu mifir pakhat cu CDF-Mindat(Thein Hngiat battalion) nih an tlaih tiah theih a si. Mipi lei nih phuannak a um caah cu mifir cu October 1, ah tlaih in kan hren tiah Thein Hngiat battalion phu nih an chim.

Tlaih a tongmi mifir cu a voi hnihnak kan tlaih a si cang tiah CDF-Mindat battalion Thein Hngiat ṭat-yin-hmu nih The Mindat Post ah a chim. “Khuachung ah cycle a fir i aa zampi caah kan auh i checkhlatnak kan tuah, atu hi kan hren chung,

cu hlan zongah khuachung ah zurit buin buainak a chuahpi caah tlaih a rak tong bal cang, ralrinnak pek cangmi a si” tiah a chim chap. Atu cu thilri a fir caah kan hren chung, a mah zohkhenhtu minsen thutnak he sualphawtnak phaisa liamter hnu ah thlah an timh tiah theih a si. Crd-The Chin Post

Relchap, PDF A Cohlangmi Khua Paoh Kan Khangh Lai Tiah Ati Tu Pyusawhti Hrauitu Phungki Wathawah (ဝါသဝ) Bomb Puahhnawh A Tong, A Ke Pakhat An Tan, Sagaing ramṭhen Kanbalu peng PDF a dirpitu khua vialte cu kan khangh dih lai tiah aa hrocer lengmangmi Pyusawhti hruaitu phungki Wathawah cu bomb puah hnawh a ton caah a ke pakhat an tan tiah tualchung media pakhat simi Infinity Group nih nihin October ni 2 ah cathanh an chuah.

Bomb puah hnawh a tongmi Pyusawhti hruaitu phungki Wathawah cu Kyunhla peng le Taze peng hna ah Pyusawhti training kai dingin mipi a lemsoitu le PDF a cohlangtu khua hna cu kan khangh dih lai tiah a hrocer tawntu a si tiah theih a si.Pyusawhti hruaitu phungki wathawah le a dang a zultu hna mawtaw cu aluancia September ni 30 ah bomb puahhnawh an si i pyusawhti 2 an thih pinah a tubantuk in an hruaitu a ke tannak tiang a chuah hi a si.

Pyusawhti hruaitu Phungki Wathawah cu September ni 1 ah Kanbalu sii-inn in thi dur hnih an rawnh hnu ah September ni 2 ah Mandalay sii-inn ah kan kalpi tiah theih a si.

Kyaṭaṭ Palik Sakhan Luhhnawh In Kahdoh An Tong, SAC Ralkap 5 An Thi, Sagaing ramṭhen, Salingyi peng Kyaṭaṭ Sanpiah(ကျားတက်စံပြ) khua Kyaṭaṭ palik sakhan cu October 2 ah luhhnawh in kahdoh an ton caah SAC ralkap 5 an thi tiah Salingyi Special Task Force-SSTF nih an chim. Nihin zinglei suimilam 6:00 hrawngah kaphnih kar kahdohnak an thok i suimilam 11:30 hrawng ah cu kahdohnak cu an ngol, sakhan lakding in kan i zuam ko nain kanmah lei ihliamnak kan ton sual caah kan ngol ṭhan tiah tualchung hriamtlai phu in ṭuanvo ngeitu nih a chim.

“Kyaṭaṭ palik sakhan ah cun palik le SAC ralkap minung thazaang 40 hrawng nih umhmun an khuar, sakhan cu kan la kho lo, sakhan kan luh lai ah kanmah lei minung 2 an i hliam caah hnu kan tolh, SAC ralkap lei in minung 5 hrawng an thi, hriam 1 lak piak an si, G 2 pakhat kan lak khawh, van lei in a van bawmtu nih an kan kah caah kan ralkap hnu kan tolh ter hna” tiah a chim. SAC ralkap hna cu Salingyi Special Task Force-SSTF, Myaing peng tualchung hriamtlai phu, Yesagyo tualchung hriamtlai phu le MRDA phufonh hna nih an kahdoh hna tiah theih a si.

Pathein Thonginn Ah Ramkhel Lei Thongtla 2 Kum 24 Thongthlak Dingin Biakhiahnak An Tuahpiak Hna, Ayeyarwaddy ramṭhen, Pathein thonginn ah hren a tongmi ramkhel lei thongtla minung 2 cu September 28 zinglei ah kum 24 chung thongtla ding in biakhiahnak an tuahpiak hna tiah theih a si.

Einme(အိမ်မဲ) khua mi (kum 20) tlukhrawng a simi Ko Zin Koko le Ko Kyaw Zin Lat cu SAC ralkap kuttang um Pathein pengkomh biaceih zung nih poh-mah 122, 124, poh-mah 19(စ) le poh-mah 505(a) in kum 24 veve thongthlak ding in biakhiahnak an tuahpiak hna tiah sih-ni he naihniam in a ummi hna sin in theih a si.

“Poh-mah 122 le 124 sualpuhnak pahnih fonh in kum 20 thong, poh-mah 19(စ) ai ah kum 2 thong le poh-mah 505(a) ai ah kum 2 tiin kum 24 thongtla ding in biakhiahnak an tuahpiak hna” tiah sih-ni hna he naihniam in ummi pakhat nih a chim. Kum 24 chung thongtla.sing in biakhiah a tongmi Ko Zin Koko le Ko Kyaw Zin Lat cu 2021, August thla ah Pathein peng Chaungta khua ah hriamthil he tlaih a rak tongmi an si tiah theih a si.

SAC ralkap nih uknak an lak hnu Pathein thong inn ah phungninglo in tlaih a tongmi ramkhel lei thongtla pa 300 leng le nu 50 hrawng an um tiah theih a si, thongthlak ding in biakhiahnak tuahpiak cangmi 150 lwng an si tiah Pathein thonginn rianṭuantu hna sin in theih a si.

Russia In Tilawng 16 A Rak Phan Lai, Myanmar rilli ah Nga, Ngaikuang tlaihnak ah fimthinak leiin riantuanti dingah Russia in Myanmar lei ah Tilawng 16 a rauh hlan ah a rak phan cang lai, tiah Nga riantuantu phu sinin theih a si. Myanmar rilli ah a um mi Nga resources a um nak cu (Nga a chuahnak cu) research tauh dingah le a dang sector hna ah riantuanti dingin Myanmar-Russia ram hnih in hnatlak minthutnak a ngei cang hna i fimthiamnak lei in riantuantinak cu tlawmpal a rauh hlan ah rian hram an domh cang lai, tiah theih a si.

Vawleicungah Myanmar ram cu nga tlaihnak lei in a pa 10nak ah a dir mi a si ko nain tlaihnak thilri le fimthimank hman dingah a herh rih i rilli 100 meters tang ah a um mi Nga, Ngaikuang pawl tlaihnak fimthiamnak ngeih a si rih lo bantukin Russia ram cu Nga riantuannak leiin a thangcho mi ram a si i Myanmar ram caah Fimthiamnak le thilri pawl bomhnak an kan peek khawh lai, tiah Nga riantuannak zung nih a chim.

A tu ah Myanmar rilli 100 meters tang ah a um mi Nga, Ngaikuang pawl tlaih khawh dingah Fimthiamnak kongkau cu Russia ram ah ceihhmai cia a si cang i Russia ram in Tilawng 16 cu a rauh hlan ah a rak phan cang lai i Nga, Ngaikuang tlaih ah ramhnih ibom in riantuanti a si cang lai, tiah kan theih.

Ponnakyun ah AA nih SAC ralkap 2 an tlaih hna, Rakhine ramkulh Ponnagyun peng October 1, zaanlei suimilam 3:00 ah zu dawr pakhat chungah a ṭhumi SAC ralkap kuttang um palik 2 cu AA nih an tlaih hna tiah tualchung mi nih an chim. AA kut in tlaih a tongmi palik 2 cu Punnakyun(ပုဏ္ဏားကျွန်း) palik sakhan in ṭat-kyat-gyi Zaw Lin Oo(kum 40) le duh-palik bawi Hlah Thein(kum 38) an si tiah min langhter a duhlo mi tualchung mi pakhat nih a chim.

“An pahnih in Guwah(ဂူဝ) phungki biaknak pawng zu dawr ah zu an dih lio ah hriamtlai minung 9 hrawng nih auh in an kalpi hna. Palik pahnih tlaih a tongmi hna cu khuachung ah a min a langsar ngaimi an si i SAC ralkap sin ah thawngpang a pe tawntu an si” tiah a chim chap.

Launglon Kahdohnak Ah Pyusawhti 2 An Thi, Meithal Zuun 2 An Lak, Tanintharyi ramṭhen Launglon peng Kyauknimaw khua le Kyaukmattat khuapawng ah phaisa khawlh nak in a rak kirmi Pyusawhti pawl cu September ni 29 ah kahdoh an rak tong tiah theih a si.

Cu kahdohnak ah cun a hmun ah Pyusawhti 2 cu hmakhatte ah an thi i 2 hliam an tuar, cu hliam a tuarmi pyusawhti 2 cu an thi ṭhan tiah kan theih tiah Launglon tualchung hriamtlaiphu nih cathanh an chuah. Kahdohnak ah Pyusawhti a thimi an dihlak 4 an si i kanmah LLPDF lei in pakhat nih hliam a tuar. Hriamnam Carban meithal zuunkhat, kutser meithal pakhat le AK kuan bawm 6 le SAC lukhuh pakhat kan lak tiah an thanh.

Moebae Khua September Thlachung Kahdohnak Ah SAC Ralkap 80 Nak Tlawmlo An Thi, Fakngai in kahdoh a chuahnak Moebae(မိုးဗြဲ) ah thlakhat chung kahdohnak ah SAC ralkap 80 nak tlawmlo an thi, tualchung hriamtlaiphu lei in minung 9 nunnak a liam tiah Moebae tualchung hriamtlai phu MBPDF nih nihin September 2 ah cathanh an chuah.

Kaphnih kar i kahdohnak ah SAC ralkap hna cu Moebae PDF battalion 1, battalion 2, Phekhon battalion 1, battalion 2, Loikaw PDF, central special force, Demoso tualchung hriamtlai phu, Naypyidaw PDF, Karenni hriamtlai phu KNDF, KA, KGZ le URF phufonh hna nih an kahdoh hna tiah theih a si.

Karenni hriamtlai phufonh leiin minung 54 nih hliamhma an tuar, cun minung 10 nih fakngai in hliamhma an tuar, Moebale PDF battalion 1 in ralkap 5, battalion 2 in ralkap 1, Phekhon battalion 2 in ralkap 1 le URF in ralkap 2 tiin an dihlak minung 9 an nunnak a liam. Cun KNDF battalion 3 in ralkap pakhat a tlau tiah MBPDF nih an thanh. Kahdohnak chung ah SAC ralkap hriamngan kahnak ruangah tualchung mi 13 nih hliamhma an tuar, kum 10 tang ngakchia 3 telhin tualchung mi minung 6 an nunnak a liam tiah theih a si.

Mindat khuachung hmunhnih ah kahdohnak a chuak, SAC ralkap nih hriamngan an duhnak hmun paoh ah an thlah, Chin ramkulh, Mindat Gayuna(ဂရုဏာ) zung le Shukhintar(ရှုခင်းသာ) riahbuk pawng hrawng ah October 1, zaan ah SAC ralkap nih an duhnak hmun paoh meithal an thlah tiah theih a si.

Cun khuate lei ah hriamngan voi 5 tiang an thlah caah, khuami hna cu ruahsur lak ah an tli zaam hna tiah theih a si. Khuachung ah hriamthil tling he aa chawkmi SAC ralkap hna nih, sangchung mipi an dumhau ah an cinthlakmi Maien, Mai le Anthor hna cu an fir i an I lawipi pah tiah theih a si.

Tanphyuzayat le Yee ah SAC ralkap motor voihnih tiang kah an tong i 10 an thi, Khin U ah SAC ralkap bomb puahhnawh an ton caah 6 an thi, Mon ramkulh, Yee-Tanphyuzayat(သံဖြူဇရပ်) motor lampi ah SAC ralkap motor ruun cu tualchung hriamtlai phu nih October 1 zinglei ah voi hnih tiang an kahdoh hna caah SAC ralkap 10 an thi tiah theih a si.

Tanphyuzayat(သံဖြူဇရပ်) in Yee lei ah a kalmi SAC ralkap motor ruun cu zinglei suimilam 9:27 le suimilam 9:51 ah voi khat veve in voihnih tiang kahdoh an si tiah Mon ramkulh Taungngyu(တောင်ညို) tualchung hriamtlai pah-kah-phah phu nih cathanh an chuah. SAC ralkap voihnih tiang kahdoh an ton caah ralkap 10 an thi, motor pakhat zong hrawhpiak an tong tiah theih a si.

Cun Sagaing ramṭhen Khin U peng ah rallam sialtu SAC ralkap hna cu tualchung hriamtlai phu hna nih September 30 ah bomb puahhnawh in an kahdoh hna caah SAC ralkap 6 an thi 5 hliam an tuar tiah theih a si. Khin U peng Yuatitkone(ရွာသစ်ကုန်း) um SAC ralkap hna cu Inpat(အင်းပတ်) khuachung in an chuah September 30, zaanlei suimilam 6:10 ah tualchung hriamtlai phu hna nih bomb lunghnih puahhnawh in an doh hna. SAC ralkap hna cu Khin U Special Force Organization, Khin U Support Organization le Khin U peng tualchung hriamtlai phufonh nih an kahdoh hna tiah theih a ai.

Indonesia pumpululh chuihnak ah buainak a chuak minung 129 an thi, Indonesia ram nizaan October ni 1 zaan pumpululh chuih lio ah mipi buainak a chuak tiah theih a si. A tubantuk in buainak a chuah hi Arema FC le Persebaya Surabaya an chuih lio ah a si i Persebaya Surabaya lei nih an 3:2 in Arema FC cu an tei hna caah Arema FC a ṭanhtu mipi nih buainak an chuahpi hi a si.

Cu buainak ruangah palek nih mitthli tlaknak bomb an puah, mipi le palik kar zongah buainak a fah ngai palik 2 zong an thi. A thi mi dih lak hi palik pahnih telh in 129 an si i 180 nih hliamhma an tuar tiah East Java palik bawi Nico Afinta nih a chim.

Arema FC le Persebaya Surabaya FC an chuih lio ah hin Persebaya Surabaya FC nih Arema FC cu 3:2 in an tei hna caah mipi cu pumpululh tualchung ah lut in buainak cu a chuak, palik nih an ṭhen khawh ti hna lo caah mitthli tlaknak bomb an puah, kaphnih kar buainak ruangah pumpululh tualchung ah hin minung 34 cu an thi i a dang 95 hi sii-inn ah an thi tiah palik pakhat nih a chim.

SAC Chungtel Asimi Nih Mah Tungtai He Aitlakmi Khiing Ngeih Cio Dingin Min Aung Hlaing Nih A Fial Hna, SAC chungtel asimi hna nih mah le tungtai hoih cio in khiing rih zaan ngeih cio dingin an hruaitu Min Aung Hlaing nih fialnak ca a pek hna tiah theih a si. September 30 ni ah Min Aung Hlaing nih ramkulh, ramṭhen le Naypyidaw hruaitu kip sinah atubantukin fialnak a tuah hna hi a si tiah theih a si.

SAC ah rian pek mi hna nih mah tungtai he ai tlakmi khiing rih zaan ngeih lawngah ngandamnak he aitlak i umtu thunder kongah a tlamtling ding a si caah Body Mass Index-BMI he ai tlak khawh chung tlak dingin i tuaktaan cio dingah Min Aung Hlaing nih a fial hna hi a si.

SAC hruaitu Min Aung Hlaing hi meeting an tuahnak hmun ah a lungchuak thil le a duh paoh a chim lengmang tawntu a si. Kan nu he kan i zuamnak thawngin atubantuk dirhmun kan phanhnak a si, ka nupi hi cutluk cun a felmi a si tibantuk konglam, mah le mah faknak a chim lengmang tu a si. Crd-The Chin Post