CNA le CDF Ka Hmuh Ning!
===================
MAH nih uknak a lak ka te ahkhan KKG talkshow kan rak tuah hna, Kalay i a ummi kan bochan taktak mi kan pa (min chim lo) nih hitihin a rak kan ti “hriamtlaiphu le group tampi kan dirh cio te lai, asinain saupi a kal kho taktak ding an si te lai lo. CNA lawnglawng hi a puitling mi le a fakcak taktak mi cu asi caah CNA thithruainak tangah hin um zungzal ko u,” a rak kan ti. Fiangtlarh in a rak chim lo nain nihin ahcun adik ka ti chin lengmang kan pa i a rak kan chimhmi bia kha, atling zong a tling chin lengmang in ka thei.
CNA le CDF tiin (anmah ralkap le ralkap siloin supporting upat cheukhat) holh tam le biaalnak naihrawng cu a tam chin lengmang, CNA cu zei ngaingai an si lo, an ral a chiatuk, zeihmanh an tuah kho lo le pei CDF cu a dir cu ti bantuk, raldoh ahcun CDF an ral a tha deuh i kan tam deuh zungzal ko ti bantuk, a phunphun in comment le catialmi an um len. Hihi tulio Ukraine le Russia raldohnak he ai lo taktak khi asi, Ukraine nih an ukmi Russia ralkap nih an lak khawh bak lomi Bukmut khi Wagner Private Military Company (CDF bantuk an si ve) timi nih Russia ralkap nakin Ukraine an chei deuh hna.
Russia ralkap nih an nawr kho bak lo nain Wagner private group (CDF) nih cun an nawr khawh ngaingai hna. Cucu I phawrhlaw riangmang in an boss pa Yevgeny Prigozhin nih holh zalawnnak le Russian ralkap bawi pawl soiselnak ah a hman ciammam i Russia ram cu a buai dih ko. Kan nih cu Russian miphun kan si le cozah tangah um ding kan si timi kha philh riangmang in an thilti khawhmi tlawmte ruangah ram buaitertu ah ai cang lehlam. Adonghnak ahcun Bukmut an lak cia mi hmunhma zongin Wagner group pawl hi thial in Russia ralkap nih um hmun khuấr an i tim, phundang in kan chim asi ahcun an kal vima asi ahcun Russia ram a buai dih sual lai ti an phần caah credit tam pek an duh ti hna lo.
CNA le CDF kong hi a chung lei ralkap hmanh in an buai lai ka zum lo, supporting team leader (Yevgeny Prigozhin bantuk pawl) phaisa kawlnak rumro a tuak deuhmi pakhat hnih nih bia an tuahmi asi bik in ka thei. Curual in CNA tanhtu hna zong nih CDF hi soisel hna an herhnak ka thei lo kei. Keimah hmuhnak in fiangtein ka chim asi ahcun CDF hi an um rih cu a tha, CNA bawmtu le lo hna kalnak asi lehlam lai zong ka zumh. CNA nih option one an pekmi chung tu ahhin um kho dih hna sehlaw a thattuk lai. Mipi vengtu ralkap (Militia) timi pawl hi an ral a tha duh, US nih training thatein a pekmi minung ting nakin ISIS minung 7,000 an thawng deuh, Russia ralkap minung ting 3 nakin Wagner mercenary force 50,000 an thawng deuh.
Asinain Kalay i kan pa nih a chim bantuk khan saupi a kal kho taktak mi cu an si lo, discipline an ngei taktak kho lo, phaisa kongah an buai duh, leader i cuh kongah an buai duh, disciplinary kongah action an i la kho taktak kho theng lo, caansaupi hnu ahcun civil mi he an i rem lo ngai tawn. Cucaah cun CDF zong hi CNA command and control tangah um kho peng sehlaw a safe bik ko lai. CNA maw CDF tiin leader pawl nih politic nan celh ahcun Laimi 90% cu CNA kan si viar ko lai caah daitein um ziar ulaw CNA sinah hin zeitindah rian kan tuanti khawh lai timi tu kha thuk deuh in ruat ko hna usih. Cucu a puitling mi ruahnak le ral teinak lungput zong asi lai. crd-Chelsea Bawi