CNF Hakha; Falam Lei in a rami Ralhrang he i kahnak Report!
CDF HAKHA FALAM LEI IN A RAMI RALHRANG HE I KAHNAK REPORT
===========
Kawl Ralhrang he i kahnak; 1) March 03, 2022: Kalaymyo in Hakha lei ah a rak kaimi Kawl ralhrang hna cu Dokṭhet le Chuncung karah CDF Hakha nih bomb in kan kah hna caah ralhrang lei minung 8 an thi. CDF Hakha nih kan thlakmi video CDF file ah kan fim.
Kan bomb kahmi nih fak tukin a khen hna caah hmai an kal ngam ti lo i Dokṭhek ah an riak. Cu an riahnak ahcun ralhrang a thimi an hawi le kha an ruak an lak hna i inn chungah an chiah hna, cu hnu ahcun inn an khangh. Dokṭhek khuami inn an khanghpiak mi hna inn 16 a si.
2. March 03, 2022: Hakha lamruk tonnak Gate hngak Kawl ralhrang hna cu kah an si. Leng a rak chuakmi pakhat a thi.
3. March 04, 2022: CDF Hakha nih an hmailei in kan bawh hna. Raltuknak tank kha hmai ah an kalter i hriamngan in an kan kah. Kunfang a niam tuk caah kan duhning in kan kap kho hna lo.
4. March 05, 2022: Chuncung khua pawng ah mine chiahmi (voi 8 ) an i lamh caah ralhrang lei in minung 11 (11:00 AM) an thi. An kal ngam ti lo caah lam cungah hmunhma an khuar. Kan hriamnam ai dan tuk caah chunlai ah kap loin zanlei muih kan hngak. Zaanlei muih hram a van i thawk ah (7:00 PM) kan pel hna i kan kah hna, minung 10 an thi.
5. March 06, 2022: Chuncung le Hakha thar karlak ah kan kah ṭhan hna, ralhrang minung 3 an thi. Mine kan chiahmi (mine detecter an hman) an theih caah an kal ngam ti lo i Hakha rungtlang ummi (266) sinah bawmh an hal. Rungtlang lei in chanh dingah a rak rami cu Hakha thar an lonh ah kan kah hna. Minung 2 an thi.
Inn le Lo an khanghmi le hliamhma tuarmi; 6. Dokṭhek (March 03, 2022) khua i ralhrang an riah lio ah khuami inn 16 an khangh. 7. Hniarlawn thar an phak lio ah inn 2 an khangh, pastor pa inn pakhat aa tel. 8. Nu pakhat hliamhma a tuar.
Ram le Miphun Caah Nunnak Pemi; 9. March 05, 2022: Chunchung khua i ralhrang an riah lio ah Pu Rung Hu cu ralhrang kut in a nunnak a liam. 10. March 05, 2022: Kan ralkap chungin Van Ṭha Simoen (kum 21) nih ram le miphun caah a nunnak a pek.
Fianternak: A tanglei kahnak ah, Kawl ralhrang lei in 18 tluk hliamhma an tuar. Report kan ṭialmi hi Hakha peng chung i kahnak lawng kan langhtermi a si. Chinland Defense Force, Hakha
Zarhkhat chung kahdohnak ah ralhrang 80 an thi, mipi hriamtlai 4 an nunnak a liam. February 27 in March 7 tiangah Chinland Defense Forces le ralhrang karlak ah kahdohnak voi 18 a chuak i ralhrang 80 leng an thi. Mipi hriamtlai lei in minung 4 nih ram caah an nunnnak an pek tiah thawng theih a si.
Falam in Hakha lei ah eidin a phormi ralhrang mawtaw 27 le tank 2 cu ralkap thazang 200 hrawng he Hakha lei an panh. Cu ralhrang mawtaw thluan cu Chin National Front (CNA), Chin National Defense Force (CNDF) le Chin Natinal Defense Force-Hakha (CDF-Hakha) phukomh hna nih voi 15 an kah hna caah ralhrang 70 leng an thi tiah theih a si.
Cu zarhkhat chung kahdohnak ahcun, CNA ralkap 3, CNDF hriamtlai pakhat, an zapi te minung 4 nih ram caah an nunnak an pek tiah theih a si.
Cun, Chin ramkulh, Falam peng, No.2 India-Myanmar lam cungah a cawlcangmi ralhrang pawl cu Chin National Army (CNA), Chin National Defense Force (CNDF), People Defense Force-Zoland (PDF-Zoland), Civic Defense Militia (CDM-Syin) le CDF -Hualngoram hna fonh in an kah hna caah ralhrang 8 hrawng an thi. Mipi hriamtlai phu nih hliamhma pu lo tein hnu an kir kho tiah Chin National Front-Headquarters nih March 8 ah cathanh a chuah.