American Nih SAC Ralhrang MFTB Le MICB Bank Hna Cu Phihkharpiak Dantatnak A Tuah
=========
American ram cozah nih SAC ralhrang tangka luhchuahnak Myanmar ram le ramdang chawleh chawhrawlnak Bank hna simi MFTB le MICB hna cu dantatnak tuah in phihkhar ding ah nawl a chuah ṭhan cang i, nihin June 20 in nawl a chuahmi cu nunter asi cang lai ti ah Ambassador thawngthanhnak pakhat in kan theih khawh, tiah Thailand ram thawngzamhnak (Thai PBS) nih a ṭial.
Dantatnak tuah in phihkhar piak ṭhan a sinak nih nawlngeihnak a latu SAC ralhrang tangka luhnak kong ah rikhiah piak dingin timhmi a si i, SAC ralhrang nih mipi hna cungah phungning loin a tuahsermi pawl zong a zorter khawhnak ding caah ruahchanmi asi, tiah a langhter.
Zinan le kokek chuakmi hna zuarnak in SAC ralhrang caah tangka a lutmi le ramdang tangka hna cu nitlaklei ram hna nih phihkhar piak ding in an i zuam hi asi. SAC ralhrang nih nawlngeihnak a laak hnu in American ram cozah nih SAC cungah dantatnak in a phihkhar piakmi a tamngai cang.
Democracy a duhmi nitlaklei ram hna he ṭangṭi in SAC ralhrang cu an namchih caah SAC bawizik hna le an rianṭuan hawi hna cu pehtlai in phihkharpiak dantatnak an tuah hna. “SAC ralhrang ca ahcun a ti hna chahpiak a si cang caah phihkharpiak dantat a sinak nih tam deuh in rian a ṭuan cang lai.
Ram caah tangka lutmi a tlawm chin cang lai, cu hlan ah Dolar fangkhat ah Myanmar tangka in 2,100 a phan cang i, atu zong mahnak in a zual deuh cang lai” tiah Yangon khuapi hrambunh chawleh chawhrawl lei thiamsang pakhat nih People’s Spring ah a chim.
Mandalay ramṭhen Myingyan Seikkan peng ah SAC ralhrang Motor pakhat cu mipi hriamtlai phu nih an kah hna ca ah 10 naak tlawmlo an thi ti ah Myingyan pengkomh battalion 3 nih an langhter. June 18, zanlei suimilam 5:00 tluk ah SAC ralhrang tampi phurtu Motor pakhat cu mipi hriamtlai phu nih hriamngan hriamhme he an kah hna ca ah 10 naak tlawmlo an thi hriamtuar mi zong tampi an um ti ah theih a si.
Kahdohnak ah a tel mi, mipi hriamtlai ṭangṭi phu fonh hna cu Myingyan pengkomh hriamtlai phu battalion 3 BGF Burmese Guerilla Force ṭangṭi phufonh le Guerilla Dawei hna an si ti ah an langhter. Uganda ram nitlaklei um sianginn pakhat cu ISIS he aa pehtlaimi ralhrang pawl nih an doh hna caah siangngakchia 39 le mipi 2 an nunnak a liam pinah minung 6 an tlaihkhih hna, tiah cozah lei ṭuanvo ngeitu hna nih thawng an thanh.
Nunnak liammi hna chung ah a cheu cu naam hma in an thi i, a cheu cu an umnak hmun an khanghpiak hna caah an thih hi asi, tiah Uganda ram ralkap in chimphuannak nawlngeitu Flex Kulayigye nih CCN thawngzamhnak ah a chim. ISIS cikawr hna simi le ISIS he pehtlaihnak a ngeimi Allied Democratic Forces (ADF) ralhrang pawl nih Lhubirira sianginn cu a luancia June 16 ah an doh hi asi, tiah Uganda ram thawngthanhnak nih a langhter.
“Kahdoh a tongmi sianginn hi Congo ram he ramri pawng um Kasese khuapi ah ummi asi i, kum 13 in kum 18 karlak siangngakchia hna an kainak sianginn asi. Meikanghnak tiang a chuah caah June 17 zinglei sang tiang mei kan thah. Kahdoh an ton lio ahcun siangngakchia 62 an um lio asi” tiah Uganda ram ralkap in chimphuannak nawlngeitu Flex Kulayigye nih a chim chih.