February thla dih lei in mitlaih le Warrant chuah, mi kawl in an hun i la!
Khoi… kum khat cu kan tling, cuai hun thlai tuah sih!
===========
Bawi le uktu i cuh ruang ah Pa Hlaing nih, rammi kan i ruah bal lomi uknak cu February 1 zinglei sang ah a hun laak ai. Uknak a hun laak bakin rammi nih cohlan ve loin February 5 inkhan lamzawh kan rak i thok.
Kawl rawn lei cu Feb 5 in an rak thok i kan nih Hakha bel kan i tim cuahmah lawng a rak si rih. Feb 6 kan zung (The Hakha Post) ah Aung Aung le a hawile pahnih an ra i, “Lamzawh nawlhalnak ca zung ah chiah ding kan tial lai. Uknak tha lo doh ding ah lam kan zawh hna lai,” a rak ka ti i, “Eh… ok,” ka ti colh.
Ca cu kan hun tial i, tial dih le cangka bak in zung ah kan kal. Rian ngeitu nih a rak kan cohlang lo i kan kir. Kan zawh thiam lai tiah bia kan khiah thotho. Feb 7 a hun tling. Zaanlei suimilaam 1:00PM in lam kan zawh lai tiah thawng kan thanh. A chuak mi tah an um hnga maw tiah thinphang nawn in kan um. Asinain, kan hun chuah tak cu minung a thong fai kan rak si.
A thaizing an chuak zuam ti hnga maw? Kan i thawk sual hnga maw? Ningzak in kan um hnga maw tiin kan ruat. Zaanlei suimilaam 1:00PM a hun phan… a nikhat ni nakin letkhat kan tam. A nithumnak, a ni linak, a ni nganak… kan karh thluahmah kan karh thluahmah (A rak nuam bak).
February thla dih lei in mitlaih le Warrant chuah, mi kawl in an hun i la. Kan zor hnga maw tiah lungrethei in kan um than. Zor nemmam hlah… kan tam chinchin (kan hlawh a tling tiah kan i ruah). Cu ti cun… pehzulh in lam kan zawh hi thla thum a hun a tling. May 2 khi meithal he lam kan rak zawh. Lam a zawh mi an dawi hna… a kan bawh mi kan dawi ve hna tiin kan rak um.
Aw e cu hlan ah… March 28 in meithal he kan doh cang lai, hriam kan tlai cang lai tiah, “CHINLAND DEFENSE FORCE,” timi rak dirh a si. CDF rak dirh hnu ah hriamnam he mizapi sin ah lam kan rak zawh.
Khah… a sau tuk palia cang le…A zei si hmanh ahkhin, “Hi Khuapau dothlennak hi kan tei hrimhrim lai. A ruang cu, atu hmanh ah an kan uk kho lo. Chin National thantar te i tar in mah le sianginn cio ah ca kan i chim cang. Mah le khua cio ah mah te thimnak in ukhruaitu phu kan dir cang. Ngandamnak lei zong ah mah tein a remnak hmunkip ah kan i zohkhenh cang. Hi tluk hlawhtlinnak hi kan hlawh a tling lo ti cu a paam tuk. Kan hlawh a tling. A tling thluahmah rih lai.
Mipi kan tha maw chia sual lai uci law… kan tei deengmang. Zubui meican te lawng aa duh. I bawm tuaimai ko rih hna sihlaw… kan tei deengmang. “Kan minung i khat hlah hmanh sih, hriamtha ngei hlah hmanh sih, mipi kan thinlung aa khat dih, kan tangti dih ca ah kan tei hrimhrim lai,”.
Photo; Hi hmanthlak ka rak thlaknak ah motor cung in ka rak tla nain kaa tlaih manh than. Credit: Salai Tluang Te