Council Zung riantuan lutlai hna umnak inn kulh chung ah ralkap an i kap

Council Zung riantuan lutlai hna umnak inn kulh chung ah ralkap an i kap
==========================
2021 April 23 zaanlei suimilaam 7:00 hrawng ah Hakha khua Council Zung riantuan lutlai hna umnak inn pawngkam rungvengtu (Security) hna anmah le anmah an i kap tiah thawng kan theih. Atu kahnak a chuah ruang ah rungvengtu ralkap minung pahnih an thi tiah kan theih.

Hi kong he pehtlai in min langhter duh lo pakhat nih, “Zeiruang ah dah an i kah ti kan hngal lo. Hi an i kah ruang ah ralkap pahnih an thi. Thawng dik kan hlat cuahmah ve. An chim ning ahcun zu an ding i an hawipa pakhat nih a dang pahnih a kah hna. Pahnih a kah hna dih hnu ah a kaptu pa zong amah le mah aa that ve. An pathum chung ah pahnih cu a hmun ah an thi i pakhat hi cu a thih le nun ding aa fiang rih lo,” tiah The Hakha Post ah a chim.
Atu an i kahnak hmun hi NLD chan lio i Minister a rak tuan mi Pu Sui Thio umnak innpawng ah a si tiah kan theih.

2021 May 5 in University, College, GTI le GTHS sianginn ah a kaimi siangngakchia cheukhat ca cawn hram an thok than lai. Myanmar ram huap University, College, GTI le GTHS sianginn i sianginn a kai mi siangngakchia cheukhat cu 2021 May 5 in ca cawn hram an thok than cang lai tiah Hakha GTI sianginn Principal Dr. Salai Tluang Za Thang sin in thawng kan theih.

Dr. Salai Tluang Za Thang nih, “Council Zung lei nih May 5 ah ca cawn hram thok than ding in thawng an kan thanh. Ca cawn hram thok than ding a si ca ah sianginn lei rian ngei mi hna zong nih a si khawh chung in rak i timlam ve uh. Cun, atu hi siangngakchia dihlak si lo in Final Year a kai mi poh an si lai,” tiah The Hakha Post ah a chim.
Ralkap nih February 1 ah Myanmar ram uknak a laak hnu in Myanmar ram huap sianginn ca chim a tam deuh cu CDM cawlcanghnak ah an i tel.

Ca chim tu ding saya/ma hna kong he pehtlai in, “Ca chimtu hi CDM an tuah pah dih ca ah kan chambau ngai lai. Cun, Final Year siangngakchia hna zong hi kai ding kan ti ko nain, anmah lei nih kai an i timh le timh lo a si lai,” tiah Dr. Salai Tluang Za Thang nih a chimchap.

May 5 in sianginn a kai than mi dihlak ni 40 chung hrawng an kai dih hnu ah camipuai tuahter an si lai tiah theih a si. Myanmar ram huap sianginn a tam deuh cu COVID-19 zawtnak Myanmar ram a phak 2020 March 23 hnu siangngakchia si hna seh, ca chimtu saya/ma si hna seh sianginn an kai ti hna lo. Credit: The Hakha Post