Daw Aung San Suu Kyi; Hihi rak thei peng , rak philh hlah!!

Kum 2016 lio ah ka rak chim bal cang! By-John
======================
John nih “Kum 2016 lio ah ka rak chim bal cang, Tlampal tal cu a dik ko rua tiah ka ruah. Kachin cu ral a doh(tuk)ter lai, AA cu a sin(thianhfianh)ter lai. Rohingya buaibainak kong ah MAL cu a bomh i a humhim. A tu ah Daw Aung San Suu Kyi cu Vawleicung ram nih bia chung hmanh an khumh (telh) lo caan hi a tam ngaingai cang.

Tlangcung mi hna i hnatlaknak, cohlannak, dirkamhnak tel loin hmai lei ah Daw Aung San Suu Kyi i a ramkhel khuallam hun (on) dingah a fawi lo. Aa techia fon lo. A tu bantuk in (SAC ralhrang nih uknak an laak hlan) a san nak hmun ah a phakter kho tu hna chungah atam bik cu Tlangcungmi an si timi hi Daw Suu nih a philh lo ding ah a herh, a theih peng ding a si.

Tlangcung mi hna i hnatlakpinak, cohlannak, dirhkamhnak tel loin (congah loin) Daw Suu i a ramkhel cu vawleicung pi nih cohlan, hnatlakpi le lomhpi ding timi hi a si kho lomi a si.” a ti. Crd-John

Relchap,UK Prime Minister Ca Ah Conservative Party Nih Liz Truss An Thim! United Kingdom Prime Minister ah Conservative Party nih ramleng minister Liz Truss cu an thim. Keimah nih Prime Minister rian ka ṭuan ahcun runvennak ca ah Budget ka kaiter lai i ngunkhuai ka ṭumter lai, tiah vote kawlnak campaign lio ah a chim.

Amah he aa cuhṭi mi Finance Minister hlun Rishi Sunak nih cun vote 60,399 a hmuh i Truss nih cun vote 81,326 a hmuh ca ah Truss nih cun a tei. Truss cu thaizing ah British Siangpahrang nu Elizabeth nih phungning tein rian a luh lai, tiah theih a si. Liz Truss nih hin Boris Johnson cu UK prime minister sinak a chan lai.

TATA Sons Chairman Hlun Cyrus Mistry Cu Mawṭaw Cangsual Tonnak In A Thi! India ram ah Company ngan bik pakhat a simi TATA Sons Chairman hlun Cyrus Mistry cu mawṭaw cangsual tonnak ruang ah nizan september 4 ah a nunnak a liam. Cu mawṭaw cangsualnak ruang ah cun midang 1 zong a thi ve i, minung 2 hliam an tuar tiah theih a si.

Cyrus Mistry thih cu India ca ah chawlehnak lei sungzawtlaknak nganpi a si, tiah Prime Minister Modi nih cun a chim. Kum 54 a simi Cyrus Mistry cu a rianṭuannak ah ceihhmai a rak ton ngai caah 2016 ah khan TATA Company Chairman sinak in an rak dinhter.

TATA Sons cu Cite, Steel, software le thil phunphun a chuah i vawlei cung ram 100 reng lo ah a cawlcang cuahmah mi an si. Mawṭaw khawndennak an tonnak hmun hi Maharashtra ramkulh chung, Palghar khua, mumbai in km 100 hrawng ah a um mi a si.

Matupi Peng, Lay Khua Hleidonh Pawng Vawlei a Cimh Ruang Ah Khualtlawngmi Harnak An Tong, Chin ramkulh, Matupi peng, Lay khua hleidonh pawng cu September 2 zaan ah vawlei a cim nain, atu tiang an remh khawh rih lo caah khualtlawng mipi hna cu khuapi chung in kee thum ngei(tung-bing) le motor in an don hna, tiah theih a si.

Vawlei a cimh ruang ah cycle cu nam chom in a kal kho nain, motor cu a kal kho ding a si lo. Cu caah Matupi in Mindat lei kal aa timmi khualtlawng mi hna le Matupi khuachung luh aa tim mi khualtlawng mi hna cu lam a cimhnak hmun ah kal khawh a si lo caah an thlah/don hna tiah theih a si. “SAC ralkap lei nih lam cu ser an duh nain tualchung hriamtlai phu hna nih remhnak nawl an pek hna lo caah a si lai,” tiah tualchung mi pakhat nih a chim.

Pakokko Hleidonh SAC Ralkap Gate Cu PDF Nih An Kah Hna I SAC ralkap 3 An Thi, Magway ramṭhen le Mandalay ramṭhen aa tonnak Ayeyarwaddy hleidonh gate ah a ummi SAC ralkap hna cu September 4 chunhnu ah Pakokko PDF phuhnih fonh in nu pakhat le pa pathum nih an kahdoh hna i, SAC ralkap 4 an thah hna pinah hriamnam zomg an lakpiak hna, tiah theih a si. Pakokko PDF a simi nu ralkap May Po Toe le a hawile pa pathum nih cun meithal 2 an lak khawh, tiah Pakokko hriamtlai phu nih cathanh an chuah.

SAC Ralkap Sin Ah Meithal A La Khotu PDF Chungtel Pakhat Cu Ks. Sing 5 An Pek: Kahdohnak chung ah SAC ralkap sin in meithal a la khotu PDF pakhat cu bawmchantu pakhat nih Ks. sing 5 laksawng a pek, tiah ṭuanvo ngeitu pakhat nih a chim. “Tanintharyi ramṭhen chung kahdohnak ah PDF nih SAC ralkap hna sin in an meithal pakhat a lak khawh ahcun Ks. Sing 5 pek khawh ding in i zuam a si. Atu tan hi Taningtharyi ramṭhen chung ah a voikhatnak pekmi a si, cu zong cu bawmchantu pakhat bawmhnak thawng in kan pek,” tiah ṭuanvo ngeitu pakhat nih a chim.

Boatpin (ဘုတ်ပြင်း) ah SAC ralkap ralbawi nih zulhmi motor 3 cu September 1 ahkhan PDF nih bomb an puahhnawh hna i, cu lio ah cun PDF pakhat nih meithal cu a lak khawh. Motor 3 chung ah pakhat cu bomb nih a khenh caah a rawk dih, SAC ralkap 2 an thi i, 2 hliamhma an tuar tiah Boatpin(ဘုတ်ပြင်း) peng tualchung hriamtlai phu nih cathanh an chuah.

Natogyi PDF le SAC Ralkap Kahdohnak Ah SAC Ralbawi Telh in Ralkap 11 An Thi, Mandalay ramṭhen, Myinchain pengkomh Natogyi(နွားထိုးကြီး) peng ah cawlcanghnak a tuahtu Natogyi PDF nih, SAC ralkap hna cu hriamngan hmang in voi li tiang an kah hna caah SAC ralkap lei ralbawi pakhat tel in ralkap 11 an thi i, 10 leng fak ngai in hliamhma an tuar, tiah Natogyi PDF(NPDF) in ṭuanvo ngeitu nih a chim.

Natogyi PDF nih September 2 ah Natogyi peng Pyinsi(ပြင်စည်) khua sianginn ah umhmun a khuarmi SAC ralkap hna cu hriamngan in an kahdoh hna caah SAC ralkap 4 an thi, pakhat a kee bul tiah theih a si. SAC ralkap hna cu Pyinsi (ပြင်စည်) khua ah umhmun an khuarnak caan a sau cang caah khuachung mi hna sin in phaisa kholhnak an tuah i PDF nih an kah hna, tiah theih a si.

Cun, Mahlaing peng Tatkaygyin(သက္ကယ်ကျင်း) khua ah umhmun a khuarmi SAC ralkap hna cu hriamngan in kahdoh an ton caah SAC ralkap 3 an thi i, fak ngai in ralkap 4 hliamhma an tuar, tiah September 2 ah Natogyi – PDF nih an thanh. A luancia August 7 zong ah khan Natigyi ah umhmun a khuarmi SAC ralkap hna cu chinlung an i celh lio ah PDF nih hriamngan he aa naih tein an kah hna. Ralbawi pakhat telh in ralkap 4 an thi i, 5 hliamhma an tuar, tiah theih a si.

August thla chung le September 2 tiang Natogyi PDF cawlcanghnak ah SAC lei ralbawi pakhat telh in ralkap 11 an thi i, 10 cu fak ngai in hliamhma an tuar, tiah Natogyi PDF nih an thanh.

Germany Nih Oil Man Kai Tukmi Tawlrelnak Ding ah Euros 65 Billion Hman a Timh! Oil le thil man a kai tuk mi tawlrelnak ding ah Germany nih cu Euros 65 billion hman a timh kong september ni 4 ah a thanh. Russia sin in an hmuhmi oil a tlawm tuk cang caah atu bantuk in Germany nih cun timhtuahnak a ngeih kong a thanh i, ṭhal caan a phak hlan ah kan thawk lai, tiah Prime Minister Olaf Scholz nih a chim.

Russia cu zumhtlakmi oil petu a si ti lo caah Germany ram nih cun oil kong ah anmah tein an i tawlrel ding kong a chim chih. Oil man lawng si lo in ramchung ah phaisa tam tuk mi le thil man a karh tukmi(inflation) tawlrelnak ah ram mipi le chawlettu hna bawmhchanhnak ding zong ah Euros 65 billion chung in kan hman lai, tiah a chim chap.

Russia nih Ukraine ram a tuk hnu in Europe lei ah Nord Steam Pipeline in Russia nih Gas a pekmi a tlawm tuk cang caah Germany le Europe ram hna ah oil/gas man a hung kai ngai.

Mon ramkulh, Thanphyozayat Peng Ah KNLA nih SAC Ralkap 8 an Tlaih Hna, Mon ramkulh, Thanphyozayat(သံဖြူဇရပ်) peng, Wahgaleo(၀က်ကလိ) khua SAC hrambunh SAC training peknak sianginn in a kir mi, SAC ralbawi Lieutenant Colonel pakhat le ralkap dang 7 cu KNLA le Taungngio(တောင်ညို) hriamtlai phu nih nizaan September 4 zaanlei sml 2 hrawng ah kan tlaih hna, tiah an thanh.

Yee peng, Aayotaung(အာယုတောင်) SAC hrambunh Khah-Mah-Yah 343 in Lieutenant Colonel Hla Tin(လှတင်) telh in SAC ralkap 4 le Yee SAC hrambunh Khah-Lah-Yah 61 in SAC ralkap 4 cu zaanlei sml 2 hrawng ah, Watgaleo(၀က်ကလိ) in Yee(ရဲ) lei ah motor in an kal lio ah an tlaih hna, tiah theih a si.

Cu SAC ralkap 8 hna cu Watgaleo(၀က်ကလိ) khua SAC training pek sianginn number 4 ah rank kainak training a kaimi an si, tiah theih a si. Cu SAC ralkap hna sin ah cun thingkuang zong kan tlaih chih i hriamnam aa tel le tel lo theih a si rih lo, tiah an langhter.

Baukpin Peng Nihnih Chung Kahdohnak Ah SAC Ralkap 4 An Thi, PDF Nih Meithal Zun 2 An Laak, Tanintharyi ramṭhen, Baukpin(ဘုတ်ပြင်း) peng ah SAC ralkap le PDF kar ah September 3 le 4 chung kahdohnak a chuak i, SAC ralkap 4 an thi. PDF lei nih meithal zun 2 an laak, tiah Tanintharyi Naga PDF sinin theih a si.

Baukpin peng Wawdin(ဝါးဒင်း) kahdohnak ah SAC ralkap 4 cu cycle 2 in an kal lio ah Flying Star (PDF) nih an kah hna caah SAC ralkap Naing Htun cu a thi i, a dang ralkap pawl cu an hliamhma he Baukpin sii-inn ah an kalpi hna. An meithal zun 1 zong PDF nih an laak, tiah theih a si.

Cu bantuk ṭhiam in Baukpin peng Wawdin R Zero zone ah September 4 zanlei sml 6:30 ah SAC ralkap 3 a zaammi cu anmah lei ralkap nih an kawl hna lio ah ṭangrual PDF nih an kah hna caah SAC ralkap 3 an thi, meithal zun 1 an chuh hna, tiah theih a si.

Rohingya Ralzam Hna Cu Bangladesh Rampi Ca ah Thilrit An Si – PM Sheikh Hasina, Rohingya Ralzam hna cu Bangladesh rampi ca ah Thilrit an si caah ramdang hna zong nih bawmh chanh cio i lam kawlpi cio ding in Prime Minister Sheikh Hasina nih a chim.

Rohingya ralzam hna cu Bangladesh ram ca ah thilrit ngai an si, ram lian a si mi india zong nih cohlan awk ṭha a si ko nain a cohlanmi hna hmuh awk a um tuk lem lo, Bangladesh ram chung ah hin Rohingya ralzam 1.1 million an um i, an umnak hmun an kir khawhnak ding ah innpa ram hna he ceihhmainak zong kan ngei cuahmah lio, tiah PM Sheikh Hasina nih cun a chim.

2017 ah Rakhine ramkulh ah Myanmar ralkap hna nih Rohingya miphun cung ah fak tuk in thahnawnnak a rak tuah caah Rohingya minung tampi cu Bangladesh ram ah an rak zam hna, Rohingya miphun cung an tuahsernak ruang ah Myanmar ram cu ICJ ah miphun cihmih lainawnnak case in tazacuai an rak si.

Sagaing Ramṭhen, Tamu Ah Misual 5 Cu Korkha Mino Nih An Tlaih Hna! Sagaing ramthen, Tamu peng chung Yamyo-Yadana-Kyaw(ဇမျူရတနာကျော်) pawng ah Korkha(ဂေါ်ရခါး) mino nih September 3 ah khan misual 5 cu an tlaih hna, tiah theih a si. Cu kong he pehtlai in September 3 zaanlei ah, misual 5 cu Korkha inn ah luh an i tim i, cu lio ah security hngakmi Korkha mino le khuami hna i bawm in misual 5 cu kan tlaih hna nain, 2 cu an zaam ṭhan, tiah Korkha mino pakhat nih a chim.

Cun, August 30 zaan ah Padeta Restaurant pawng dawr pakhat ah cycle pahnih a tlau. Cu cycle zong cu atu kan tlaihmi hna misual 5 sinah kan hmuh ṭhan, tiah a chim chap. Tamu ahhin misual nih inn luhhnawh le fir a tam chin lengmang i, Phyosawhti pawl tuahsernak a si, tiah khuami hna nih an chim.

Tanintharyi Le Magwe Ramthen Chung Kahdohnak Ah Phyosawhti 2 le Ralkap 4 An Thi! Tanintharyi ramṭhen, Laythit(လယ်သစ်) le Thingchaungwa(ထိန်ချောင်း၀) khua pawng ah, nizaan August 4 zinglei sml 11 hrawng ah khan SAC le tualchung hriamtlai phu kar kahdohnak a chuak i, SAC ralkap 3 le Phyosawhti 2 an thi, tiah Tanintharyi Pah-Kah-Phah nih an thanh.

Cu kahdohnak ah cun Myeit tualchung hriamtlai phu, Tanintharyi Pah-Kah-Phah, Tanintharyi Pyohcia, Tanintharyi Yoma hna an i bawm i, tualchung hriamtlai phu lei hliamhna tuar um loin hnu an tolh kho, tiah theih a si.

Cu bantuk in, Magwe ramṭhen, Pakokko peng, Aapin(အာပင်) khua ah umhmun a khuarmi SAC ralkap hna cu September 4 zaan lei ah Yuamyoh(ရွာမြောက်) in Kinpun(ကင်ပုန်း) lei rallam an sial lio ah Royal Defence Force(RDF) Pakokko nih an kahdoh hna i, SAC ralkap 1 a thi, tiah theih a si. “SAC ralkap nih hriamngan le hriamhme hmang in an kan kah nain kanmah lei hliamtuar um loin hnu kan tolh kho,” tiah RDF nih an thanh.

Rohingya ralzam hna cu rampi ca ah thilrit an si, tiah PM nih a chim lio ah hin Bangladesh ram cu kan chawlehnak a ṭha ko, rampi chawlehnak hi US$416 Billion a si i vawlei cung ram ah rang ngai in chawlehnak a ṭhangcho mi ram a si, Sri lanka bantuk in kan har lai lo, tiah a chim.

Tilian Ruangah Harnak A Tongmi Pakistan Mipi Singkhat Renglo Chungtlik Zawtnak In An Zaw! Pakistan ram Tilianhnak ruang ah harnak a tong cuahmahmi ramchung mipi singkhat leng cu chungtlik zawtnak in an zaw hna i, cuar/vun zawtnak zong an ngei hna, tiah ngandamnak zung minister Azra Pechujo nih nizan september ni 4 ah a chim.

Cazin ning in chungtlik(Diarrheoa) zawtnak in a zaw mi hi minung 134,000 an si i, toh-kuai zawtnak in a zawmi minung 44,000 an si tiah theih a si. Tilian harnak a tongmi chung ah hin cuar/vun zawtnak in a zaw mi singkhat leng an um. Cun, Rul nih a cukmi 100 le Ui sehmi minung 500 renglo an um.

Pakistan ram chung ah naupawi liomi minung 650,000 renglo an um i cu chung ah minung 730,000 cu hmai thla chung ah a ngei ding an si hna, cu chung ah a tam u cu siizung ah an kal kho hna lai lo, tiah United Nations Population Fund nih an chim. Tilian ruang ah harnak a tongmi chung in naupawi lio minung 47,000 an um i cu hna cu i dornak camp sakmi ah an chiah hna, tiah theih a si.

Pakistan ram ah a thla in ruah a sur caah cuhlan rak ton tuk bal lo mi tilian harnak an tong i, inn 1.5 million(nuaikhat le cheu) a rawk, hlei 243 le lam 3500 renglo zong an rawk, tiah theih a si.

Khampat Siangsangrun No.2 Sianginn Hmun Chung Ah Puahkehnak A Chuak, Sagaing ramṭhen, Tamu peng, Khampat khuachung no.2 sang, Siangsangrun no.2 hmun chung ah nizaan September 4, zaan suimilam 10:30 luan hrawng ah khan bomb puah thawng voikhat a thang, tiah theih a si.

Khampat khuami pakhat nih cun, “Sianginn zong a hrawhmi a um lo, kan ruahning ah cun sianginn an kai caah ralrin peknak ah tiin tualchung hriamtlai phu nih an puahmi a si kho tiah kan zumh, cu hlan zong ah ngakchia sianginn kai lo ding in Khampat dawr chung ah catar an rak thlai bal cang,” tiah a chim. Puahkehnak a chuakmi kong ah zei phu nih an tuahmi a si theih a si rih lo. Khampat cu Tamu-Kalay motor lampi ah a ummi khua pakhat a si.

Bago Ramṭhen, Tharyarwaddy Ah SAC Ralkap Thawngpetu Pahnih Kah Thah An Tong, Bago ramṭhen, Tharyarwaddy peng ah SAC ralkap thawngpetu, pahnih cu nizan September 4 chun ah tualchung hriamtlai phu nih an thah hna, tiah theih a si. Thah a tongmi hna cu Hlekulan khuakomh Mayaninn(မရမ်းအင်း) khuami inn hra uktu a fapa, Aung Chit le Bukyikone(ဘိုကြီးကုန်း) khuami inn hra uktu Aung Hpe an si, tiah theih a si.

Annih hi phung ning loin caw an zuar mi an si. SAC ralkap sin luhchuah khawhnak ca ah phaisa an va pek hna i, an ṭin lei ah thah an ton hi a si, tiah tualchung mi pakhat nih a chim. Mayaninn(မရမ်းအင်း) khuami inn hra uktu a fapa, Aung Chit le Bukyikone(ဘိုကြီးကုန်း) khuami inn hra uktu Aung Hpe cu Tharyarwaddy Kanone(ဂဠုန်) hriamtlai phu nih kan kah thah hna, tiah cathanh an chuah. A luancia August 30 lio zong ah Tharyarwaddy peng, Yedwin Kone khuakomh khuabawi Kyaw Aye zong thah a rak tong cang.

Shwe Bo Ah Thilri Chantu SAC Ralkap Motor Cu PDF Nih Bomb An Puahhnawh Caah Ralkap 2 An Thi: Sagaing ramṭhen, Shwe Bo-Mandalay lam ah thilri chanh ding in a kalmi SAC ralkap motor cu, PDF ṭangrual phu hna nih bomb kan puahhnawh caah ralkap 2 an thi, tiah Shwe Bo Defense Force(SBDF) nih cathanh an chuah. September 3 zing sml 8:30 ah Sagaing lei in Shwe Bo lei ah a kalmi SAC ralkap motor cu, Shwe Bo khua thlanglei Bungboe(ဘုန်ဘွဲ့) khua pawng ah bomb an puahhnawh, tiah theih a si.

PDF ṭangrual phu hna nih bomb lung 10 in an puahhnawh i, ralkap 2 an thih lengah SAC ralkap motor pakhat cu a rawk. Cu kahdohnak ah cun Shwe Bo Battalion 23, Shwe Bo Defense Force (SBDF), Myanmar Defense Force MDF-Shwe Bo le Yechophyo Guerrilla hna i bawm in kan puahhnawh hna, tiah Shwe Bo Defense Force(SBDF) nih cathanh an chuah.

SAC Ralkap Cu Myaung Peng Khuate Ah An Luh Caah Khuami 3000 Leng An Zaam, Khuami 13 An Tlaih Hna, Sagaing ramṭhen, Myaung peng chung ummi khuate 9 ah SAC ralkap pawl an lut i, khuami 3,000 leng cu zan ah an zaam dih. Khuami 13 zong SAC ralkap nih an tlaih hna, tiah Myaung PDF nih cathanh an chuah.

SAC ralkap pawl nih Nabat khua cu September 3 zan sml 11:00 hrawng ah an hrawh dih. September 4 zanlei ah Bukaing(ဘူးကိုင်း) khua ah an lut ṭhan i, Bukaing khua telh in khuate 9 cu an zaam dih hna, milu in 3000 hrawng an phan lai, tiah theih a si. Nizan September 4 zanlei ah Myintthar le Ngayan U(မြစ်သာနှင့် ငါးရံ့အိုရွာ) khuami pa 13 cu SAC ralkap nih an tlaih hna i, an thilri an phorhter hna. Rallam an sialnak hmun lei ah an kalpi hna, tiah theih a si.

“Ralzam in a ummi hi minung 3,000 leng an si. Ralhrang pawl cu hmunhnih in rallam an sial. A hlan ahcun chun ah an kal tawn nain, atu cu zan zong ah rallam an sial cang. Ralhrang pawl cu Bukaing khua chungah an um rih ko,” tiah Myaung PDF ṭuanvo ngeitu pakhat nih a chim.