Even Kan Ram Damnak Ding Caah Ahodah A Sual A Ngaichih Lai!

KAN RAM DAMNAK DING CAAH AHODAH A SUAL A NGAICHIH LAI?
===========
Ahodah a lung a țhum lai? Ahodah a PATHIAN Hmai a kawl lai? Ahodah a lam țhalo a mer taak lai? Moses nih a hruaimi Israelmi hna cu, BAWIPA sinin an thinlung a pial i siasal an biak tikah, Moses tu aa ngaichih i ni 40 le zan 40 ti lo rawl lo in a Miphun caah thla a rak cam.

Nehemiah cu Jerusalem kulh vampang a cimdih ti a theih tikah, rawl ul lengmang le thlacam lengmang in a um i amah sualnak le a pa chungkhar sualnak le a Miphun sualnak phuangin nawlnak a tuah ( Neh 1:3-11). Daniel nih saltaang a Miphun caah rawl ulhnak le buri puan i aih in le vutcam i phulh in thla a cam i sual phuannak le nawlnak a tuah ( Daniel 9:3-19 ).

Juda siangpahrang Jehoshafat cu amah doh awkah mibu nganpi Edom in an ra ti a theih tikah, a thin a phang i BAWIPA kha kawl awk kha aa tim i Juda ramchung vialte ah rawl ulhnak a thanh ( 2Chan 20:1-4). Nihin kan Miphun ningin rai le raal nih thah le hrawh dih a kan timh lio caan ahhin, ahodah a lung a țhumh lai e? Ahodah BAWIPA Hmai a kawl lai e? Ahodah a lam țhalo a mer taak lai?

PATHIAN rianțuantu vialte nih kan lungțhum usih, BAWIPA Hmai kawl usih, kan lam țhalo in i mer hna usih. PATHIAN rian hi ka țuan rih ko lai a timi vialte nihcun, zeidang zeidangnakin rawl ulh lengmang le thlacam lengmangin BAWIPA Hmai kan kawl awk a si.

Miphun hruaitu, khuanu khuapa, Mino hruaitu vialte nih kan lungțhumh usih, BAWIPA Hmai kawl usih, kan lam țhalo mer taak hna usih. Cuticun, rawl ulh lengmang le thlacam lengmangin kanmah sualnak le kan chungkhar sualnak hna le kan khrihfabu sualnak hna le kan Miphun sualnak hna phuangin nawlnak tuah hna usih. Chinmi kan za tein, kan lung țhumh hna usih, BAWIPA Hmai kawl cio hna usih, kan lam țhalo mer taak cio usih.

Atu lioah dohmi raal pathum kan ngei i, rai le ralhrang le a sualmi kan thinlung hi an si. A sualmi a thinlung remh a duh lomi paoh cu, Miphun caah raal nan si. Kum 70 renglo sal a rak taang cangmi Chinmi/Laimi thinlung hi remh a si lo ahcun, Ram țhabik hmanh ram nuamlo bik ah kan ser thiamthiam ko lai.

Cucaah, PATHIAN rianțuantu thokin, ram hruaitu, khuanu khuapa, Mino hruaitu, kan zapi tein, kum 70 renglo sal i tlaih i hrawh cangmi thinlung hi hlonh hna usih law, PATHIAN peekmi Thinlung thar, KHRIH Thinlung tu i lak hna usih.

Tei nak Lam thluan kan kal nuahmah lio ahhin, A sualmi kan thinlung cio hi kan i remh pah cio ahcun, kan phak laimi kan Ram te cu zeitluk indah aa dawhmi le a nuammi a lai! Lungputțha cungah kan Ram hi sa in ser hna usih. Saltaan lio lungput hna kha cu hlawin hlonh ko hna usih. Kan Khamhtu MESSIAH țhutnak caah kan thinlung remh hna usih.
JESUH KHRIH cu Chin Miphun cungah Sunpar ko seh. KHRIH Lamkaltu, Tluang Lian ( Martar )