Evan Le Pastor Pawl CDF Nih An In Hlam Hna, An Inn Ngai Hna!

Evan Le Pastor Pawl CDF Nih An In Hlam Hna, An Inn Ngai Hna!
=========
CDF Chungtal nih Pastor le Evan hna nih kan buk teah kan tlawng hna sehlaw Pathian bia in thzaang kan pe kho hna sehlaw kan i lawm tuk ko hnga, Pathian bia in thazaang pek kan herh ko tiah an ti. Hihi, minung pakhat hnih lawng nih an chim ko. Nain, a si awk a si ko caah le an duhnak a si cio ko lai tiah ruahnak ngei in kan rak langhter.

Mahhlan ah mi tlawnte nih an chim pah tawn mi cu CDF kan fale Wine le Beer din an hmang an ti pah tawnmi hna hi Pastor Le Evan nih cun ruah ah siarem in thut ko awk a tha lo. Kan kal ah cun a thatnak a chuahpi hrimhrim ko lai tizong ruahchannak ngei bu in rak langhter mi a si.

Covid-19 ruang le Min Aung Hliang ralhrang ruang ah Chin miphun Pathian kan thangthat kho ti hna lo. Zarhpi ni ah pumh a um ti lo leng ah Inn Chungkhar thlacam tik ah kan tling tilo. Ram lak ah kan fa dawt cheukhat cu khua an sa cang, micheu cu an um thai tilo, ruah ah ngaih a chia kho tuk. Khuachung ah hawikawm rual he chawh le vah zong kha an ngai tuk cang.

A bik in Biak Inn ah Pathian thangthat kha an ngai hlei khun, Mino an si caah an duhmi a tam, an herh mi a um len, an i nunpi ding ah Pathian bia in thazaang pek zong a rak biapi tuk ve. Cu caah Evan le Pastor hna nih CDF/CNA an umnak buk te ah kan tlawn piak kho hna uhlaw a tha tuk ko hnga mu. Zankhat silo zanhnih zong kan riah piak ko hna uh, Pathian nih an huhphanh ko hna lai dahkaw.

Um kalnak a har, ralhrang nih an kan thah sual lai tiah tihnak nih kan nun a kan hruai ah cun nunnak pek ngamh in Pathian riantuan aa timmi kan si lo tinak khi a lang ngaingai hnga. CDF minung hna nih Pathian bia in thazaang pek kan herh hringhran ko tiah an timi hi kan Evan le kan Pastor te nih kan theih piak sawhsawh lo tiin an herhnak zawnte ah teiman kan thluk piak kho uhlaw kan i lawm tuk ko hnga.

Kan hnu ah CDF-Thantlang chungtal minung hna cu Pathian bia in pakhat le pakhat thazang ipek kha an ngai tuk cang ii khua pakhat ah an va kal i rawl ulh hna in thla an cam ti thawng kan theih. An cung ah Pathian i lawm zungzal ko seh.

Chin ram ah ralhrang hna hi CDF le CNA ral lawng an sihrim lo. Chin mi kan dihlak raltu an si. Kan biaknak le kan sining vialte thlen dih a kan timtu, hrawk dih a kan duhtu le kan citiang hmihdih a kan timtu ralhrang dohnak ah hin a lam kip in kan tikhawh tawk a um ko dahkaw. Cu caah hriamnam he ral a dohmi hna kan miphun mino, thangthar rual hna hi Pathian bia lawng silo in a lamkip in dirpi cio hna usih.

A tutan kan teilo sual ah cun Pathian hmanh kan thangthat kho ti lai lo, kan nung nain mithi kan lo te lai. Teilo a ngah bak lo mi ral a si. Pastor le Evan nih an hmuh khawh ii an thinlung ah Pathian nih rian a tuannak hnga share cio usih. Credit: Voice Of Chinland