Dalaan zangfah hlah uh ati tu hi CDF Upa an si lo. NUG le Dr. Sa Sa tu an si ti hi

Ralram le Lanhtak Puai le Himnak!
=========
Israel mi cu Inn chung ah an um. Innka an khar. Innka tung ah tuu thi an neh. Ahohmanh leng an chuah lo. Cu caah, Izip mi fapa hna an thih lio ah Israel mi an him. Chinram hi ralram asicang tihi hngalh a herh. Hakha le Thantlang chin chin cu Suimilam (24) chung ralram asi cang. Nazi tem kip le hmunkip ah raldoh khawh asi.

Ralram ahcun a lengmi, i chawkvah phung asilo. Duh poah in Khuapi (Hakha) chung lutchuak phung asilo. Raldohnak hmunhma na va phan sual ahcun; Rallokap le Kan Ralkap he kah khawh kan si.

Ralkap cu Uniform (Thuam) he tlunkal in i chawk rai asi ko nain, Rallokap nih Uniform loin, Saikel an cuang i, an i chawkvai lengmang. Dalaan nih thawngpang kan pe rih hna. Na Dalaan ee vung ti tikah, tehte piah tuah tiah, Cingla rualchan le pengtlang tiang in, i bawmh dih asi. Ceihngia rual nih, seh awk ah, satil an zulh dawi bang, CDF cu kan baoh hna, kan hro hna.

Dalaan ti cu na cal ah aa tial fawm lo cu ta. Thanhcaa a chuah hnawh na, Upadi in a ti na, fb ah CDF a mual pho na, CDF cung ah saza tuan na, International Law tiangin kan cheh hna. Anmah le chungkhar hlawknak caah riantuan mi bang.

Dalaan zangfah hlah uh ati tu hi CDF Upa an si lo. NUG le Dr. Sa Sa tu an si ti hi Laimi nih kan philh tawn. Non CDMers pawl le Dalaan pawl nunnak tuanvo kan lak lo tiah NUG nih an thanh zungzal. CNA/CDF cu NUG minung asi hmasat mi an si. ZRA belte MAH minung an si ve. NUG i zulh phung ning tein, Code Of Conduct ning tein CDF nih rian a tuan. An palh sual ahcun NUG asi lai i, teinak an co ve ahcun NUG nih khim tein an ei ve lai. Cucu Laimi nih kan i fian a herh fawn.

Suimilam (24) ralram asi mi Hakha le Thantlang peng ah a herh loin, mui hnu ah, dei hlan ah na tlunkal sual ah cun tih anung tuk hrinhran. Hrial i zuam cio hna usih. Hrial awk atha lo ahcun a theih ding mi Upa le bu theih ter hmasat ding.

Mipi nih a herh lo ah i chawkvah lo ding, Mui hnu le Dei hlan ah tlunkal lo ding, a herh tuk ahcun CDF theihter ding, Dalaan tuan bak lo ding, CDF zong nih Dalaan phung thlen ding: Kan zapi tein, pakhat hmanh bau lo tein, Pennak chung lut ding ah khuakhan lairel caan acu cang, CDF he Mipi he.

Min Aung Hlaing nih Upadi le Uknak in an kan tei tilo caah thencheuhnak hi 100% a hmang i 99% a hlawhtlin ve! MAH Duhci le Chunmang A Tlintertu le Kawl Pennak (Ralhrang Ralkap + Civil) Hlawhtlin Tertu Sihram Hlahseh! MAH nih Tactics Pathum in Mipi hip in Ukpen khawh ding in aazuam. (1) Upadi in Tlaihrem (ဥပဒေယန္တယား) (2) Tha Tein Uk Khawh (အုပ်ချုပ်ရေးယန္တယား) (3) Thencheu (သွေးခွဲခြင်း).

Raldohnak ah Kawi Aung Tactics cu Anawratha (Laitlang), Sinphiosin (Kaya), Alawngphaza (Sakai + Makui) tiah min pekin (Kawl SPH min lawngte), Hmuh mi poah, Hmuh mi poah poah, Fir dih, thah dih, Mei duah dih, bauh dih, khuapi khangh dih, khua thial ter dih, timi mumal a hman.

Khuami an lung rawk cikcek seh/lungdongh cikcek seh, cu hnu ah ka cohlan hna seh timi Raldohning Tactic a hmang. Ramdang le Miphun dang va doh phun in an kan chuah hnawh hi nan lung fian lai dah. CDF le ep lo he, CDM le em lo he, a hohmanh a luat mi kan um lo. Ahim deuh mi khua le Innlo zong a um hlei lo. A tuan le a tlai lawng asi ko.

MAH nih Upadi le Uknak in an kan tei tilo caah thencheuhnak hi 100% a hmang i 99% a hlawhtlin ve. Khin Nyunt cu Ruahnak petu ah a lak fam cuh. Piosawthi hi Khin Nyunt Party an si.

KNU an tei khawh tilo caah Budish le Krifa in an then hna. KNU le DKBA tiah phu hnih ah an i then. KNU cu an then cheu rih hna i BGF an hung pawt than. Lekekaw kahnak ah Rallokap le BGF an tanh ti cang. KNU nih a nung in tlaih mi 26 kha BGF8 an i tel.

Shan cu RCSS, SSA, SSPP, TNLA, MNDAA, UWSA, Pa O tiah an then hna. AA le KIO, KIA tu hi an then khawh ve hna lo. MON ralkap hi cu an derthawm tuk caah then awk ah an ruat lem hna rua lo.

Cu thencheuhnak cu Laimi sinah atakin a langh ve cang. Zo Ralkap le Lai Ralkap nihin an i kah cuahmah ko. ZRA Le CNA an kap lio tiah CNA news Khonutum nih a tial. Chin mi mah le mah dohter kha MAH Tactic le Chunmang asi. A poi tak khi asiko. Hitler le Napoleon te ral an sungh cu voi voi khat in ral (2-3) an tuk, an doh tti caah asi.

CNA, CDF Ral hi Rallokap, Dalaan, ZRA, Non CDMers, Rallokap Tender Tuantu, Rallokap Khuabawi le Bawitlang, tiah an raldoh ding a tam tuk ngamsam. Cu chinchap ah an Dalaan Theory hi aa palh ko rua ti awk in thil a kal. Dalaan thianhlimh nak hi phaisa bawmhtu a zawr ter khawh i, thazang a derthawm ter khawh, i lungkhah lonak le i then cheuh nak a chuak kho. I zumh lonak le i rinhchanh ngam lonak a karh thluahmah cang. Pengtlang thlarau a revival ter fawn.

Mara Army hi AA nih Training an pek hna. Rakhine ram ah an um. MAH an doh ve lo i an kong hi tuak lo awk a tha ve lo. CDF Mara ah hin Thanthar arang aatlaih mi le a sen aatlaih mi tiah phu (2) an um. Dr. Sa Sa le Salai Htet Ni te thawngin derh mi hi an tlawm deuh. Khat lei pawl nih Rallokap he remhnak an tuah. Pastorte le Khua nupa nih an bawmh hna i Sabawngpi le Lailenpi (Dr. SaSa Khua) Ralkap cu kah lo ding in hnatlak nak an ngei.

Mara ram ah CDF dang le CNA meithal nan puak khawh lo tiah CDF Mara nih an ti. Nan um khawh fawn lo. Kan nawl nan buar ahcun India le Kawlram fonh in Mara nih kan in tuk hna lai an ti. CDF Mara nih meithal an puak rihlo nak aruang zong asi. Pastorte nih meithal puak loin ral an doh kan ti lai.

CDF Mara zong hi CNA kuttang siloin Mara Army le MTP/MSO (MSA) kuttang tu ah an chiah hna. Activist Mino cheukhat an zai tuk cang. Mara Ralkap hi ZRA bang ansi lo nak hnga ka thlacamnak asi. Falam Ralkap CNO/CNDF hi ZRA le Mara Ralkap bantukin ansi lai lo a ti khawh tu kan in herh ko hna.

CNF, CNA ah i pumkhat khawh loin, CDF Pakhat tang ah um khawh loin, CNO/CNDF ee, cu CDF ee, Pengtlang CDF ee, cu bu ee kha bu ee, a tam liangluang hoi ai. Vansang ah JCDF nan ti. Hihi a tha tuk ko nain mipi lei in zumhnak le bochanhnak cu nan cung ah zaa ah zaa a um khawh bak lo, i pheh thuh lo tein. Pumkhat asi ter khawh lomi CNF, CNA cu a sual, an hruaitu Upa Luban dah? Ai zaa seh Dalaan ti ka fawi te. Keimah sual ah hei chiah ko uh. Mineng nan thlak tuk hrinhran.

Chinmi kan i pumkhat khawhlo mi hi, ka khap tawkin aruang ka kawl lengmang, ka kum rupin. Ka hmuh mi cu: Kawl Luban kip nih Panglong an hrawk ahkhan aa thawk. Lung khah lo ding an rak kan tuah hi kum (70) leng asi cang. Civil Luban le Amay Suh zong an i tel (NLD Kasi ko na tein). Chakhri tlaihtu hi MAH le Rallokap ansi.

Chinmi nih pumkhat si duh ahcun Kawl Ralkap Cihmih a herh timi Theory thar cu ka hmuh cang. Kan Pupa chan bantukin Chinmi pumkhat si na duh ahcun MAH le Ralkap thah dih an herh timi Philosophy hi Techin Fapar tiangin i cawnpiak cang hna usih. Hnu kir awk kan tha tilo caah kan zapi tein (Atang mi vial nih) MAH,ZRA, etc,. Rallokap le an minung poah poah cu kan tei hlan lo tiang doh an herh ko. Credit: Joseph R. Thang