CNF/A a huatu pawl cu theih an si cang e!!

CNA Le CDF Mindat Pumkhat Siter Khawhlo Tu Hna Hi Ramchung Ramleng Politicians Hna Ansi!!!
=====================
CNA nih hriamnam an bawmh khawh lo mi cu anmah an i za lo caah asi tiah Boci Thawng Za Lian nih a ti. Raldoh pi peng ko hna nain an mah nih kir uh an ti hna (CDF Lautu Chairman Interview) Salai Isacc Khen, Mindat MPs Aung Thant le Ni Ling Aung (Kawlpa), MP Pa Thang hna nih CNA an rem hna lo. CDF kha PDF tiah thlen an duh caah Dr. LHSK nih a sik hna. Federal an fiang lo an ti hna. Tedim MP Mang Hen Dal PDF Zoland tiah a thlen khawh. ZFU timi Zomi Federal Union Party an dir ve.

Lakhruak Chin Cozah siamnak le Dohthlen can hruaitu ah CNA aa tel ve kha cung lei upa 5 nih an duh lo. CDM bawmnak le CDF bawmhnak vialte anmah nih tlai an duh. CJDC le CDF kip ah anmah nih Ralbawi le uktu luzik si an duh. CJDC le CDF nih an cohlan hna lo. CNA an i bochan caah asi tiah Upa 5 nih an ruah caah CNA an huat i an hnahchuah cang.

CJDC nih Lakhruak Chin Cozah siam awk ah CDF le PDF vialte nih cohlan mi le hnatlak mi asi. Senthuh in fek ter mi asi nain, PDF Zoland cu Mang Hen Dal nih, CDF Mindat cu Isacc Khen nih, CDF Paletwa cu Isacc Khen nih kal hlah uh an ti hna.

CDF Mindat, CDF Paletwa, PDF Zoland le CNO CNDF bawmhnak in MPs le Party upa hna lawng in Chin Cozah siam an duh. Cunglei upa 5 nih ara lai mi Chin Cozah ah PM le Vuanci, Luban vialte si an duh, CJDC nih EC nih a thimh lai, vote a tei mi nih PM le Vuanci siseh ti asi ve.

CNF Pu Khua Uk Lian an sawm khawh i, Salai Isacc Khen minung asicang. Charter an chuahpi mi ah cung lei 5 le MP lawng nih uktu le Ralbawi ah si awk asi caah CNF le ZZMLS nih kan i tel ve lai lo an ti. Dai nih a ti ve.
CNO/CNDF, PDF Zonland / ZFU, le Kanpelet cu Alliance an tuah ter khawh hna caah CNO cu CJDC in aa phuah ve. MDF le CDF Senthang cu Mindat mahamei cia an si.

PRA Magway he Mahamei si in fek ter an duh. Cunglei upa 5 hna nih CNF / CNA cu Hakha Thantlang ta asi tiah Gospel an vak pi. Ramchung ramleng aum mi vialte nih CDF mindat lawngte in dirh awk an hnatlakpi hna. Phaisa tampi an thawh ve.

Pu Aung Thant le CUnglei upa 3 nih phaisa an vaivuan caah an zumh ti hna lo. CBCUSA bawmhnak cu anhmuh ve, CBCUSA meithal an pek ve hna tikah, Tamdeuh cu CNA ah an lunthin aum. Nain Mi cheukhat kalsual mi hna CNA huat in an i lak rih.

Ling Thar (လီးထာ) timi pa Paletwa in CNA thawlh awk ah AA he hnatlak nak kan ngeih a ti. CNA le Chin ah pum khat si aduh mi Mindat pa nih Comments in a sik len. VP1 Dr LHSK cu VP2 ah an tum ter i Mindat pa Thang Ning Kee cu VP1 ah an kai ter nain, Mindat mi a sizung khawh ti hna lo.

CNF CNA he pumkhat si khawh lo ding in Tedim, Falam, Mindat, Mara tbk hna a tukforh tu hna hi: Ramchung Ramleng Politicians rual le ram dawtu aa ti mi lawng te an si hna. Photo: (လီးထာ) nih a tial mi le a sik tu pa comment, CNO, ZFU le CDF Mindat Alliance an tuahnak thanh ca. Sual a ka phawt i a ka pamh mi nan um ahcun tlingkhitkhet tein ka tial lai, Nika pho in kan pho te hna lai. Crd-Joseph R. Thang

SAC Ralbawi Le Bangladesh Ram Nawlngeitu Hna Tonnak An Ngei, Mayanmar-Bangladesh kaphnih ramri hngak tonpumhnak meeting cu, October 30 zing sml 10:30 ah Bangladesh ram Teknak khua Shahparrdwip ah an tuah, tiah theih a si.
Cu tonpumhnak ah SAC lei tuanvo ngeitu hna nih Bangladesh ram chung i PDF ralkap an umnak hmun le sakhan cu hmanthlak he hmuhsaknak le fianternak an tuah pinah Myanmar le Bangladesh ramri a him khawh nakding ah hmunkhat ah rianṭuanṭi ding in hnatlaknak ngeih dingin ceihhmainak an ngeih pi hna, tiah theih a si.

Cu tonpumhnak ah SAC kuttang palik phu, No.1 ramri a hngaktu, caan karlak palik bawi Ye Way Soe telh in minung 6 an kai i, Banladesh ram in No.2 ramri hngak Battalion Commander Lt. Colonel Sheikh Khalid Mohammad Iftekhar telh in minung 8 an kai ve, tiah theih a si. Cun Myanmar le Bangladesh ramri ah hram a bunhmi PDF ralkap hna ṭhawl ding le phung ning loin luh chuahnak a um ahcun tlaihkhih piak ding in SAC lei nih nawlnak an tuah tiah theih a si.

SAC Nih Nawlngeihnak An Lak Hnu In Karenni Ramkulh Ah SAC Ralkap 1,618 An Thi Cang, SAC nih nawlngeihnak an lak hnu in Kaya(Karenni) ramkulh chung kahdohnak ah SAC ralkap 1,618 an thi cang, tiah Progressive Karenni People Force(PKPF) nih nihin November 1 ah cathanh an chuah tiah theih a si. Karenni ramkulh chungah SAC ralkap an dohnak ah KA le KNDF ralkap 183 nih ram le miphun caah an nunnak an pek ve.

Kahdohnak voi 500 leng a chuak i, SAC ralkap nih Karenni ramkulh chungah vanlawng in voi 173 nak tlawm lo kahdohnak an tuah, tiah an cathanh ahcun an langhter. “Nihin zongah Karenni ramkulh chungah kahdohnak a chuak. A bik in Saungkan khua pawng ah kaphnih kar kahdohnak a chuak i, SAC ralkap nih Loikaw-Mobae motor lampi hi uk le pen an i tim,” tiah Karenni ralkap pakhat nih a chim. Nikum 2021 Febuary 1 in 2022 October thla tiang ah SAC ralkap kut in an nunnak a liam mi <span;>Karenni rammi 282 an si cang, tiah an langhter chih tiah theih a si.

Rakhine Ramkulh Ni 6 Chung Kahdohnak Ah SAC Ralkap 24 An Thi, Hriamthil Lakpiak An Tong, Rakhine ramkulh, October 26 in October 31 tiang SAC ralkap le AA kar ni 6 chung kahdohnak ah SAC ralkap 24 an thih pinah an hriamthil tamlak lakpiak an tong tiah AA nih phungning tein cathanh an chuah tiah theih a si. October 26, zaanlei suimilam 4:10 ah Rakhine ramkulh Yataetaung peng Chingkhali khua pawng ah suimilam cheu tluk kahdohnak a chuak i SAC ralkap 4 an thi, meithal 2 le kuan zeimawzat lakpiak an tong.

October 29, zinglei suimilam 9:13 ah Kyauktaw peng Yaukta khua pawng ah SAC ralkap le AA kar minutes 20 tluk hrawng kahdohnak a chuak i SAC ralkap 5 an thi, hliamhma tuar zong an um. October 29, chunhnu suimilam 2:10 hrawng ah Paletwa peng Myaitwa khua pawng kahdohnak ah SAC ralkap 1 a thi, pakhat hliamhma a tuar tiah theih a si.

October 31, chunhnu suimilam 2:00 hrawng in zaanlei 4:00 tiang Maungtaw peng chaklei ah kahdohnak a chuak i SAC ralkap 3 an thi, minung 10 nih hliamhma an tuar leng ah hriamthil tamlak an lakpiak hna tiah theih a si. SAC ralkap nih an duhnak hmun paoh hriamngan an kah caah October thla chung ah tualchung mi 6 an nunnak a liam i, minung 21 nih hliamhma an tuar tiah theih a si.

October Thla Chung Ah SAC Kuttang Bawi Ngan 13 An Thi, Bo-hmu-kyi 2, duh-bo-hmu-kyi 1, bo-hmu 3, bo-gyi 1, palik bawi 4, pengkulh uktu 1, pengkulh biaceih bawi 1 tiin SAC lei ṭangtu bawi ngan 13 cu October thla chung ah an thi, i bu-hmu 2 tlaih an tong tiah theih a si. SAC ralkap le tualchung hriamtlai phufonh kar ikahdohnak ah SAC ralkap lei in ralbawi nganngan hna an thi, cun an nun bu in tlaihkhih a tong mi ralbawi hna zong an um tiah theih a si.

Zarhhnih Tluk Mei A Rawh Hnu In Hakha Khua Chungah Sabuti Man A Kai, Chin ramkulh khualipi Hakha ah a luancia October 21 in mei rawh hram ai thok i, November 1 tiang ah mei an remh khawh rih lo caah sabuti man a kai, tiah theih a si. Hakha ah sabuti a zuartu pakhat nih, “Mei a rat lonak a sau tuk cang. Mei a ṭhat ahcun elctric mei in kan rak chuan tawn i a tlamtling ngai.

Atu cu meihol in chuan a si tikah meihol tam tuk a dih. Meihol man zong cu tunkhat ah 15,000 in 18,000 kar lawngte a si tikah a har ngaingai,” tiah The Chin Post ah a chim. Kadang ah cun sabuti kheng khat ah kyats 1,500 lawngte in an rak zuar cang nain kan nih cu kan rak kai duh lo. Asinain mei a rawh caan a sau tuk cang pinah meihol man a kai tuk ruangah sabuti man zong kai lo awk a ṭha ve ti lo i, nizan October 31 in sabuti kheng khat ah kyats 1,500 le sapherh pakhat ah kyats 500 in kan zuar cang, tiah a chim chap.

Hakha khua chungah mei a rawhnak zarhhnih tluk a si cang i, cheukhat cu meihol an ngeih ti lo caah inn pawngkam thinghreu an khawmh in rawl a chuanmi zong an um. Cheukhat cu meihol le thing an ngei lo i, rawldawr le sabuti dawr ah a eimi zong an um, tiah theih a si. Laimi tam deuh nih sabuti cu an tlaihchan ngaimi Lai rawl phun khat a si i, cheukhat sabuti dawr ah cun khengchap(လိုက်ပွဲ) a um ti lo, tiah theih a si.

Khuapi Laak Kahdohnak Tuah Ding Ah PDF Timhcia An Si Cang-NUG, Ram chungah khuapi laak kahdohnak tuah ding in tlangcung hriamtlai hna le PDF ṭangṭi phu hna cu hmunkhat ah khua an khangṭi i, timhcia tein an um cang, tiah NUG President zung in chimphuannak nawlngeitu Kyaw Zin nih a chim tiah theih a si.

NUG nih a ra laimi 2023 thok cun SAC ralkap cu ramkhel leiin siseh, rallam in siseh, chawleh chawhrawlnak leiin siseh, cun vawleicung upadi ning in siseh, a lamkip in kan nam cang lai. Cu pinah rallam hmun 6 in kan luhhnawh cang lai, tiah a luancia October 7 ah cathanh an rak chuah.

Khuapi laak kahdohnak kan tuah te tikah mizapi inn le lo hnursuan lo le mizapi humhim khawh ding in kan i zuam lai. Cheukhat khuapi ahcun PDF nih SAC ralkap an kulh cang hna, tiah NUG chimphuannak nawlngeitu Kyaw Zin nih a chim. CDM ralbawi pakhat nih khuapi laak kahdohnak kan tuah khawh nakding ahcun vanral kan i runven khawh hnasa a hauh caah vanlawng i khamnak hi biatak tein kan i hmaithlak a hau, tiah chim.

Vanral kan i runven khawh ahcun khuapi laak kahdohnak kan tuah lo hmanh ah tampi ṭhathnemnak a chuahpi lai. Vanlawng tilknak lam le van lei rianṭuannak zung hna kan kah khawh ahcun thil ṭha tuk a si lai, tiah a chim chap. SAC ralkap nih vanlawng hmang in bomb an thlak lengmang mi cungah NUG nih vanlawng kahnak hriamnam cu a hmun le caan aa remnak bik ah hman ding in kan tawlrel cuahmah, tiah an thanh. SAC nih nawlngeihnak an lak hnu ah vanlawng hmang in voi 250 nak tlawm lo kahdohnak an tuah i, tualchung mi 200 leng an nunnak a liam, tiah NUG nih cathanh an chuah. Crd-The Chin Post