General Zaw Min Thun A Lungdongh kho bak rih lo!

Russia In Oil A Phanh Lai Caah Oil Man A Ṭum Lai – Zaw Min Thun!
=======
A ralaimi caan tlawmpal ah Russia ram in Oil 30,000 tons phurtu tilawng an rak phak cang lai caah ramchung ah oil man a ṭum lai, tiah SAC chimnak nawlngeitu General Zaw Min Thun nih chim.

A luancia July thla lio ah General Zaw Min Thun nih cun Oil khonnak ah a canceo in oil a um ko rih ca ah kan i zat tawk kan ngei rih ko, tiah a chim hnu in oil man cu a kai lei lawng te a hung panh i, hmun cheukhat ah cun cawk ding tiang hmanh a um lo. Cu hnu in tuzarh chung ah Russia ram in Oil phan ding a um caah a man a ṭum ṭhan lai, tiah a van chim ṭhan.

Oil man hi tlaih khawh kan i tim US $ 200 million zong Oil cawknak ah hman ding in kan chiah, tuzarh chung ah oil a rak phan lai i pehtlai in phan ding in timhtuahnak zong kan ngei, atu nak in a man tampi a ṭum lai, tiah General Zaw Min Thun nih cun a chim chap. Nihin Yangon Datsi man cu 92 litre 1 ah 2395 kyat a si i tuzarh chung ah kyat 100 in a ṭum.

Russia Ram Chuak Oil Cu A Man Zat Khiahpiak Ding In G-7 Nih Bia An Khiah! Ukraine a kap cuahmahtu Russia cu a phaisa hmuhnak phih piak ding in, Russia ram chuak Gas hna cu a man khiahpiak ding in le vawleipi nih gas man ah harsatnak a ton nakhnga lo G-7 nih biakhiahnak an ngei, tiah theih a si.

Hi kong he pehtlai in ram dangdang hna he ceihhmainak ngeih dih hnu in Gas man cu kan khiah te lai, tiah G-7 nih cathanh an chuah. Russia chuahmi Gas hna cu kan khiahpiakmi man silole cu nak tlawm deuh in cawk khawhnak ding ah US, Canada, British, France, Germany, Italy, Japan (G-7) le ram dangdang hna nih biatak tein hma kan lak lai, tiah an chim.

Hi Russia gas man khiahpiaknak kong ah Russia nih Ukraine a luhhnawh hnu in, a bik in Gas a pek nak ram India le China an i tel ve khawh lo ahcun a hlawh a tling kho lai lo, tiah G-7 chungtel cheukhat nih cun an ruah.

India Nih A Hmasa Bik Vanlawng Phur Kho Tilawng A Sermi Onnak An Ngei! China he aa ngiar peng mi India nih Vanlawng phurkhotu Tilawng nganpi cu a a voikhatnak ah ramchung ah a ser i, tili chung chiahnak le honnak Prime Minister Narendra Modi nih a ngeih.

India nih a sermi Tilawng hi Meters 262 a sau i a min ah Vikrant tiah an pek, Vikrant nih hin tonnes 45,000 tiang a rit mi a phorh khawh i, suimilam pakhat ah 56 km in a choi kho. September ni 1 ah khan Prime Minister Modi nih honnak a ngeih. Hi tilawng sernak ah hin US$2500 million an dih i, Jet Fighter le Helecopter telh in vanlawng 30 a phurh khawh lengah Tilei ralkap(navy) 1600 rian an ṭuan lai tiah, theih a si.

Hi vanlawng phurkhotu tilawng hi zatuak ah 75% cu ramchung ah an ser i, a ser caan le hneksak caan hi kum 17 reng lo an rau. Tichung ah hneksaknak an tuah chung zong kum 1 an rau. Vikrant hi atu hnu thla 6 hrawng ah cun tlamtling tein thuamh a si kho lai i, raktuknak ah hman khawh ding ding timhtuah a si cang lai, tiah ṭuanvo ngeitu nih VOA ah a chim.

Suu Kyi Cu A Thong Tlak Kumcaan An Chap Ṭhan Caah A Dihlak Kum 20 Thong A Tla Lai! SAC ralkap nih Aung San Suh Kyi cu thimnak (Election) phung buarnak case in kum 9 thong thlak chap ding in bia an khiah piak ṭhan caah biakhiahnak an tuahpiak mi dantatnak dang hna he cun a dihlak ah kum 20 thong tla ding a si.

Kum 76 a simi Aung San Suh Kyi cu kum 11 thong thlak ding in biaceih zung nih bia an rak khiah piak cang. Nihin September 2 ah sualtuahnak case 4 in bia an khiah piak i, case 3 ca ah kum 6 thong thlak ding le case 1 caah kum 3 thong thlak ding in bia an khiah piak. Aung San Suu Kyi cu a diklak ah thong kum 20 tla ding a si cang, tiah theih a si.

Aung San Suh Kyi cu Min Aung Hlaing nih 2021 Febuary 1 ah nawlngeihnak a rak laak lio ah phung ning loin an rak tlaih i, nihin ni tiang sualkawlnak an tuah peng. Suu Kyi hi bia an ceihpiak bantuk in kum 20 thong a tlak ahcun a chuahlai ah kum 96 mi a si lai.

Mahlaing Peng Ah SAC Ralkap Cu PDF Nih Hriamngan In An Kah Hna Caah Ralkap 3 An Thi. Mandalay ramṭhen, Mahlaing (မလှိုင်) peng Takecin khua ah umhmun a khuarmi SAC ralkap pawl cu, August 31 zanlei sml 6:00 hrawng ah Nua Htu Kyi PDF nih hriamngan in kan kah hna caah SAC ralkap 3 an thi i, 4 hliamhma an pu, tiah cathanh an chuah. SAC ralkap hna le Takecin khua bawipa i bawm in khuami hna cu atu le atu an tlerh lengmang hna caah kan kah hna nak hi a si, tiah an langhter.

Magway ramṭhen, Pakokku khua helnak lam thlanglei ah tangka thaap in lente i celhnak(Gambling) pakhat cu, Pakokku PDF le Royal Defense Force nih August 31 chun hnu ah kan luhhnawh hna i, tangka, phone lung 6 le minung 3 kan tlaih hna, tiah PKU N PDF nih cathanh an chuah.

An tlaihmi hna chung in minung 2 cu nizan September 1ah an thlah hna i, a taangmi pakhat pa cu check hlatnak an tuah cuahmah rih ko, tiah theih a si. Pakokku khuachung le khualeng khuate tampi ah SAC ralkap cu tangka thaap in lente aa celhmi phu 7 nih zik an nawh hna. Cu hna phu 7 cu PKU N PDF nih nan ngol lo ahcun kan in tlaih hna lai, tiin ralrin an pek cang hna, tiah theih a si.

SAC Ralkap Khah Mah Ya 593 In Ralkap Pakhat Cu KNU Brigade 5 Ah A Lut, KNU Nih Ks. Sing 20 Lawm Man Tangka An Pek. KNU Brigade 5 hmunram ah SAC ralkap Khah Mah Ya 593 Battalion in Thant Zin Aung cu meithal le zen-kuan he KNU sinah a lut, tiah theih a si. Kum 25 tluk Thant Zin Aung cu MA3 meithal zun 1, kuan 170 le kutcheh bomb lung 1 he CDM a tuah caah KNU nih lam man tangka kyats sing 20 an pek, tiah theih a si.

“Ralhrang ralkap sin um ka huam ti lo. Ralbawi pawl nih an kuttang ralkap cu mi thleidan in an kan biak chawnh. Ralram kal caan i, ralhmai a kalmi zong rawl khim te in an kan pe lo. Nihin ah rawl kan ei ahcun a thaizing ah sanpioh kan ei. Cucaah ralhrang ralkap sin ka um khawh ti lo caah KNU sinah ka lut,” tiah Thant Zin Aung nih a chim.

KNU Brigade 5 hmunram ka phak hnu ahcun ahohmanh thleidannak um loin an biak chawnh hna. Unau le nau, ṭa le far bantuk in an um dih hna. Rawl zong khim tein an ka pek, a nuam tuk, kaa lunghmuih tuk, tiah a chim chap. “KNU Brigade 5 hmunram ah ka um lai i, Thailand ram lei ah rian ka kawl lai. Rian ka ṭuanmi chung in kaa khon lai i, hringtu ka nu ka zohkhenh cang lai,” tiah SAC ralkap kuttang un a chuakmi Thant Zin Aung nih a chim.

Thlahnih Chung Ah Kahdohnak voi 16 a Chuak I, SAC Ralkap 130 Hrawng An Thi. Chin National Organisation(CNO) kuttang um, Chin National Defence Force(CNDF) nih a luancia July thla in August thla tiang, SAC le Chin tualchung hriamtlai phu kar kahdohnak voi 16 a chuak i, SAC ralkap 133 hrawng an thi, tiah CNO nih nizaan September 1 ah cathanh an chuah.

Chin ramkulh, Falam peng le Sagaing ramthen, Kalaymyo peng ah SAC ralkap le CNDF telh in tualchung hriamtlai phu hna kar kahdohnak a chuak. Cu kahdohnak ah cun CNDF ralkap 2 an nunnak a liam i, 5 hliam an tuar. Nunnak a liammi lakah pakhat cu SAC ralkap nih Yinpaungtain(ရင်ပေါင်တိုင်) i vanlei kahdohnak an tuah tan ah aa tel, tiah theih a si.

Kahdohnak a chuahnak hmun hna cu; Falam peng in, Tuphe(သူဖေး), Falam mengtung 10, 13, 24, Rihkhawdar le Kalay peng in Hakha-Lay le Thauhciant(ထောက်ကြန့်), Tharyarkung, Yarzagyo, Yankyiaung hna ah a tambik an i kap i, CNDF le tualchung hriamtlai phu hna an i bawm, tiah theih a si.

Magwe PDF Sakhan Kap Ding In A Kalmi SAC Ralkap cu Bomb An I Lamh Caah Ralkap 10 An Thi!: Magwe thlanglei PDF le ATHETMINHLA(အထက်မင်းလှ) PDF phufonh hna hrambunhnak sakhan cu August 30 zinglei sml 4:49 ah, luhhnawh ding in SAC ralkap hna cu an kal i, cu lio ah PDF nih bomb an puahhnawh hna i SAC ralkap 10 an thi, hliamtuar mi zong an tam, tiah Magwe-PDF nih an thanh.

SAC ralkap hna nih cun hriamngan le hriamhme hmang in voi tampi an kan kah i, kan sakhan lei panh in an rat lio ah sakhan pawng le a kiangkap i bomb kan hmanhmi cu an i lamh caah SAC ralkap 10 an thi. Cu a thimi SAC ralkap hna ruak cu an lak hna hnu ah hnu an tolh ṭhan, tiah Magwe PDF nih an thanh.

Tanintharyi Ramṭhen Htaway Kahdohnak Ah SAC Ralkap 7 Nak Tlawm Lo An Thi: Tanintharyi ramṭhen, Htaway peng Tayetngauk(သရက်ငုတ်) khua pawng ah nizan September 1 zing lei ah SAC ralkap le PDF kahdohnak a chuak i, SAC ralkap 7 nak tlawm lo an thi, tiah theih a si.

Pakaryi(ပကာရီ) khua lei ah a kalmi SAC ralkap pawl cu September 1 zing sml 10:30 hrawng in kan kah hna i, sml cheu chung hrawng kahdohnak a chuak, tiah PDF ralkap pakhat nih a chim. SAC ralkap nih hriamngan le hriamhme he an kah ko hna nain, PDF lei a thimi le aa hliammi an um lo. Kah a tongmi SAC ralkap motor 3 cu Leikkye Pyaung(လိပ်ကြယ်ပြောင်) khua lei ah an kal, tiah tualchung mi hna nih an chim.

Htaway-Htikhi lam cung Myatta(မေတ္တာ) khua lonh ah a ummi Aiway(အိုင်ဝိုင်း) khua le a pawngkam ah a luancia August 26 ah khan SAC ralkap pawl cu Kawthu Lay ralkap pawl nih an rak kah hna caah SAC ralkap a thimi le aa hliammi an rak tam ngai, tiah theih a si. Credit: The Chin Post