Chuahpi unau ning bakin ram caah nunnak petu hna!
==========
Chuahpi unau ning bakin ram caah nunnak petu hna. Ka chuah semnak Thantlang peng, Hriangkhan khuami u nau pahnih nih kum khat chungah ram caah an nunnak an pek. Nai te ah a naupa nih nunnak a pek i, nihin ah a upa nih a pek ṭhan. Nu le pa unau le khuami caah a va fak hringhran dah mu. Mitthli a hul hlan ah mitthli nih zulh.
Ka nau le, kan in siang hna lo e. Khuami nih bochanmi nan si i nan no tuk rih si. Nan i dawh le nan pum rua ṭhat le nan i no nal rih ning. U le nau bak in tuan tuk nan kal cu nan nu nan pa zeitin dah an tuar khawh lai. Ramdang ah amah te lawng khua a sami nan unu zawn tel nan ruah awk a si e.
Kum Khat Chung Ah CDF-Thantlang Ralkap Unau Hna 2 An Nunnak Liam. Kumkhat chung ah CDF-Thantlang Battalion chungin unau hna a si mi Salai Ram Hei Lian le Salai Moses Van Bawi Hup cu ram le Miphun caah an nunnak a liam. Anau pa a si mi Moses Van Bawi Hup (Kum 19) cu 2023 Febuary 16 Thantlang khuachung kahdohnak ah a nunnak a rak liam i a upa a si mi Salai Ram Hei Lian zong July 18 ni ralram hmun pakhat kahdohnak ah hliamfak a tuar i August 14 siizung pakhat ah an nunnak a liam hi a si.
An mah cu Hriangkhan khua mi an si i Thantlang khua sangthen No.2 Biakinn sang ah khua sa mi an si tiah kan theih. Lung a fak hring hran ko e dawt mi fanau le hna nan thawng thei hi tuar har ko ee maw dothlan nak aw na man fak tuk hring hran ko ee. Ka celh lo ee a fak khun tuk ee ka nau le kan tuar kho hrim lo ee .Ram le Miphun caah tiin kan thin lung i hnem ko ne usih mu.
Thantlang Khua Kahdohnak Ah CDF Minung 3 An Nunnak Liam:, SAC Ralhrang 2 An Tlaih Hna. August 14 zing suimilam 5 tluk ah Thantlang khuachung SAC ralhrang sentari conghnak sakhan pakhat cu Chin ralkap tangti phu nih an kah in an lak pin ah ralhrang 2 a nung in an tliah hna.
Mah ni kahdohnak CDF-Thantlang Battalion minung 1 le CDF-Zophei Battalion minung 2 an nunnak liam tiah CNA nih thanhca an chuah. SAC ralhrang lei a thimi le hliamtuar theih an si rih lo nain ralhrang a nungin 2 an tlaih hna pin ah hriamnam zun 6 cu Chin ralkap nih an lak khawh.
Chin ralkap nih Sakhan an lak nak hmun cu ralhrang Jet Fighter nih voi 3 nak tlawm lo Bomb a thlak. Mah pin ah Hakha peng Loklung khua zong hriamngan in an kah caah inn 4 a rawk i khua mi pakhat hliam a tuar. Cun Thantlang peng Khuafo khua zong Jet Fighter nih Bomb a thlak than caah Biakinn le Pastor inn a rawk.
SAC ralhrang nih Chin Miphun cungah an tuah sernak cu fakpi an dohnak kong le dantat piak ding kong, Mipi hliamtuar le nunnak liam hna cung ah ngaihchiatnak an langhter nak kong cu cathanh chuah mi ah an langhter chih.
Hriamngan Kuan Nih Hakha Baptist Church Senior Pastor Pa Inn A Peh! Chin ramkulh, Hakha khuapi, dawrhlun sang um Hakha Baptist Church(HBC) Senior Pastor Rev. Dr. Thawng Hlei Thang inn cu hriamngan bomb ci nih a peh, tiah theih a si.
“Tuzanlei suimilam 5:00 hrawngah SAC ralkap nih hriamngan an kahmi kuan cu HBC Senior Pastor Rev. Dr. Thawng Hlei Thang te inn pawng ah a tla i, an inn zong hriamngan ci nih a peh nain an chungkhar cu an him ko. Bomb ci nih a pehmi inn tu cu faak tuk in a rawk lo,” tiah Hakha ummi pakhat nih The Chin Post ah a chim.
HBC kiangkap chung ah hriamngan kuan a tlaknak kong he pehtlai in biaknak lei hruaitu hna le Chin ralkap lei nih thawngthanhnak an tuahmi a um rih lo. Nihin August 14 zinglei le zanlei zong ah Hakha dawrhlun sang le palik sakhan hrawng zong in meithal thawng a thang, tiah theih a si.