Even Tluang Lian; Thantlang Na Dawt Ahcun, Share chin hna!

THANTLANG NA DAWT AHCUN
===========
Hla phuahnak in siseh, cațialnak in siseh, biachimnak in siseh, ‘Sui Thangtlang’ tiah kan telhpiak ti sawh hlah u.
Thantlang khua hi nan dawt i kan dawt cio, thluachuah hmu seh ti kan duh dih cio hna lai. ‘Sui’ bia fang kan hun telh i, kan Sui Thantlang kan titikah, porhlawtnak lei, i cuanak lei a hawih caah, porhlawtnak fate nih rawhnak a phak ter khawh. Thantlang khua aiawh tu hrimhrim nih, Thantlang nan dawt ahcun kan hmanpiak ti sawh hlah u.

Dawtnak in auh duh ahcun, kan lungrawn Thantlang, kan dawt Thantlang, kan philh khawh lo Thantlang ti bantuk hna hi a țha deuh hnga. Kan thlacamnak a hlawhtlin khawhnak hnga, porhlawtnak lei le i cuanak lei hawih hi cu kan hrial piak hram ko u law, kan thlacamnak hi zeihmanh nih dawn hlah seh.

Satan nih a khuaruah mi, “cutin, khatin, ka um lai,” tiin aa porhlawtnak cu a ka in a hun phuan tikah, țhumh a hung si. Nebukhadnezzar zong aa porhlawtnak nih kum 7 hramh a țamter. A fapa Belshazazar zong a herh lo tukmi a tuah i, PATHIAN sui hrai cu zu dinnak ah a hman! Cucaah a caan tlinhlanah a pennak chuh a si i cu zan hrimhrim ah thah a si.

Nebukhadnezzar fapa Belshazazar kha, zudin duhah hei din ziar ziar ko awk, PATHIAN sui hrai cu a va lakter hna i zu dinnak ah a hman ko cu! Khawihlo le khawihlo a khawih i, tuahlo le tuahlo a tuah caah dawh a rawh kha! Thantlang hei ti ko ding, Sui nan hei bet, cun, ‘Kan’ nan hun chap i, ‘Kan Sui Thantlang’ ah nan chuah! Kha hlan i nan rak hman cangmi vialte kha BAWIPA PATHIAN nih kan ngaithiam hram seh. Belshazazar bang a herh lo mi tuahnak in kanmah le kanmah i hrawk hlah usih.

Thantlang kan dawt i nan dawt cio, cucaah thlacamnak a dawn kho tu porhlawtnak hna hi kan ngawl piak hram u.
Ai khua ah zeicahdah Joshua le Israel mi hna kha an lam a tluan lo i an rak sungh kha? Zeicahdah kannih zong kan lam a tluan taktak khawh lo? Zei i kan ruah lomi thil fa tete hna hi, kan thlacamnak a dawntu le PATHIAN THLARAU a dinh tertu a si kho ko dah kaw! Share chin hna.

ZUMHNAK LO IN PATHIAN LUNGTON KHAWH A SI LO; Hebru 11:6 ah, zumhnak lo in PATHIAN lungton khawh a si lo, ti kan hmuh bantukin, a zum lo mi hna nihcun zumhnak theitlai an ei ve a thiang lai lo.

Nihin, kan Miphun le kan Ram kong zongah ram ngiatu pahra hna bantukin, BAWIPA nih a kan umpi, a kan dirpi le a kan hruainak a zum duh lo mi an um len cang! Cu hna nihcun, kan derthawmnak lei le kan santlaih lonak lei rumro hmuin, an phun an zai i, khatlei an țhawnnak lei le an thilti khawhnak lei le tei khawh an si lonak lei le thachiatnak cabia hna cu an thlah lengmang cang! Zumhnak a ngei lomi hna sin ah naa fonh ve sualnak hnga lo i ralring ko.

Hebru, dal 11 nihcun, zumtu hmasa hna nih zumhnak an rak ngeih caah, ram an rak laknak kong kha a kan cawnpiak. BAWIPA JESUH hmanh a khuaruah a har tertu, Rom ralbawi pa zumhnak bantuk kha kan i zohchih ding a si. Joshua le Kaleb bantukin, BAWIPA umpinak, dirpinak le lam hruaining zoh in BAWIPA tu hi kan i bochan i kan zumh ding a si.
A zum duh lomi caah cun, PATHIAN hmanh an umter lo cu ta! Satan kha zeitindah a tluk, a ruahnak in aa thok i, cu a ruahmi cu a ka in a hun phuan, cucu Satan a tluknak cu a si (Isaiah 14:13-14). Ruah le ruahmi thanh, phuan hin tluk khawh a si cang.

Tu lio kan Miphun kongah, nu le pa nih bawi le siangpahrang bantukin an zohkhenhmi an fa le kan mino hna hi, aho forh ruangah le aho sawm ruang le aho hlen ruang i a tho mi an si țung lo. BAWIPA nih a thawhtermi hna tu an si. Chambaunak le derthawmnak tamtuk an ngei liangluang lai. Zeicatiah, an inn chungkhar cio ahcun, bawi nu le bawipa bantukin online a țhu i cawm i zohkhenmi ceo kha an rak si ko.

Sihmanhselaw, kan Miphun caah BAWIPA nih a rak i tinhmi, a khuakhan kan phak khawhnak hnga, ‘hninh’ kan hau i țhangh kan herh. Exodus 9:15-16 bantuk in, BAWIPA nih a duh ahcun, chikhat teah teinak hi a kan pek khawh ko. Sihmanhselaw chikhat teah teinak hmu usih law, Miphun le Ram dawt kan mino hna le Ram mi hna nih kan pemh lai lo i Thluachuah a phur khotu nun Thluachuah kan ngei kho lai lo.

Cucaah, kan lung a fah le kan ngaih a chiat le kan temtuar ve hi, Miphun le Ram dawt kan pemh i kan thiam khawhnak hnga le hi hmangin kan i țhumh i BAWIPA lei kan i mer nak hnga, BAWIPA PATHIAN nih training a kan pek pah khi a si. KHRIH Lamkaltu, Tluang Lian (Martar).