CNA/CDF Ralkap tha hna, Ruahchannak tampi nan ngei, nan hmailei kong ah!

KAN RE A THEI BAK KO! NA RE A THEI VE KO LO MAW!
========
Ram Tha Khuasa Hna: Zingzan Dinh can ngei lo in Rian nan tuan! Thlahlawh tlawmte hmuh nak dingah Thazang dihlak nan hman. Mitkuh vuai ni a um bal lo, Thu in thlasamh can zong nan ngei lo. Hmuhmi thlahlawh tlawmte a kal nak ding van phawt ah; Kut chung a luh hlan ah chuahnak ding hmun nih hngah cia an si.

Siaherhnak hmun a tam, a zaa hrimhrim lo! Mah le thiamning cio in hmuhmi tangka tlawmte cu mah taireek in phawtzamh i zuam cio asi: Kawlram a ummi mah chungkhat bawmhnak, Hmun tam taktak in Miphun le ram ca thawh awk an ra; Pathian sunparnak caah Biakinn lei thawhbur asi; Mah chungchuak fa le ca hmanh tuaktan kho lo in Bawipa sinah nan ap i mihar bawmhnak le miphun dirkamh nak ca tu ah nan hmuh chun tangka vialte nan hman dih. NAN RE A THEI BAK KO!

Ram Chung Ummi Miphun Hawi le Hna: Pawcawm nak rian nan kal tak (CDM); Nica tuan awk zong nan tha lo. Chungchuak fa le hmailei nan ruah ah nan chungpit in nan van a sang lai. Hmailei kong ruah can ah lung a dongh can khi a va tam hringhran lai. Chanchung Paw i reek in renhmi Inn le lo Khangh piak le hrawhpiak dih nan si; Mah inn dai tangah it kho lo in ram sa bang thingtang ram tang kip ah nan zam. Chungtling tein zarhpi zingah nuam tein mah run toi ah tuanrel ti in, zing rawl dum ti caan le, zingpumh dar tum thawng kha nan ngaih tuk ah chung lei mitthli a luangtawn theu lai.

Zingzan nih a tam, chungkhar nitin pawcawmnak caah hringtu nu le pa nan lungretheih a fak tuk tawn lai. Zeitikah kan khuaram ah kan kir than te lai i hnganam in khua ka sa te lai ti ruahchannak ngeih awk ah aa hngal kho lo.Ral tih in hrukaih puanhmanh keng kho lo in nan zam caan, hngilh kho lo in kuan fang lakah na tlik caan, suimilam pakhat lamkal kha Zarhkhat rau in chunzan nan zam caan ah nan pum re a thei tuk tawn lai. Maw chin miphun hawi hna, pumsa, thinlung, taksa, thlarau ah NAN RE A THEI BAK KO!

CNA/CDF Ralkap tha hna: Mino tete, thancho nan duh saling, Ruahchannak tampi nan ngei, nan hmailei kong ah saduhthah relcawk lo nan ngeihmi vialte Mairuang sam in sampiak nan si. Pathian laksawng sung, thluankhat te lawng a kan pekmi Nan Nunnak kha zeitik caan poah ah a dong kho dingin miphun le ram caah nan taar.

Vawlei ah a thabik mi hriamnam ngangan a ngeimi ralhrang kha nan kut lawng cha in nan dironh i miphun nan kan humnak. Nan than saling, Eidin nan kaa a thawt saling ah duhdim in Ei awk rawl hmanh um lo in, thingram lakah nithla rel in can nan hmang. Mitkuh vuai lo in zingah nan tho, ka re a thei, i din ta rug ning ti awk nan tha lo, a herh tik poah ah zeitik can poah ah, timh cia tein miphun caah hrahhrial in nan um zungzal.

Nu le pa le chungkhat nih va-chuan teidung bih in bih mi le zohthlami, chungkhar i Eidin tirawl thaw bik kha Ei seh tiah sunlawih tuk mi le dawtbik mi nan si nain, Ralhrang nih zeitik can poah ah Thah khawh mi dirhmun ah dir in, dinnak lam cawh awk ah nan nunnak nan thazang nan fimthiamnak le na thawnnak, nan cansung, nan zeizong vialte nan pek dih i nun nan hmang! Nungak thlanval lio caan, chan lai ling, Hawikom he tlonlen kha a nuam bik nan ti lio caan theng te ah umhar lileng in fingtlang sang kip cul in thihnak innka hram ah nan nun a dir zungzal. NAN RE A THEI BAK KO.

Miphun Hruaitu Vialte Hna: Bukip, Phu Kip, Khua le Ram hmunkip in Miphun rian ah hruaitu a tuanmi vialte hna, chungkhar kaltak, pawcawmnak rian kal tak, le mah thinlung daihnak caah a herhmi tuahnak can hmanh ngei lo in, mah pawcawmnak riantuan pah in chun it lo le zaan it lo in khua nan khang. Zoom Meeting, Mipum Meeting, Khualtlawn zungzal, Fanu fa pa he hmanh can hmang ti kho lo in mitkuh vuai lo in ngakchia in Upabik Kum 80 leng kan nu/pa le tiang, Miphun caah lutaw hngal lo in nan cawl nan cang.

Mah le thiam ning cio in tangka nan kawl, khua nan khang. Cite ngapih cawknak te tal ah a thahnem lai tiah, cantling riantuan bu in can hlei ser in tangka nan khawm. Mitkuh vuai lo in miphun bawmhnak caah nan cawl, Ti rawl ei can hmanh ngei lo in, thluak fak in khua nan khang. MIphun hmailei kong ruah ah lungrethei caldawmh le mitkuh thaw lo in zankhua nan dei can a tlawm lo. NA RE A THEI BAK KO.

LAI/CHIN MIPHUN KAN RE A THEI BAK KO! Vawlei hi Harsatnak Ram, Chikkhat kan khual lam. Sertu Pathian sunparnak rian tuan dingah chikkhat te kan tan pahmi hmun, kan kaltak te lai mi; kan tlaihchanmi vialte le kan duhmi vialte hi a hmun lo mi an si nak hmun, zungzal nunnak thlarau le a thi dingmi pumsa fonh in chikkhat te rian tha tuan dingah Bawipa nih a kan chiahnak vawlei a si bantuk in.

KAN RE A THEIH BAK KO- mi hi kan Chuahchan le Ser hnawhchan kan sinak asi ko. Vawlei ah ka thil a rit tuk tiah, Vawlei kalning in fawi tein kal ve sual a fawi te. Thiltha lo kha doh lo in tha va pek sual zong a fawi te. Mah nunnak ca lawng ruat in thil tha lo kha va tanh zong a fawi te.

Zumtu tha hna cu, chikkhat kan umnak le khua kan saknak, kan kal tak laimi vawlei kal ningin kal ding ah tinh kan si lo bantukin, Pathian a ral chanhmi vawlei ah Dinnak kha tiva bantuk in luanter ding le thiltha lo kha Doh ding; Luatnak riantuan dingah le a nung in pekchanh mi raithawinak bantuk in Bawipa pennak rian caah aa pechan dingin sermi le khamhmi kan si.

KAN RE A THEIH BAK KO mihi Serhnawhchan kan si nak asi i, lungdong lo tein sunparnak rian a si tiah, Zungzal Nunnak a kan petu Pathian lei ah tang in thil hman caah kan nun a dongh tiang lungsau tein, kan miphun ning piin Pathian bochannak he kan mah le zawn cio in, a tha bik in cawl chinchin, thazang chuah chinchin ko usih.

Tikik hraikhat te midang kan va dinh mi hmanh a philh bal lo tu Pathian thawng in teinak kan hmuh can a phan te lai. Teinak cu Bawipa ta asi. A fialmi rian tlamtlinh cu kan mah Rian asi. Thluachuah a petu cu Pathian asi. Credit: Zathawngcin Siakhel