Even Mang Cung Nung: “Tangka phawt le Thawngtha chim”

“Tangka phawt le Thawngtha chim” (March 25, 2022)
=========
Lamkaltu 6:2 “Pathian bia chim kha thlahdorh riangmang in tangka phawtnak kong lawng kan tuah ahcun a hman hnga lo”.

1. Lamkaltu chan ah Grik holh hmang Judah mi le Judah holh hmang Judah mi karlak ah zumhlonak a rak um. Grik holh hmangmi nih nuhmei sin tangka phawtnak kongah Judah holh hmangmi kha an rak zum hna lo. (Peng tlang le holh i dan ruangah thleidan le i zumh-lo a um kho).

2. Lamkaltu 12 hna nih, “Pathian bia chim thlahdorh riangmang in tangka phawt kong lawng kan tuah ahcun a hman hnga lo. Tangka phawtu zumh awk tlak minung van thim hna u law, kannih tu cu thlacam le Pathian biachim ah kan caan dihlak in kan hmang lai” an ti hna.

3. Thiang Thlarau le fimnak he a khatmi, Steven, Filip, Prokhoras, Nikanor, Timon, Parmenas, le Nikolas kha an thim hna. 4. Tangka phawt rian an thok hlan ah Lamkaltu 12 nih an lu cungah kut chuan in thla an campiak hna. Cu hnu ah tangka phawt rian cu an tuan. Grik holh hmang le Judah holh hmangmi karlak zongah thleidannak um lo tein an phawt hna. Anmah lila zong zumh awk tlak an si.

5. Cuticun Pathian bia cu a karh chin lengmang. Jerusalem khua chung zongah zumtu piangthar an tam chin lengmang. Tlangbawi tampi zong an piangthar ve. Tlangbawi lak zongah piangthar lo an rak um ve ko.

6. Ralhrang ruang ah ralzam kan si lai ding hi Bawipa nih a theih caah ramdang innka a kan onpiak. Ramkip ah rian a tuanmi hi kan tlawm ti loh. Bu kip le phu kip nih ralzam bomhnak ah tangka an kawl. Nuhmei zong nih an thawh, hngakchia nih an ei ding kaa chung rawl tiang an hoih hna. Tangka phawt tikah zumhlonak a um sualnak hnga lo, ralring tein, uting-nauzo tein i phaw hna u sih. Nung kho deuh nih har deuh mi hoih chin ko hna u sih.

7. Tangka phawt lawng ah buai loin thawngtha biatak chim hi tlolh hrimhrim hlah u sih. Pastor le Evangelist hna cu tangka phawtu ah i tel ve hlah u. Thawngtha biatak tu chim ko u. “Atu bantuk harnak kan ton lio caan hi Chin mi vialte kan piantharnak caan si hram ko seh, ti hi ka saduhthah ngan bik a si.

“Khoi ah hme Thawngtha cu”, Luka 2:10 “Nan sin ka rat cu nan ca i thawngtha he a si, cu thawngtha nih cun mi vialte sinah lawmhnak a tlunter lai”. 1. Mary le Josef cu Nazaret in meng 90 hlat nak Bethlehem ah an kal. Khing rih hlei ah tluninn an tong lo. Caw inn ah sen a pek naute Jesuh a hrin. Ralhrang tih ah meng 500 tluk a hlatnak Izip ram ah ralzam in an va um. Mi inn tang maw an hlan hnga, mi pek chom maw an hei ei ve ko hnga? Khoi ah hme thawngtha cu?

2. Kum hnih tang pa vialte ralhrang nih an thah hna. Zeiti ko in dah an thah hna hnga? Thingtan in maw an tuk hna hnga? Namte in maw an hnawng an tan hna hnga? Hringtu an nu le hmaika ah a si fawn lai. Aho nih dah a celh lai? Ngamh khawh lo tiang in an tap lai. Khoi ah hme thawngtha cu?

3. Chinmi tampi Ralhrang tih ah Mizoram ah ralzam in an vai. Lungfim lo semmawng rual le sunghno nu hna bia phunphun an i hal hna. Semmawng, “Nunu, tlung cang u sih, hika um cu ka huam ti lo”. Sunghno nu, “Ka fa, tlun khawh asi rih lo, kan tlun ahcun ralhrang nih an kan thah lai”. Biangno cungah mitthli luang dulmal.

Semmawng, “Nunu, ziah na tah?”. Sunghno nu, “Ka dawt, ka tap lo, i hngilh cang mu” ti pah in a biangah a hun hnamh.
Semmawng, “Nunu, ka rawl a tam, arti ka duh”. Sunghno nu, “Arti a um lo, khua kan tlun tikah arti tampi na ei te lai”. Semmawng, “Nunu, papa hi ziah a rak lawi bal lo?” Sunghno, “Papa cu vancung ah ai din cang, a rak kir ti lai lo, vanram kan kal tikah a rak kan dawn te lai”. Dang a khar.

Semmawng, “Nunu, ziah papa cu vanram ah a kan kaltak?” Sunghno nu, “Ralhrang nih meithal in an kah le a thi”.
Semmawng, “Ziah ralhrang nih an kah?”. Khua zaza a ruat. Sunghnu nu, “An sual tuk le an kah ko hme cu”. Semmawng, “Nunu, ka u nih, inn kan ngei ti lo, a kang dih, a ti”. Sunghno nu, “Aw ralhrang nih an khangh. Bawipa nih inn tha deuh mi a kan pek te ko lai”.

Semmawng, “Nunu, ka khua a sik tuk”. Sunghno nu, “Ka dawt, puan lum a um lo, ka tak lum ah hin i lumh ko mu, rak ka naih deuh, kan kup lai”. Ban khat a tlinh, ban khat in a keng a muaipiak. Semmawng, “Nunu, hika ah hin zei tiang dah kan um lai?” Sunghnu nu, “Ka thei ve lo. Ralhrang kan tei tikah kan tlung te lai”. Semmawng, “Ralhrang cu ka upat tikah ka vuak te hna lai”.

Sunghno nu, “Laimi vialte nih thla kan cam lai i Bawipa nih ralhrang cu a kan teipiak te ko lai mu. Khah, thla kan cam ta hna lai”. Khup bil in chungkhar thla an cam hna. Nu le pa caah cun mitthli hnawh cawk lo. thinlung kekkuai in thlaza an cam. Mitthli a luang zungzal ko. Khoi ah hme thawngtha cu?

4. Thawngtha cu Khrih Jesuh hi a si. Christmas cu a hmun ah si lo, biakinn zongah si lo, inn tamhnak zongah si lo. Khrih Jesuh he nun hi a si. Immanuel Pathian nih a zungzal nan sinah ka um lai a ti. Thlarau in kan chungah a nung. Vancung ah inn a kan sakpiak. Thlarau hruainak in nung u sih.

Bawipa nawl hi ngai ko hna u sih. Amah he um ahcun vanram a si zungzal ko. Josef zong ralzam nak Izip ram ah Bawipa nih thluachuah a pek ko. Ralzam lungput hi mertak u sih law Khrih Jesuh he nung zungzal hna u sih. Kan herhmi thluachuah a kan pek hrimhrim ko lai. Credit: Sailo Pa