Even Tluang Lian; Chin Khrihfabu Hna Ralrin Peknak Le Forhfialnak!

CHIN KHRIHFABU HNA RALRIN PEKNAK LE FORH FIALNAK!
============
Nihin kan Miphun, misual mi hna kutin khamh hi, PATHIAN Mission rian a si i emergency in a ummi Miphun khamh hi PATHIAN Mission rian, khulrangin țuan a herh bikmi rian a si. Hi emergency Mission rian i aa tel duh lo mi Chin Khrihfabu hna cu Biaceihtu 5:17, 23 bantukin biaceih le sual phawt nan si sual lai.

Pastor pakhat nih, cheuhra cheukhat chungin sing 3 (300,000) a hlawh a hlam mi cu a nupi a pek. A nupi nih an chungkhar herhnak ah a hman. An fa pa zong thonghra a țhenh ve. An fapa cu zukhmuam a tuahmi a si caah, zukhmuam aa cawknak; a si lo le zu dinnak zongah a hei hman ve ko. Khuate Pastor cheukhat cu zukhmuam tuah an tam caah, an thla hlawh hmuhmi in an hei cawk ko lai; cucu cheuhra cheukhat a si i cukha kan chim lo.

Profet Samuel nih, “siangpahrang nih cheuhra cheukhat kha a lak lai i, a bawi hna le a rianțuantu hna kha a pek hna lai,” a ti (1Sam 8:15). 1Sam 18:4, Jonathan nih a ralthuam cu David a pek. David nih raltuknak ah a hman! Jonathan ralthuam cu, a pa siangpahrang Sawl nih Israel mi cheuhra cheukhat a halmi hna in, aa zalh mi a si lai lo maw?

Cheuhra cheukhat hman ning hi biakam thar ah a um lo. Biakam hlun i a chim ning tlangpi kha lak a si. Cu ve bantukin nifate Miphun nunning, ral i khamhnakah biakam hlun zohchih a herh. Biakam hlun PATHIAN mi tampi nih vainam an tlai. An Miphun an khamh kha, PATHIAN rian an țuan a si i an Mission rian a si. Nihin kan Miphun misual mi hna ruangah Emergency i a ummi khamh hi Chin Khrihfabu kan Mission rian nganbik a si i, khulrang le a caan kheeng tein țuan a herhmi a si. Hi kan Mission caah Khrihfabu chaw hman hi a herh tuk mi a si cang!

JESUH zong nih, raldoh lo ding caan hmanhah chikhat cu vainam i zalh u a ti ko hih (Luka 22:36). Biathlam 6:1-2 ahcun JESUH zong nih vainam aa put cang ko hih! Jer 48:10 Daitlang in BAWIPA rian a țuanmi cu chiat ko seh! Thisen chuah awkah a nam a hmang duh lomi cu chiat ko seh!

Israel Miphun caah Joshua nih ral a tu, David zong nih ral a tu, Miphun caah raldo hruaitu Joshua le David sinah Israel Tlangbawi vialte nih an Support hna i a herh ningin an telpi i an bawmh hna. David ralkap ah Tlangbawi phun Levi mi hna 4600 le Tlangbawi ngan Aron tefa 3700 an i tel (1Chan 12:26-27).

1Piter 2:9 ningin Chin Khrihfa vialte tlangbawi phun kan si. Emergency i a ummi tlangbawi phun, Chin Miphun khamhnak caah Cheuhra cheukhat kan hman hi a dik i kan hman hrimhrim ding le khulrangin kan hman ding a si cang!
Hi kongah kaa fian tuk caah PATHIAN nih sual a kan phaw hrimhrim lai lo. PATHIAN sual phawt nan phan ahcun keimah nih ka phurh dih ko lai. KHRIH Lamktu, Tluang Lian (Martar).

Atulio Chinram boruak he pehtlai in CNF Spokesman Salai Htet Ni he biaruahnak
THT: Min Aung Hlaing nih zeiruang bik ah dah a ralkap pawl Chinram ah a vun ben/kuat thluahmah hna hnga? Aruang bik?
Htet: NUG hi Ralhrang Bu (Terrorist) an si a ti tik ah NUG he aa kom mi CNF hi a kan ngiarnak a si. CDF le PDF pawl ralkap lei thiamnak (training) kan pek mi hna an tih. Cun, ramkip um Chin miphun vialte nih CNF/A le CDF hi an dirkamh tuk ti an theih i an thinphang. Khat leikap ah Kawlram chung ah CDM a tam biknak le SAC kuttang rian sok a um bak lo mi Ramkulh kan si ruang bik ah hin Min Aung Hlaing nih a ralkap pawl a vun ben hna hi a si bik ko, tiah ka ruah.

THT: Atu hi Min Aung Hlaing le a hnuzul pawl nih Camp Victoria nam an timh tik ah nanmah lei in minung thazaang in siseh, hriamnaam in siseh, timhcia (ready) nan si cang maw? Nan dirhmun?
Htet: Ready peng kan si ko. Hriam lei cu SAC kan tluk bal lai lo. Tluk ding zong i timh ding a si lo. Raldoh tik ah a biapi mi cu hriam thazaang nakin thinlung le mizapi tanpinak hi a si deuh. Cun, fing le tlang umtuning le khuacaan zong a biapi. Cucaah, thinlung tak in mizapi tanpinak le kan ngeihchun mi hriamte he raltha ngai in kan doh ko lai.

THT: Atu hi Falam Peng ah an taap/an taang. Thantlang le Sopum (Camp Victoria kalnak khua) phan hna sehlaw zeidah nan lawh lai?
Htet: Phanhter lo an hau ko. Nain, an phan sual ahcun an him ve lai lo, si ko.

THT: Hi kong ah Thantlang Peng minung hna, abik in Zahnak, Vanzang le Khualhring Tlang minung hna siaherh biacah.
Htet: Hi kan tlang pathum ah a um mi kan nulepa hna nih rak kan zaamtak hna hlah seh.Htet Abik in a ngandam i meithal a ngei mi pa poh nih doh ve ding in i timtuah hna usih, ti hi cah ka duh hna.

THT: Tutan hi Min Aung Hlaing le a hnuzuul pawl kan tei hna nakding caantha a si tiah na ruat maw? Aruang?
Htet: Teinak cu kan ta a si lo. Pathian ta a si. Pathian nih kan duh mi a theih i a hngalh ko. Kan duh mi a tlamtlin khawh nakhnga kan doh ve bak a hau. Kan dohnak cung ah Pathian nih teinak thluachuak a kan pek lai.

THT: EU (European Union) nih NUG a cohlan hnu ah zeibantuk ruahchannak pawl dah an um?
Htet: SAC kan tei hna nakding ah ral lei lawng a ngah lo. International support hi a biapi tuk mi a si ca ah NUG he SAC he international support ngah ding ah an i zuam veve nak cu a si. EU hi butenau a si lo. Vawleipi ramkheel kong ah a biapi ngai mi bu a si i EU ruang ah international sin in NUG ca ah ramkheel le a dang humanitarian leikap in tanpinak lam a awng deuh lai ka zumh.

THT: Nihin dohthlennak ah Kawlram pumpi huap in siseh, Chinram huap in siseh, zeidah a herh bik? CNA/CDF/PDF le mizapi lei dirhmun in zeidah a herh bik?
Htet : Lungrual tein hmunkhat caankhat in dohti a hau ko. Doh kan ti tik ah kahdohnak lawHtetng a si lo. SAC phu an i cawmnak chawhrawl lei (business) tiang in doh a hau.

THT: Hi dohthlennak or ral kan dohnak ah hin zei pawl dah dawnkhaan biktu an si, tiah na ruah? Zeiruang ah?
Htet: Dawnkhaan biktu cu Policy le strategy i khahlonak a si i cu nih cun lungruallonak a chuahpi. Cun, kan ral lei thapetu le Dalaan tibantuk pawl hi an si deuh ko. Cun, News cheukhat hna zong hi i ralrin ngai cu kan hau. Chimchap ka duh mi cu ral ruang ah mizapi harsatnak he pehtlai in ral hi rak kan hrialpiak hna u, tibantuk zong hi a poi kan ti tuk tawn i kan i harh ngai mi cu a si ve.

THT: Hi dohthlennak hi zeican tiang dah a rauh lai, tiah na ruah, aruang?
Htet: Zeican dah a rauh lai ti hi cu kanmah lei nih zeitluk in dah kan thawn i SAC lei nih zeitluk tiang dah an lung a khon khawh lai ti mi cung ah aa hngat deuh ko rua ka ti.

THT: Hivial hin si rih selhlaw…caanpek in bia na kan ruah caah kan i lawm.
Htet: OK! Kaa lawm ve. Credit: The Hakha Times