CNF kan pa le nih thawng thanh nak an tuah!!

SAC Ralkap Nih Kachin Ramkulh A Nang Pa Ah An Thil Tuahmi Kong Ah CNF Nih Cathanh An Chuah!!
======================
Kachin ramkulh, Hpakan peng A Nang Pa ah October 23 ah tuahmi KIO dirh kum 62 tlin lawmhnak tuah lio ah SAC ralkap hna nih van lei in kahdohnak an tuah caah sualnak ngeilo mipi telh in minung 70 nak tlawmlo an nunnak a liam mi kong le hliamhma tuarmi tampi an umnak kong kan theihmi cung ah kan ngeih a chia ngai tiah an thanhmi ah cun an langhter.

Hramhram uknak a la tu SAC ralkap hna nih sualnak ngeilo mipi hna cung ah mithah lainawnnak an tuah, hliamhma tuar mipi hna cung ah si thlopnak nawl an khamnak an tuahmi hna cu langsartuk in thil thalo an tuahnak an langhternak a si. SAC ralkap nih Kachin mipi hna cung i an thil tuahmi kong ah timh ciammam te le hramhram in an tuahmi a si caah kan doh.

CNF/ CNA nih Kachin kan uanau hna he SAC ralkap uknak cu a lamkip in kan doh lai. Cun ramkhel lei ah kan i tinhmi aa khatmi tlangcung hriamtlai kan unau hna, NUG cozah, le khuapau dohthlennak ca hriamtlai phu dihlak hna he hmunkhat teah mizapi caah dir in SAC ralkap uknak a hram a cah tiang kan doh lai.

Hpakan peng A Nang Pa khua ah a cangmi kong ah KIA/KIO in ralbawi hna le hlasak thiam hna, sualnak ngeilo mipi tampi nunnak liamnak in an tantak mi rualchin cingla hna cung ah Pathian nih lung daih hnangamnak in pe ko hna seh tiah thla kan in campi hna tiin Chin National Front nih cathanh an chuah.

Thailand Ram Ah Phungninglo In A Lut Mi Myanmar Mi 45 Tlaih An Tong, Thailand, Kanchannaburi pengkomh ah phungninglo in a lut mi Myanmar mi minung 45 cu Thailand ram nawl ngeitu hna nih October 25 ah an tlaih hna tiah Bangkok Post nih a langhter. Kanchannaburi pengkomh Maung hmunhma ah phungning lo ramri lonh in a lutmi Myanmar mi hna cu phu hnih in hmun hnih ah kan tlaihhna tiah Thailand palik phu nih an chim tiah theih a si.

Hpakan Ah KIA Nih SAC Ralkap An Bawh Hna I An Kah Hna, SAC ralkap tat-mah 33 cu October 25, zinglei suimilam 11:00 hrawng ah Hpakan peng, Tamakhan khua pawng ah KIA brigade 9 kuttang um battalion 6 nih an kahdoh hna tiah Hpakan khuami pakhat nih a chim.

Cu kahdohnak cu SAC ralkap nih October 23, zaan KIA brigade 9, A Nang Pa hmunhma ah vanlawng hmang in bomb thlaknak an tuah i minung 100 renglo nunnak a liam hnu in KIA nih a voi khatnak kahdohnak an tuah mi a si.

Khuami pakhat nih cun “tutan kahdohnak hi Hwaykha(ဝှေခါ) lei ah a si, SAC ralkap lei nih hriamngan in kahdohnak an tuah ve, A Nang Pa thlanglei ah kawl ralkap tam taktak an um, Hpakan gate hmunkip ah checkhlatnak an tuah” tiah a chim.

Tualchung mi pakhat nih cun “A Nang Pa lei ah cun phone line zong a umlo, bomb thlakhnawh ton lio ah hliamhma a tuarmi hna zong si thlop ding in chuahpi khawh an si lo, an umnnak hmun ah si va thlop ding in luhnak nawl an kan pe lo, cucaah SAC ralkap cung ah hin vawlei dong tiang kan lung a tling kho lai lo” tiah a chim tiah theiu a si.

Tlaihkhih a tongmi hna hi Dawei khuami, Nay Pyi Daw, Bago, Yangon, Magway le Mawlamyine ummi an si tiah Thailand nawl ngeitu hna nih cun an chim. Tlaihkhih a tongmi hna hi Htikhi in Thailand ram Kanchanaburi pengkomh chung ah ramlak in ramri lei an tan i, hmun dang panh thannak ding caah an mah a autu ding puai-sa an hngah lio ah tlaihkhih anton hi a si.

Riantuanding in ramleng chuah ai timmi Myanmar mi hna nih cun rian an tuankhawnak ding ca le an khuallam caah tiin puai-sa sin ah Baht 18000 in 25000 an pek tiah an thanhca ah cun an langhter chih.

A luancia October 22 ni zong ah Kanchannaburi pengkomh le Rachburi pengkomh chung ah phungninglo in a lutmi Myanmar mi 96 tiang tlaihkhih an si dang tiah Thailand nawl ngeitu hna nih cathanh an rak chuah.

Mandalay Ah Nikhat Chung Ah Phone Dawr 2 Luhhnawh In Thil Firpiak An Tong, Mandalay ah nikhat chung ah phone zuarnak dawr 2 luhhnawh le thil firpiak an tong tiah Mandalay khuachung ummi nih an chim tiah theih a si. Mandalay, Chainmyatarsi peng phungki sianginn pawng phone (second) kan zuarnak dawr cu October 25 ah luhhnawh in phone chuh kan tong tiah dawr ngeitu nih a mah social media ah a tar.

Dawr ngeitu he naihniam in ummi pakhat nih cun, minung 9 hrawng nih phone dawr cu an luhhnawh, phone a zuartu dawr cu thawng thanhnak i tuahcio a si, an lakmi hi sing 700mmk man hrawng a si lai” tiah a chim.

Cun October 25, zinglei ah Mandalay, Maharaungmay peng Maharmyine no.1 sang lam 68 nak 38/39 kar ah ummi phone dawr cu meithal lem he luhhnawh an tong, asinain cu misual hna cu tlaih an tong tiah palik he naihniam in ummi hna sin in theih a si. “Phone dawr ah misual nih luhhnawh an tong tiah thawng theih a si caah zuanhnawh cio a si, phone dawr a luhhnawh tu pa cu a meithal lem he tlaih a tong” tiah palik he naihniam in ummi pakhat nih a chim.

Butalin Pengah SAC Ralkap Nih Hriamngan A Kah Caah Tualchung Mi 2 An Nunnak Liam, 3 Hliamhma an tuar, Sagiang ramthen, Butalin peng Magyioak(မကျီးအုပ်) khuachung ah SAC ralkap nih hriamngan an kah caah nu pakhat telh in tualchung mi 2 an nunnak a liam, minung 3 nih hliam hma an tuar tiah theih a si.

October 25, zinglei suimilam 5:00 hrawng ah Butalin in a chuakmi SAC ralkap hna nih Magyioak khuachung cu hriamngan an kah bu in an lut.

“Magyioak(မကျီးအုပ်) khuachung ah SAC ralkap hna cu hriamngan thlahpah in an lut, Butalin in rallam sial ah a chuakmi an si, hriamngan an thlah caah khuachung um tualchung mi nunnak liamna le hliamhma tuarnak tiang a chuak” tiah tualchung mi nih an chim.

PDF Kalay Battalion 12 Caah Thil Zuarnak An Tuah, Sing 100 Leng An Hmuh, American, Arizona ramkulh Phoenix ah a ummi ramleng phan Myanmar mipi hna nih PDF Kalay battalion 12 ralkap hna caah fund kawlnak an tuah i, sing 100 leng an hmuh tiah theih a si.

Afek i awl zaang tein i hruk khawh dingmi uniform cawknak ding caah thilzuar in fund kawlnak cu October 22 ah an tuah, tutan thil zuar in fund kawlnak tuahmi hi a voihnih nak a si cang tiah theih a si.

Cu fund kawlnak tuahmi ah cun eidin phun kip a zuar i American dollar 3040( Myanmar phaisa in sing 10,640,000) an hmuhkhawh tiah theih a si. A luancia September thla chung ah battalion 12 caah a voi khatnak fund kawlnak tuah a rak si cang i, culio ah cun Myanmar phaisa in sing 80 leng an rak hmuh tiah theih a si.

Yetashi Ah SAC Ralkap Sin Thawngpetu Pakhat Thah A Tong, Bago ramthen Yetashi peng ah SAC ralkap sin thawngpetu tiah ruahmi Nga Htay cu meithal kah a ton caah a thi tiah theih a si. October 24, zaan suimilam 10:25 hrawng ah Yetashi pengchung ruak humhnak hmun ah Phe aa celhmi SAC ralkap sin thawng pe tu tiah ruahmi Nga Htay cu Lyinyone YPDF nih an kah caah a thi tiah theih a si.

Nga Htay cu Taungngo peng Watkhohsein(ဝက်ခေါက်စိန်) khua ah ummi a si i, a mah nih SAC ralkap sin thawngpeknak a tuah ruang ah YPDF chungtel minung 5 an nunnak a rak liam. Thawngpeknak lawng si lo in SAC ralkap he I fonh in tlerhkhonhnak le phungninglo tlaihkhihnak a tuah caah kan fimhlawm tiah Lyinyung YPDF phu in tuanvo ngeitu pakhat nih a chim.

Kaya Ramkulh, Loikaw Ah Palik Pakhat Thah A Tong, Kaya ramkulh Loikaw peng Pakan sang ah SAC ralkap kuttang riantuantu palik Thant Zaw Oo cu meithal kah a ton caah a thi tiah tualchung mi nih an chim tiah theih a si.

October 25, zinglei suimilam 10:30 ah Pakan sangchung ah a thimi palik Thant Zaw Oo ruak cu mi bawmchantu phu hna nih an char i, zeitik ah thah a rak ton le a thih ti bel fehter awk a thalo tiah an chim.

Palik Thant Zaw Oo cu Loikaw peng Pankan sang ah cycle a khalh pah ah kah a ton hi a si. Palik kah a tonnak kong ah mi zei phu nih an kah fehter a si rih lo tiah tualchung mi nih an chim.

Kalay-Tedim-Rih Mawtaw Lampi Vawlei A Minh Ruangah Khualtlawngmi Hna Lampi Ah An Riak, Kalaymyo, Tedim le Rihkhawdar lampi thluan cu ruah a fah ruangah hmuntampi ah vawlei an min i khualtlawngmi hna cu lampi ah zaan an riak tiah theih a si.

Kalaymyo le Tedim kar, Surngen le Takhual kar hna ah vawilei an min, cun Tedim in Rihkhawdar kar zongah hmunthum ah vawlei a min tiah theih a si. Cu ruangah cu khual tlawngmi hna cu khuallam peh kho ti loin lampi ah zaan an riak hna tiah theih a si.

North Dagon Ah Pa Pakhat Cu SAC Ralkap Kuttang Rianṭuantu Sang Inn Zauktu Hna Nih An Thah, SAC Ralkap Nih Dan An Tat Hna Lo, Yangon ramṭhen, North Dagon peng cozah hmunram chungah a ummi Ngein Chan Win le a nupi karah i sikvelhnak a chuak an ti i, inn zaa uktu le inn hra uktu hna nih, Ngein Chan Win cu a luancia October 7 lioah an rak tlaih i wire hri in an ṭem hnuah an tuk an velh i an thah beh, tiah theih a si.

An nuva in i sikvelhnak a chuah caah inn zaa uktu le inn hra uktu hna nih Ngein Chan Win cu an tlaih i, an hrem caah a nunnak a liam. A thattu hna cu SAC ralkap nih dantatnak zeihmanh an tuah hna lo, tiah sang chung ummi pakhat nih a chim.

“Sangmi nih an i sikvelh thawng cu hna a chet tuk an ti i, inn zauk tu sinah an phuan hna caah Ngein Chan Win lawng si lo a pa Htey Wa zong an tlaih. A thaizing October 8 zingka ah a chungkhar cu a ruak rak lak ding in an auh hna,” tiah a chim chap. Hi kong ah Ngein Chan Win a pa nih inn zauk tu hna cu taza a cuai hna nain atu tiang zeihmanh bialehnak a um rih lo, tiah tualchung mi pakhat nih a chim.

Philipine Ram Ah Khualtlawng Mi Phurtu Vanlawng Pakhat A Tlik Lioah Lam A Nal Caah Aa Let, Khualtlawng Mi An Him, Philipine ram ah khualtlawng mi 170 leng a phurtu vanlawng pakhat cu a tliknak lam a nal caah aa let, khualtlawng mi tu cu an him, tiah theih a si. October 23 ah S. Korea ram khualipi Soel in Cebu ah a zuang mi A330 vanlawng cu, a ṭum lei ah a tliknak lam a nal i hramh cung in a tli, tiah theih a si.

A330 vanlawng cu ṭum ding in voihnih tiang aa zuam ko nain nikhua a chiat tuk caah a voithumnak lawng ah a ṭum kho i, a tliknak lam a nal caah hramh cung in a tlik hi a si.

Khualtlawng mi 173 cu thinphang thlalau in an um ko hna nain hliamhma pumi pakhat hmanh an um lo. Vanlawng tual pawng ummi hotel ah kan chiah hna i khuallam a peh hnikmi hna cu vanlawng dang ah kan tawlrel piak hna, tiah nawlngeitu hna nih an langhter.

Indonesia Ram Ah Tilawng Pakhat Mei Nih A Kangh Caah Minung 13 An Nunnak A Liam, Indonesia ram ah mithlah/dongtu tilawng(ferry) pakhat a kangh caah minung 13 an nunnak a liam, tiah theih a si. Nizan October 24 Indonesia ram nichuah lei ah minung 250 leng aa citmi tilawng pakhat a kaang, tiah Ministry of Transport nih cathanh an chuah.

Tilawng chung rianṭuantu he minung 254 an i cit i, cu chungah 13 an nunnak a liam i 241 cu kan khamh khawh hna, tiah meithat le bawmchantu zung in ṭuanvo ngeitu nih a chim. Tilawng a kangh lioah khualtlawng mi hna cu an lau tuk buin ti chungah an zuan caah an nunnak a liam hi a si, tiah mithmutu hna nih an chim.

Tilawng a cung dot in mei kangh hram aa thawk i, zeitindah a kangh ning a si ti belte cu hngalh a si rih lo. Meithat phu tilawng 3 pinah nga tlaitu tilawng hna i bawm in an bawmhchanh hna, tiah theih a si.

Indonesia ram cu tikulh 17,000 a umnak ram a si i, rammi hna nih pawcawmnak ah ti lam hi an hman bikmi a si. Asinain humhimnak ca ah ṭihnung ngaingai a si. A luancia kum 2018 lio zong ah vawleicung tikulh vialte lakah a thuk bik ah aa telmi rili ah tilawng pakhat a rak pil i, minung 150 leng an nunnak a rak liam cang.

Myit Thar Tiva Ti A Lianh Caah Pawngkam Cinthlakmi An Rawk Dih Kalaymyo peng thlanglei Myit Thar Tiva (မြစ်သာမြစ်) ti a lianh caah pawngkam cinthlaknak dum le cinthlakmi vialte cu ti nih a phum hna i an rawk dih, tiah theih a si.

Tukum fur a dongh lai ah voithum tiang ti a lianh cang i, cinthlakmi vialte an rawh dih caah kan sung dih, tiah cinthlaknak dum ngeitu pakhat nih a chim. Tukum cu ral he kokek thil cangmi ti lianh ral he aa thuat caah a har ngaingai. Chiat kan ton kum a si ko, tiah a chim chap.

Baukpin Peng Ah Lung Phur Motor Khaltu Pa Cu SAC Ralkap Nih A Ruang Um Loin An Kah I A Thi, Tanintharyi ramṭhen, Baukpin peng ah zan sml 10:30 hrawngah lung phur motor khaltupa Maung Soe cu, a ruang um loin SAC ralkap nih an kah i a thi, tiah tualchung mi hna nih an chim.

A luancia October 22 zan sml 10:30 hrawngah Baukpin peng Pyigyi Manaing(ပြည်ကြီးမဏ္ဍိုင်) sang ummi Maung Soe(kum 27) cu lung a phurh lioah SAC ralkap nih a ruang um loin motor hmai lei in an kah caah a hmun ah a thi colh, tiah theih a si.

“Motor a dir duh lo ruang zong ah a si lo. Motor hmailei in zan sml 10:30 ah an kah hi a si. Timh ciammam tein an kahmi a si caah Maung Soe cu a ṭaang ah meithal kuan nih a khen i a nunnak a liam, tiah tualchung mi pakhat nih a chim.

SAC Ralkap Tei Khawh Nakding Ca ah Shan Ramkulh Thlanglei Ah Hriamtlai Phu An I Fonh, Hranhram uknak rang deuh in tei khawhnak ding ca ah Shan ramkulh thlang ah hriamtlai phu an i fonh tiah theih a si.

Shan ramkulh, thlanglei ah hriam a tlai liomi Force 36 Ranger၊Joe Phyu Guerillas Force၊YE-NGAN Urban Guerillas၊Urban Task Force- Aung Ban le Red Ants Guerillas Force hna cu kan i fonh cang, tiah nizan October 24 ah cathanh an chuah tiah theih a si.

Shan ramkulh, thlanglei ah hriamtlai phu a simi Local PDF le UG phu hna cu hmun khat ah an i ton hnuah atu bantukin an i fonh hi a si, tiah theih a si. An cathanh chungah hmun khat ah kan i fonh ahcun kan ṭhawng deuh lai, cun khat le khat raltuknak ah kan i bawm kho lai i, kan ral kan tei zau lai, tiah an langhter.

“Hranhram uknak rang deuh in kan tei khawhnak ding ahcun lung rual tein hmun khat ah kan ṭanṭi i kan doh a herh. Nang le kei tinak um loin awkhat in kan kal ahcun dohthlennak hi a tawi deuh suaumau ko lai,” tiah Shan ramkulh, thlanglei hriamtlai phu fonh in ṭuanvo ngeitu nih a chim.

SAC Ralkap Nih Kachin Mi, Lemcang Thiam, Hlasak Thiam Hna Le KIA Ralbawi/ Ralkap Hna An Nunnak A Liammi Cungah CJDC Nih Cathanh An Chuah, October 23 zan sml 8:30 hrawngah Kachin ramkulh, Hpakan peng Anantda(အနန့်ဒါ) khua ah tuahmi kum 62 nak Kachin Independence Organization (KIO) ni sunglawi donnak ah Kachin hlasak thiammi hna nih mizapi cu an nuamhpi(ဖျော်ဖြေ) hna lioah SAC ralkap Jet Fighter in bomb an thlakhnawh hna caah tualchung mi,

Kachin hlasak thiam, lemcang thiam hna le, KIA ralbawi/ralkap an dihlak 70 hrawng an nunnak a liam i, 100 hrawng hliamhma an pu, ti thawng kan theih cu kan ngaih a chia tuk ve, tiah CJDC nih cathanh an chuah tiah theih a si.

Ralhrang SAC nih hriamnam i bochan in, ram chungmi inn le lo an hrawh, an khangh, thilri an fir, tualchung mi an thah hna pinah biakinn zong an khangh caah sualnak ṭha lo tam tuk an tuah, tiah an langhteter chih.

Ralhrang SAC nih mizapi cu timh ciammam tein an kahdoh hna pinah miphun cihmih timh in sualnak an tuahmi hi kan cohlang kho hrimhrim lo, fak piin kan doh. CJDC nih a herh ning in teirul chamnak kan tuah lai, tiah cathanh an chuah tiah theih a si.

KIA Hmunhma Vanlawng Kah Ruang Ah Hliamhma Tuarmi 100 Renglo Si I Thlop Kholo Ding In SAC Ralkap Nih An Kham, Hpakan peng KIA brigade 9 hmunhma bom thlak hnawh an ton ruangah hliamhma tuarmi mipi 100 renglo cu si i thlop kho lo dingin SAC ralkap nih Ginsi khua chuahnak gate in an kham hna leng ah a thimi hna an ruak zong phurhnak nawl an pe hna lo tiah theih a si.

Hliamhma tuarmi hna cu Hpakan le Myitkyina sizung ngan ah thlop kan duhko hna na in, chuahnak nawl an kan pe lo. A thimi hna ruak zong an ruak vutcaam lawng laknak nawl an kan pek tiah si lei thlopnak tawlreltu pakhat nih a chim. “Khuapi lei kal khawh dingah KBC hruaitu hna nih chawnh biaknak an tuah lio a si, kal khawh a si an ti cun timhcia kan si ko” tiah Hpakan khuami pakhat nih a chim.

KIA brigade 9 hmunhma vanlawng in bomb thlak an tonnak ah KIO/ KIA chungtel lawng siloin tualchung mi hna le Kachin hlasakthiam hna tampi nunnak a liam i, minung 100 leng nih hliamhma an tuar tiah theih a si.

Ralhrang rual nih Hpakant bomh an thlaknak ah minung 80 hrawng an ruak an char cang hna, KIO kum(62) tlinnak puai an tuahnak hmun Hpakant ah zahan zaan sml 8:40 ah ralhrang rual nih vanlawng in bomb an thlak caah a tutiang ah miruk 80 hrawng an char cang i hliam a tuarmi zong an tam tiah theih a si.

A thi mi chung ah Kachin hlasakthiam hna, ringawn tumthiam hna, mino hna le mipi hna zong an i tel tiah theih a si.
“Mithi ruak hi 80 nak tam an si cang. Hma a tuarmi hna sii thlopnak kan tawlrel cuahmah lio a si” tiah Kachin Media pakhat nih a chim.

Oct 23 zaan sml 8:40 ah ralhrang hna nih ral tuknak Vanlawng pathum in KIO kum (62) tlin philhlonak Show an tuah lio ah an cung in bomb an thlak hi a si i hlasak thiam hna, ringawn tumthiam hna le mipi hna zong an i tel lio ah a si tiah theih a si.

Vanlawng In Kah Ruang Ah Hma pumi Minung 100 Renglo Cu Sii I Thlop Kho Lo Ding In SAC Ralhrang Nih An Kham Hna, Hpakant i KIA battalion 9 hmunhma ah raltuknak vanlawng pa 3 in kah ruang ah hma pumi mipi 100 renglo cu sii i thlop kho lo ding in Ginsi khua chuahnak gate in SAC ralhrang nih an kham hna tiah theih a si.

Hpakant le Myitkyina khuapi hna ah hma a pumi sii i thlop ding in kalpi kan duh hna nain ralhrang nih khua luh-chuahnak gate in an kham caah kan kal pi kho hna lo tiah mibawmchantu phu nih an chim.

Kanchin Mipi Hna A Bu In Thah Ton Ni Ngaihchiatnak Langh Ternak Caah KIO Nih Kachin Thantar Cu A Lai Tiang Lawng Thlai Ding In An Thanh! October 24 ni cu Kachin miphun hna a bu in thah ton ni a si ti tiah ngaihchiatnak langhternak caah KIO hmunhma um zung le sianginn hna ah Kachin thantar cu a lai tiang lawng thlai ding in KIO nih an thanh.

Yangon Ramṭhen, Shwepyita Peng Ah Khuabawi Hna Nupa Meithal In An Kah Hna Caah Anupi A Thi, Yangon ramthen, Shwepyita peng Pyidawta sang khuabawi hna nupa cu meithal kah an ton caah a nupi a thi tiah tualchung hriamtlai pah-kah-phah nih an chim.

October 24, chunhnu suimilam 3:45 ah Pyidawta sang khuabawi zung ah khuabawi Myo Min Tan le a nupi Mala Maw le zung riantuantu pakhat tiin minung pathum an um lio ah chaklei pengkomh tualchung hriamtlai phu le Yangon Urban Guerrilla Army(YUGA MO 7 Egale) phufonh nih an kah hna i Daw Mala Maw cu hmakhat te ah a thi tiah theih a si.

Cu khuabawi zung nih cun zung ah theihpinak ca a la mi hna le khualtlung cazin min petu hna cu bo ngai in an chawnhbiak hna leng ah phaisa kholhnak zong an tuah tiah tualchung mi pakhat nih a chim.

Tualchungmi Khua An Kir Khawhnak Hnga Hmunhma Thianhnak An Tuah Lio Ah Bomb Lamh Sualnak In PDF Pakhat Nunnak A Liam, Karenni ramkulh Demoso peng kahdohnak a rakchuahnak hmun pakhat simi khuate pakhat cu tualchungmi pawl himte in khua an kir khawh nak hnga thianhhlimh nak an tuah lio ah PDF pakhat cu bomb lamh sualnak in a nunnak liam tiah DMO Local PDF sin in theih a si.

October ni 20 zaanlei suimilam 5 hrawngah tualchungmi hna cu khualei kir dingin an i timh caah himtein an kir khawh nak hnga ti in hmunhma thianhhlimhnak an tuah i cu lio ah cun SAC leinih an hmanh ta mi bomb ai lamh hi a si tiah theih a si.

A hlan ah thianhhlimhnak cu kan rak tuah bal cang ko nain bomb kawlnak seh kan ngeih lo caah kan mit in kan kawl i ka hmuhthlu lo mi a rak um ruang ah a tu ban tuk in ruahlo pi in kan ton hi a si tiah DMO Local PDF in ṭuanvongeitu pakhat nih a chim.

Cu puahlehnak ruangah cun DMI PDF Battalion-G in tat-suh-hmu U Josep kum 41 cu a hmunah a ke pahnih ning in a bul i a nunnak liam i October ni 21 zing ah an vui tiah theih a si. Demoso PDF chungah a tubantuk in bomb thianhhlimhnak ruangah minung 13 nih hliamhma an tuar i a nunnak liam mi he cun 20 hrawng an si cang tiah theih a si.

Kanbalu Peng Zawchaung Khua Cu SAC Ralkap Nih A Voi 5 Nak An Khangh Ţhan, Sagaing ramṭhen, Kanbulu peng chaklei Zawchaung khua cu SAC ralkap nih October 24, zinglei ah a voi 5 nak an khangh ţhan tiah Kyunhla khua cawl canghnak a tuahtu phu nih cathanh an chuah tiah theih a si.

Kotaungbo(ကိုးတောင်ဘို) hrambunh khah-mah-yiah 363 in SAC ralkap nih cu ka khua cu mei khangh in an hrawh caah, tualchung mipi umnak inn 8 le Shwe Bune Daw Toe(ရွှေဘုန်းတော်တိုး) mi bawmchantu phu inn le motor pakhat an hrawh tiah theih a si. Zawchaung khua cu SAC ralkap nih voi 5 tiang mei khangh in an hrawh caah mipi umnak inn 147 tiang a kaang cang tiah theih a si.

Rakhine Ah Cyclone Thlichia A Hran Caah Poaktaw Peng Inn Cheukhat An Rawk, Minung 1000 Hrawng Har An Tong, Rakhine ramkulh Poaktaw peng Sintatmaw khua ah October 24 ah cyclone thlichia “SITRAN” a hran caah inn cheukhat an rawk tiah theih a si. Sintatmaw khua cu tiva kam ah a ummi khua a si caah ti lianh le thlichia hran tibantuk an tong tawn, inn cheukhat an rawh caah khuami cheukhat cu hmun dang ah an i thial tiah Sintatmaw khua mi pakhat nih a chim.

“Ruahsur in ti a lianh caan ah tiva ti cu a kai tuk caah ti khamnak an cim i, tiva kam ummi inn hna cu an rawk, thli faktuk in a sur caah inn rawk zong an um” tiah Sintatmaw khua mi pakhat nih a chim.

“A thli hran ning cu a fak taktak, thli hran ruang ah inn 7 hrawng a rawk, tilawng 2 a pil, minung i khawndennak cu a umlo, inn dang zong an rawk than lai ti cu phan a um, tiva kam khuasa mi cu thial an si cang hna, minung 1000 leng har tongmi an um” tiah tual chungmi pakhat nih a chim.

Kamargyi No.2 Hlei Cung In Nu Pakhat A Zuang , North dagon le Tinkankyun(သင်္ဃန်းကျွန်း) i pehtlaihnak Kamargyi(ကမာကြည်) No.2 hlei cungin October 24 zinglei ah nu pakhat a zuang, tiah theih a si.

Kum 20 hrawng asimi nu pakhat cu Kamargyi No.2 hlei cungin a zuang tiah thawng a kan thanh i kan va kawl, tiah Tinkankyun (B) sang ummi mi bawmchantu phu nih an chim. Hlei cung in a zuangmi nu nih, platform cungah bag a nakmi pakhat, tangka, address card, phone le Naciat a chiahtak, tiah theih a si.

Hlei cung in a zuangmi nu cu an kawl cuahmah lio a si i an hmu rih lo. A luancia September 14 lio zong ah Tinkankyun peng le Tharketa peng i pehtlaihnak Kamargyi hlei cung in pa pakhat a rak zuan caah a nunnak a liam bal cang tiah theih a si.

Yephyo Peng Ah Sianglairun Sianginn Uktu Nu Le Tualchung Mi 4 Meithal Kah An Tong, 4 An Nunnak Liam, Tanintharyi ramṭhen, Yephyo peng Gyiakha Tarpin In(ကျခတ္တာပင်အင်း) khua ah October 23 zinglei ah sianglairun sianginn uktu nu pakhat telh in minung 5 cu meithal in an kah hna caah 4 an thi tiah theih a si.

Sianglairun uktu nu Aye Moe Shwe inn le a pawngkam inn pakhat ah hriamtlai phu khat nih atubantuk in an kah hna hi a si, tiah tualchung mi pakhat nih a chim. “Zanṭim ah hriamtlai phu khat nih meithal in an kah hna. An fanu le cu an tlaih hna i, an hrem hna. A thimi nu hi Non CDM a si i, a vapa cu sianginn cachim rian in pension a la cangmi a si. An fanu le zong siang cachimtu an si,” tiah a chim chap.

A thimi hna cu Aye Moe Shwe(kum 44), a vapa Pho Khine(kum 43), Win Thein(kum 54) le a nupi Aung San Me(Kum 54) hna an si. Win Oo(kum 56) cu a ke a bul, tiah theih a si.

Kayin Hriamtlai Phu I Fonh Ding In Kawthoolei Army Nih Thanhca Chuah, Kayin ramkulh chung ummi hriamtlai phu dihlak ifonh lawng ah SAC ralkap hi ṭha tein kan dohkhawh hna lai caah, hmunkhat ah ifonh cio ding in Kawthoolei ralkap hruaitu Saw Nay Daa Miah nih cathanh an chuah tiah theih a si.

Kawthoolei ralkap nih khuapi laknak ding a hram thawk a si cang caah Kayin hriamtlai phu dihlak ifuntom caan a si cang tiah a chim. Tulio ramkhel sining ah SAC ralkap hna nih mizapi cungah phungninglo in an tuahmi vialte cu khuapi chung lawng silo in khuate lei tiang an tuah caah mizapi cu ṭih launak an tong, cucaah hmunkhat ah ifuntom in ralkap uknak a hramchanh a herh tiah an thanhmi ah cun an langhter chih.

A luancia 2022, January thla in Bochoh Saw Nay Daa Miah cu KNO Commander in Chief ṭuanvo in KNU nih a dinhter hnu ah July 16 in Kawthoolay ralkap a dirh i, cu a dirhmi cu kan theipilo tiah KNU nih an rak thanh ve.

Loikaw Peng Konethar Ralhrial Camp Cu SAC Ralkap Nih Hriamngan In An Kah Caah Ralhrial Pakhat A Nunnak A Liam, Loikaw peng Konethar ralhrial camp cu, SAC ralkap nih hriamngan in an kah caah ralhrial pakhat a nunnak a liam i, hliamhma pumi an tam, tiah ralhrial zohkhenhtu hna nih nihin October 24 ah cathanh an chuah tiah theih a si.

Nizan October 23 zing sml 9:00 hrawngah Mobae hrambunh SAC ralkap 422 Battalion nih, ralhrial camp cu timh ciammam tein an kah caah kum 35 tluk pa pakhat a nunnak a liam i, a nupi zong hliamhma fak ngai a pu. “Kan va phak ahcun pa cu a nunnak a rak liam cang nain a nupi cu a lu ah hliamhma he a rak ril ko. Kum 8 tluk ngakchia pakhat zong a phei ah hliamhma a pu,” tiah mi ralhrial zohkhenhtu in ṭuanvo ngeitu nih a chim.

October thla chung Karenni ramkulh ah SAC ralkap nih hriamngan kah nakin tualchung mi 1 a thih pinah 5 hliamhma an pu cang. SAC ralkap nih nawlngeihnak an lak hnu in Karenni ramkulh chung, ralhrial nak ah a nunnak a liammi tualchung mi 65 an phan cang, tiah PKPDF nih October thla thawk ah cathanh an rak chuah.

SAC Ralkap Le CDF CDM Siyin Kar Kahdohnak Ah SAC Ralkap 3 An Thi, A luancia October 13 ah Kalaymyo le Taingen khua karlak SAC ralkap sakhan, khur cawhmi hmun ah umhmun hmunhma kan la i zing sml 8:00 hrawngah SAC ralkap nih khualtlawng mi hna cu tangka hal ding an rak chuak, cu lioah pe 10 hlat in bomb in kan puahhnawh hna, tiah CDF CDM Siyin nih cathanh an chuah tiah theih a si.

Hmai a kalmi SAC ralkap pathum cu an titsa aa ṭhenṭhek dih. Cuka ahcun minutes 10 tluk hrawng kaphnih kar kahdohnak a chuak, CDF CDM Siyin lei in a thimi le aa hliammi an um lo, tiah theih a si. Cu hnuah Taingen khua um SAC ralkap sakhan in bawmh dingah a kalmi ralkap motor 3 cu Heinzing khua le Leisan Mual karah October 14 zing sml 4:48 ah minutes 8 tluk kan kah ṭhan hna, tiah CDF CDM Siyin nih an langhter.

Cu motor 1 chungah SAC ralkap 20 leng an i cit i, Taingen khua an phanh ahcun SAC ralkap 30 leng hrawng lawng an taang cang, tiah CDF CDM Siyin nih an langhter tiah theih a si.

Moemauk Peng Ah SAC Ralkap Jet Fighter Nih Bomb Thlak Aa Palh Caah Anmah Ralkap Lila A Thimi Le Aa Hliammi An Tam, Kachin ramkulh, Moemauk peng ah KIA, PDF le SAC ralkap kar kahdohnak a chuak i, SAC ralkap nih Jet Fighter in bomb an thlak caah anmah ralkap lila an umnak ah bomb a tla i, ralkap tam tuk hliamhma an pu, tiah theih a si.

Nizan October 23 ah Moemauk peng Wawan tlang nichuah lei ah SAC ralkap le KIA, PDF kar kahdohnak a zual ngai caah SAC ralkap nih Jet Fighter in bomb an thlak i, anmah lei ralkap lila pawng ah a tlak caah SAC ralkap tam tuk hliamhma an pu, tiah tualchung mi hna nih an chim.

“SAC Jet Fighter in bomb an thlak caah an mah lei ralkap lila tam tuk hliamhma an pu. Motor 4 in hliamhma pumi ralkap cu Moemauk sii-inn lei ah an kalpi hna. SAC ralkap nih timh ciammam tein Moemauk khua chungah bomb an thlak i, dum cheukhat a rawh pinah vok pakhat a thi,” tiah Kachin ram um SAC ralkap he naihniam in a ummi sinin theih a si. Kachin ramkulh ah SAC ralkap le KIA, PDF kar kahdohnak a zual tuk caah SAC ralkap a thimi le aa hliammi an tam, tiah theih a si.

Mahlaing Khua Ah Umhmun Khuarmi SAC Ralkap Cu Drone In Bomb Thlakhnawh An Ton Caah Pahnih An Thi Mandalay ramṭhen, Mahlaing peng Tayet Kaungpin(သရက်ကောင်းပင်) khua ah umhmun a khuarmi SAC ralkap pawl cu, drone in bomb kan thlakhnawh hna caah ralkap 2 an thi, tiah Myingyan No. 4 Battalion Natogyi People Defence Force(NPDF) ṭuanvo ngeitu nih a chim.

October 21 zanlei sml 4:00 hrawngah Mahlaing peng Tayet Kaungpin khua ah umhmun a khuarmi SAC ralkap cu, NPDF nih drone in bomb kan thlakhnawh hna caah SAC ralkap 2 cu a hmun ah an thi colh. Ralkap a thi chapmi le aa hliammi an um rih ko nain, fiang in kan thei kho rih lo, tiah Natogyi PDF in ṭuanvo ngeitu nih cun a chim tiah theih a si.

“Cheukhat ralkap cu an phei zong tan a haumi an um. SAC ralkap nih Tayet Kaungpin khua pawng ummi khuate cu khual cazin an check hna. Mithar nan hmuh hna ahcun nan kan chimh lai an ti hna pinah CDM a tuahtu le NLD party chungtel hna zong tangka an hal hna,” tiah a chim chap. Crd-The Chin Post